អ្នកជំងឺ COVID-19 ម្នាក់ បានរៀបមង្គលការទាំងដែលខ្លួន កំពុងសម្រាកព្យាបាលក្នុងមន្ទីរពេទ្យ (មានវីដេអូ)

តិចសាស់៖ បុរសរស់នៅរដ្ឋតិចសាស់ម្នាក់​ ដែលផ្ទុកជំងឺ COVID-19 និងត្រូវបានគេបញ្ជូនទៅកាន់មន្ទីរពេទ្យ Methodist ក្នុងទីក្រុង San Antonio បានសម្រេចចិត្ដរៀបអាពាពិពាហ៍ជាមួយនឹងគូដណ្ដឹង ទាំងដែលខ្លួនកំពុងសម្រាកព្យាបាលជំងឺនៅឡើយ។

លោក Carlos Muniz និងគូដណ្ដឹងឈ្មោះ Grace Leimann បានរៀបការនៅក្នុងមន្ទីរពេទ្យ កាលពីថ្ងៃទី១១ ខែសីហា កន្លងទៅនេះ ពីព្រោះលោកបានធ្វើតេស្ដវិជ្ជមានជំងឺ COVID-19 នៅក្នុងសប្ដាហ៍តែមួយ ដែលលោកគ្រោងនឹងរៀបចំពិធីមង្គលការ។

ពិធីនេះ បានប្រារព្ធឡើងនៅប៉ុន្មានថ្ងៃបន្ទាប់ពីចូលព្យាបាលក្នុងមន្ទីរពេទ្យ ​ថ្ងៃទី១៥ ខែកក្កដា ពេលដែលសុខភាពរបស់លោក Muniz កាន់តែយ៉ាប់យ៉ឺនទៅ ហើយលោកត្រូវបានគេផ្ទេរទៅសង្គ្រោះនៅក្នុងបន្ទប់ ICU បន្ដ។ តែបើទោះបីលោក ស្ថិតក្នុងស្ថានភាពធ្ងន់ធ្ងរ និងកំពុងប្រើប្រាស់ម៉ាស៊ីនជំនួយដើម្បីសង្គ្រោះជីវិតយ៉ាងណាក្ដី ក៏មន្ដ្រីមន្ទីរពេទ្យសម្រេចចិត្ដជួយលោក រៀបចំមង្គលការផងដែរ។

ជាក់ស្ដែង យោងតាមរូបភាព និងវីដេអូនៃពិធីមង្គលការ បានបង្ហាញឲ្យឃើញថា លោក Muniz កំពុងសម្រាកនៅលើគ្រែ ខណៈកូនក្រមុំដែលស្លៀកឈុតរៀបការ បានធ្វើដំណើរមកអមនឹងផ្កាមួយបាច់ ហើយសមាជិកគ្រួសារ និងក្រុមគ្រូពេទ្យ ក៏បានចូលរួមអបអរពិធីមង្គលការទៀតផង៕

សូមទស្សនារូបភាព និងវីដេអូខាងក្រោម៖