រដ្ឋមន្រ្តីក្រសួងការបរទេស​អូស្រ្តាលី ប្រាប់ពលរដ្ឋ​មិនឱ្យធ្វើដំណើរទៅប្រទេសចិន

កង់បេរ៉ា៖ រដ្ឋមន្រ្តីក្រសួងការបរទេសអូស្រ្តាលី លោកស្រី Marise Payne បានជម្រុញ​ប្រជា​ពលរដ្ឋមិនឱ្យ​ធ្វើដំណើរកំសាន្តទៅប្រទេសចិន ​ក្រោយអ្នកកាសែតស្លូតត្រង់ ២នាក់ បាន​វិលត្រឡប់មកប្រទេសកំណើតវិញយ៉ាងប្រញាប់ ​បន្ទាប់ជួបបានសម្ភាសន៍ជាមួយប៉ូលីសរដ្ឋចិន។

លោក Bill Birtles អ្នក​យក​ព័ត៌មាន​ឲ្យ​បណ្តាញ​ទូរទស្សន៍ ABC ​និង​លោក Michael Smith អ្នក​យក​ព័ត៌មាន​ឲ្យ​កាសែត Australian Financial Review បាន​ធ្វើដំណើរមកដល់ទីក្រុងស៊ីដនីវិញកាលពីថ្ងៃអង្គារ បន្ទាប់ពីការចរចាជាមួយប៉ូលីសចិនអស់រយៈពេល ៥ថ្ងៃ ដែលអះអាងថា​អ្នកទាំង២ មានជាប់ទាក់ទងនឹងរឿងសន្តិសុខជាតិចិន។

សូមជម្រាបដែរថា គេហទំព័រប្រឹក្សាការធ្វើដំណើររបស់រដ្ឋាភិបាលអូស្រ្តាលី Smartraveller ក៏បានធ្វើបច្ចុប្បន្នភាព​កាលថ្ងៃទី ៧ ខែកក្កដា ដើម្បីជាការព្រមានដល់​ពលរដ្ឋអូស្រ្តាលីទាំងអស់ ​ថាពួកគេអាចប្រឈមនឹងហានិភ័យនៃការជាប់ឃុំឃាំងដោយបំពាននៅក្នុងប្រទេសចិន ក្រោមហេតុផលរក្សាសន្តិសុខជាតិរបស់អាជ្ញាធរចិន ស្របពេលដែលទំនាក់​ទំនង​រវាង​រដ្ឋាភិបាល​ក្រុង​ប៉េកាំង ​និង​រដ្ឋាភិបាល​ក្រុង​កង់បេរ៉ា​ កំពុងមាន​ភាព​តានតឹង៕