Spurs ធ្លាក់មកនៅក្រោម Arsenal វិញហើយក្រោយភ្លាត់ចាញ់ Sheffield កាលពីយប់មិញ (មានវីដេអូ)

អង់គ្លេស៖ ក្លិប Sheffield United បានស្គាល់ការឈ្នះជាលើកដំបូងរបស់ខ្លួនក្នុង៥ប្រកួតចុងក្រោយកាលពីយប់មិញដោយបានលត់ក្លិបមាន់ខ្នាយមាស Tottenham Hotspur នៅក្នុងដីដោយលទ្ធផល៣ទល់នឹង១។

នៅក្នុងការប្រកួតនោះដែរ ក្លិប Sheffield ជាអ្នកនាំមុខមុនដោយកីឡាករ Sander Berge នៅនាទីទី៣១។ នៅក្នុងតង់ទី១ដូចគ្នាកីឡាករ Harry Kane សឹងតែអាចរកគ្រាប់តាមស្មើឲ្យ Spurs បានទៅហើយប៉ុន្តែត្រូវ VAR ចាប់បាល់ប៉ះដៃរបស់កីឡាករ Lucas Moura ។

ចូលដល់តង់ទី២ Sheffield រកបាន២គ្រាប់ទៀតនាំមុខមុន៣-០ រកបានតាមរយៈកីឡាករ Lys Mousset នៅនាទីទី៦៩ និងមួយគ្រាប់ទៀតនៅនាទីទី៨៤ដោយកីឡាករ Oli McBurnie ។ រហូតដល់នាទីទី៩០ទៅហើយទើប​ Spurs ចាក់ Sheffield បានមួយខ្នាយវិញដោយខ្សែប្រយុទ្ធ Harry Kane ។

បន្ទាប់ពីការប្រកួតនោះមក Spurs បានធ្លាក់មកនៅលេខ៩វិញ ដោយនៅក្រោម Arsenal មួយពិន្ទុស្មើជាមួយក្លិបលេខ១០ Burnley ។ ចំណែកឯក្លិប Sheffield មាន៤៧ពិន្ទុឈរពីលើ Arsenal មួយពិន្ទុនិងនៅក្រោមក្រុមលេខ៦ Wolves ចំនួន៥ពិន្ទុ៕

ប្រភព៖ bbc