បរទេស៖ បើយោងតាមសេចក្ដីរាយការណ៍របស់ការសែតអេស៉្បាញ Mundo Deportivo បានឲ្យដឹងថាខ្សែប្រយុទ្ធជើងចាស់របស់ក្លិប Barcelona កីឡាករ Luis Suarez កំពុងតែធ្វើការទាក់ទងជាមួយថ្នាក់ដឹកនាំរបស់ក្លិប Juventus លោក Pavel Nedved ក្នុងការផ្ទេររូបគេមកលេងនៅលីគកំពូល Serie A រដូវកាលថ្មីនេះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សថ្មីៗនេះគ្រូបង្វឹកថ្មីរបស់ក្លិប Barcelona លោក Ronald Koeman បានប្រាប់កីឡាករវ័យ៣៣ឆ្នាំរូបនេះឲ្យចាប់ផ្តើមស្វែងរកក្លិបថ្មី ព្រោះរូបគេគ្មានឈ្មោះក្នុងបញ្ជីកីឡាករជួរមុខរបស់ Barcelona នៅរដូវកាលក្រោយនេះទេ។
ក្នុងនោះដែរ Suarez អាចនឹងមានភាគរយខ្ពស់ក្នុងការផ្លាស់មកចាប់ដៃគូជាមួយកីឡាករ Cristiano Ronaldo ដោយសារតែកីឡាករ Gonzalo Higuain កំពុងតែរៀបចំបង្វេចចាកចេញពីក្លិបនៅទីក្រុង Turin មួយនេះហើយ។ ដោយឡែកក្រៅពី Suarez លោកគ្រូបង្វឹក Andre Pirlo ក៏កំពុងសម្លឹងឃើញខ្សែប្រយុទ្ធវ័យចំណាស់មួយរូបទៀតផងដែរគឺកីឡាករ Edin Dzeko របស់ក្លិប Roma ។
គួរបញ្ជាក់ដែរថាកីឡាករ Luis Suarez ក៏ដូចជាដៃគូរបស់ខ្លួនគឺកីឡាករ Lionel Messi មិនបានចូលរួមធ្វើតេស្តពិនិត្យសុខភាពសម្រាប់ត្រៀមក្នុងការប្រកួតរដូវកាលថ្មីនេះជាមួយក្លិប Barcelona នោះទេ។ ដែលនេះជាហេតុផលដែលធ្វើឲ្យអ្នកគាំទ្រទាំងអស់គ្នាយល់ឃើញថាកីឡាករទាំងពីររូបនេះនឹងត្រូវចាកចេញពីទឹកដី Camp Nou នៅក្នុងរដូវក្ដៅនេះពិតប្រាកដមែនហើយ៕
ប្រភព៖ dailymail