ភ្នំពេញ៖ ជាការពិតបញ្ហាអប់រំ ទាក់ទងនឹងចំណេះដឹងសុខភាពផ្លូវភេទ គឺពិតជារឿងមួយដែលសំខាន់ មិនថាចំពោះបុរសឬស្រ្តីនោះទេ គឺគួរតែស្វែងយល់ឲ្យបានច្រើន អំពីបញ្ហានេះ។ តែផ្ទុយទៅវិញ មនុស្សភាគច្រើនបែរជាគិតថា គ្មានប្រយោជន៍ ហើយគិតថាវាជារឿងដែលគួរឲ្យខ្មាស់អៀន និងមើលរំលងទៅវិញ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សដោយឡែកនៅថ្ងៃនេះ ខ្មែរឡូតសូមនាំអារម្មណ៍ ទស្សនិកជនទាំងអស់គ្នា មកតាមដាន កិច្ចសម្ភាសន៍ ជាមួយនឹងវាគ្មិនមួយរូបកញ្ញា កាធឺរីន ដែលជាអ្នកធ្វើវីដេអូអប់រំ ទាក់ទងនឹងបញ្ហាផ្លូវភេទ ដែលអ្នកគ្រប់គ្នាបានស្គាល់កញ្ញា តាមរយៈឈ្មោះថាA dose of Cath បានឲ្យដឹងថា មូលហេតុដំបូងដែលកញ្ញា ចាប់ផ្តើមធ្វើវីដេអូអប់រំទាក់ទងនឹង សុខភាពផ្លូវភេទគឺ ចាប់ផ្តើមតាំងពីពេលដែល កញ្ញាធ្វើការ នៅក្នុងអង្គការមួយ ក្នុងពេលនោះ កញ្ញាបានមើលឃើញថា បញ្ហាសុខភាពបន្តពូជនេះ មិនសូវមានអ្នកលើកយកមកនិយាយនោះទេ ក្រៅពីតាមអង្គការ។
កញ្ញា កាធឺរីន បានឲ្យដឹងថា នៅពេលដែលចាប់ផ្តើមធ្វើដំបូងៗ ក៏បានជួបនៅឧបសគ្គច្រើន ទាក់ទងនិងមតិរិះគន់ ដោយសារតែខ្លួនជាស្រី ហើយលើកយកបញ្ហាទាំងនេះយកមកនិយាយ ដែលមនុស្សភាគច្រើនគិតថា វាជារឿងដែលអាសអាភាស ហើយប្រៀបដូចជាបំផ្លាញ នៅវប្បធម៌ខ្មែរដូច្នេះដែរ។ តែស្របពេលជាមួយគ្នានោះ ក៏មានមតិសរសើរ និងលើកទឹកចិត្តឲ្យកញ្ញា បន្តទៅទៀតផងដែរ។
តែបើទោះបីជា ទទួលរងនៅការរិះគន់ ខ្លះក៏ពិតមែនតែកញ្ញា ក៏ព្រមទទួលយក ហើយគិតថាវាជារឿង ដែលវិជ្ជមានទៅវិញ។ ព្រោះបើសិន មានតែមតិយល់ស្រប គ្មានមតិរិះគន់ទេនោះ មានន័យថាប្រធានបទទាំងនោះ ហាក់បីដូចជាគ្រប់គ្នាបានដឹង ហើយវាក៏ប្រៀបបានជា រឿងធម្មតាចំពោះអ្នកគ្រប់គ្នាទៅវិញ។ តែប្រសិនបើមានការរិះគន់ ក៏ចាប់ផ្តើមមានការពិភាក្សាគ្នា ហើយក៏ចាប់ផ្តើមមានការថ្លឹងថ្លែង ថាបែបនេះទើបត្រូវ ឬបែបនោះទើបល្អ ព្រោះទាល់តែមានការពិភាក្សា ទើបមានជាការផ្លាស់ប្តូរដូចគ្នាដែរ។
ជារួមក្នុងមួយរយៈចុងក្រោយនេះ គេសង្កេតឃើញថា ការយល់ដឹងរបស់យុវវ័យ ក៏ដូចជាស្ត្រី នៅក្នុងប្រទេសកម្ពុជា ទាក់ទងនឹងបញ្ហាសុខភាពបន្តពូជ ក៏ចាប់ផ្តើមមានការកើនឡើង។ ព្រោះមានមនុស្សជាច្រើនផ្សេងទៀត ចាប់ផ្តើមបើកចិត្ត និងលើកយកបញ្ហានេះ មកជជែកពិភាក្សាគ្នា ហើយវាក៏ចាប់ផ្តើម ក្លាយទៅជារឿងដែលធម្មតា ចាប់ផ្តើមបញ្ជ្រៀបចូលមក បន្តិចម្តងៗ។ ព្រោះមិនថាតែ អ្នកធ្វើវីដេអូអប់រំ ទាក់ទងនឹងបញ្ហាសុខភាពផ្លូវភេទនេះ មានការកើនឡើងប៉ុណ្ណោះទេ សូម្បីតែក្រសួងអប់រំ ក៏បានចាប់ផ្តើមបង្កើត កាលវិភាគសិក្សាជ្រៀបបញ្ចូលទាក់ទងនឹង សុខភាពបន្តពូជនេះ ទៅកាន់សិស្សានុសិស្ស ឲ្យបានយល់ដឹងច្រើនជាងមុន។
ងាកមកវិញបើនិយាយពី ការធ្វើវីដេអូអប់រំ ទាក់ទងនឹងបញ្ហាបន្តពូជនេះ កញ្ញា កាធឺរីន មិនត្រឹមតែមានការទទូលស្គាល់ តែពីសំណាក់សារព័ត៌មាន និងប្រជាពលរដ្ឋ នៅក្នុងស្រុក ប៉ុណ្ណោះទេ តែកញ្ញាក៏ធ្លាប់បាន សារព័ត៌មានបរទេស ធ្វើការចុះផ្សាយ។ បន្ថែមពីនេះ កន្លងមកកញ្ញាក៏ធ្លាប់ត្រូវបាន ខាងអង្គការយូនីស្កូ អញ្ជើញឲ្យទៅក្រៅប្រទេសចូលរួម សិក្ខារសាលាទាក់ទងនឹង សុខភាពបន្តពូជនៅប្រទេសទួកគីផងដែរ។
ជាចុងបញ្ចប់ កញ្ញា កាធឺរីន ក៏មានជាសារផ្តាំផ្ញើខ្លះៗ ទៅកាន់ប្រជាពលរដ្ឋខ្មែរ ថាបញ្ហាសុខភាពបន្តពូជនេះ គឺជាបញ្ហាដ៏សំខាន់ សម្រាប់យើងទាំងអស់គ្នា គួរតែមានការយល់ដឹង ក៏ដូចជាបើកនិយាយដោយបើកចំហរ។ ព្រោះប្រសិនបើយើង មិនលើកយកបញ្ហាទាំងនេះ យកមកពិភាក្សានិងចែករំលែកទេ នោះយុវវ័យគាត់មិនបានយល់ដឹង ហើយក៏មិនចេះ ការពារខ្លួនឯងដូចគ្នាដែរ៕