ភ្នំពេញ៖ នៅព្រឹកថ្ងៃទី២៧ ខែមេសា ឆ្នាំ២០២០ នេះមានអាណាព្យាបាលសិស្ស នៃសាលាParagon International School ជាច្រើនបាននាំគ្នាផ្ទុះ ការតវ៉ាក៏ដូចជា បានដាក់ញ្ញាត្តិស្នាមមេដៃ សុំកុំឲ្យសាលាមានការតម្លើងថ្លៃ និងរកដំណោះស្រាយថ្មីមួយ ជូនដល់ពួកគាត់ ក្នុងអំឡុងពេលដែល ប្រទេសកំពុងជួបវិបត្តិវីរុសCOVID-19 នេះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សអាណាព្យាបាលសិស្សជាង៨០ភាគរយ នៃសាលាអន្តរជាតិParagon International Schoolបាននាំគ្នាផ្តិតមេដៃ លើក្រដាសស្នាម ដើម្បីធ្វើការតវ៉ាជាមួយនឹង ខាងសាលាក្នុងគោលបំណងធំៗ ចំនួន៤គឺ ៖
ទី១៖ ស្នើសុំកុំឲ្យសាលា តម្លើងថ្លៃសិក្សា៨ភាគរយ សម្រាប់ឆ្នាំ២០២០-២០២១ ចំពោះសិស្សគ្រប់កម្រិត
ទី២៖ បញ្ចុះថ្លៃសិក្សាចំនួន៣០ភាគរយ ក្នុងករណីសិក្សាតាមអនឡាញ
ទី៣៖ ពន្យាពេលបិទបញ្ចប់ការចុះឈ្មោះ ចូលសិក្សាសម្រាប់ឆ្នាំ២០២០-២០២១ រហូតដល់មាន ការប្រកាសពីរាជរដ្ឋាភិបាល ឬក្រសួងអប់រំ យុវជន និងកីឡា អំពីការចាប់ផ្តើមសាជាថ្មី កម្មវិធីសិក្សាតាមសាលា
ទី៤៖ ពង្រឹងគុណភាព ការសិក្សាតាមអនឡាញ។
ជាមួយគ្នានេះដែរ អាណាព្យាបាលម្នាក់ ដែលអ្នកស្រីក៏បានមកចូលរួម ក្នុងការតវ៉ានេះក៏បានលើកឡើងថា ក្នុងពេលបច្ចុប្បន្ន អ្នកស្រីមានកូនចំនួនពីរនាក់ នៅក្នុងបន្ទុកដែលកំពុងតែសិក្សា នៅក្នុងសាលាអន្តរជាតិមួយនេះ។ ក្នុងមួយឆ្នាំៗ អ្នកស្រីត្រូវចំណាយដល់ទៅជាង១០,០០០ដុល្លារ សម្រាប់ថ្លៃសាលារបស់កូនៗ។ ដូច្នេះអ្នកស្រីក៏សូមសំណូមពរឲ្យ ខាងសាលាមានការបញ្ចុះតម្លៃ តាមការរៀនអនឡាញ និងសូមកុំឲ្យសាលា មានការតម្លើងថ្លៃបន្ថែមទៀត ក្នុងឆ្នាំសិក្សាថ្មីនេះខណៈ ពេលដែលបច្ចុប្បន្ននេះ មានការជះឥទ្ធិពលអវិជ្ជមាន ដល់អាជីវកម្មខ្នាតធំ និងខ្នាតតូចគ្រប់ប្រភេទដោយសារ តែបរិបទវិបត្តិមេរោគCOVID-19 ។
គួរបញ្ជាក់ផងដែរថា ការតវ៉ាពីសំណាក់អាណាព្យាបាល មកលើសាលាParagon International School បានធ្វើឡើងចំនួន២លើកមកហើយ រួមទាំងលើកនេះ ហើយកន្លងមកក៏ធ្លាប់មាន ការចរចារគ្នាម្តងរួចមកហើយ រវាងតំណាងអាណាព្យាបាលសិស្សនិង ខាងសាលា តែល័ក្ខខណ្ឌមិនត្រូវរូវគ្នា ទើបបានជាខាង អាណាព្យាបាលសិស្ស សម្រេចមកតវ៉ា ជាលើកទី២ទៀត។ ហើយរហូតមកទល់ពេលនេះ ខាងសាលា និងខាងអាណាព្យាបាលសិស្ស ក៏នៅមិនទាន់មានដំណោះស្រាយ សមស្របណាមួយ ជាមួយគ្នានៅឡើយនោះដែរ៕