បុរសម្នាក់នេះ ផឹកស្រាជារៀងរាល់ថ្ងៃ រហូតដល់កើតជាដុំខ្លាញ់ជុំវិញបំពង់.ក

ចិន៖ បុរសម្នាក់មាននាមត្រកូលថា វ៉ាង វ័យ៦២ឆ្នាំ តែងតែមានទម្លាប់ផឹកស្រាជាប្រចាំ អស់​រយៈពេលជាង៤០ឆ្នាំកន្លងមកនេះ បានធ្វើឲ្យលោកមានដុំខ្លាញ់ជុំវិញបំពង់.ក ដែលសភាពហាក់ដូចជាសត្វដំរីទឹកអីចឹង។

យោងតាមសម្ដីរបស់វេជ្ជបណ្ឌិតម្នាក់ បានឲ្យដឹងថា លោក វ៉ាង គឺជាមនុស្សញៀននឹងគ្រឿងស្រវឹងដែលមានជាតិអាល់កុលខ្ពស់ៗ ហើយនេះជាហេតុ បណ្ដាលឲ្យលោកហើមជុំវិញបំពង់.ក ធំជាងធម្មតារហូតដល់ទៅពីរដង។

ទន្ទឹមនឹងនេះ លោក វ៉ាង ផ្ទាល់ បានបន្ថែមទៀតថា លោកបានផឹកស្រា បៃជូ ចំណុះប្រមាណ៣០០មីលីលីត្រ ជារៀងរាល់ថ្ងៃ ចាប់តាំងពីអាយុ១៨ឆ្នាំមកម៉្លេះ។ ហើយដំបូងឡើយ លោកមិនដែលបានចាប់អារម្មណ៍ពីដុំខ្លាញ់ជុំវិញបំពង់.កទេ លុះយូរៗទៅទើបលោកសង្កេតឃើញថា វាមានសភាពអាក្រក់យ៉ាងខ្លាំង។

ក្រោយពីមានការបង្អាប់ចំពោះដុំខ្លាញ់ជុំវិញបំពង់.កពីអ្នកជុំវិញខ្លួនមក លោកក៏បានសម្រេចចិត្តទៅកាន់មន្ទីរពេទ្យមួយកន្លែងក្នុងទីក្រុង Shenyang ភាគខាងជើងប្រទេសចិន កាលពីថ្ងៃអង្គារទី១៦ ខែមិថុនាកន្លងទៅនេះ។

ចំពោះស្រា បៃជូ ត្រូវបានគេស្គាល់ថាជាស្រា.ស ហើយវាជាប្រភេទស្រាធញ្ញជាតិរបស់ចិន ដែលមានថាមពលនៃជាតិអាល់កុលចំនួន៥២ភាគរយឯណោះ។

យ៉ាងណាមិញ បើតាមការបញ្ជាក់របស់វេជ្ជបណ្ឌិត បានដឹងថា ការកើតដុំខ្លាញ់នេះ គឺជាប្រភទជំងឺដ៏កម្រ ហើយលោក វ៉ាង នឹងត្រូវធ្វើការវះកាត់យកដុំខ្លាញ់នោះចេញក្នុងពេលឆាប់ៗផងដែរ៕

សូមទស្សនារូបភាពខាងក្រោម៖