ក្ដៅៗ! ក្រុមស៊ើបការណ៍សម្ងាត់អាមេរិក បានរាយការណ៍ថា មេដឹកនាំកំពូលរបស់កូរ៉េខាងជើង កំពុងស្ថិតក្នុងស្ថានភាពគ្រោះថ្នាក់ បន្ទាប់ពីវះកាត់

អាមេរិក៖ អាមេរិកកំពុងតាមដានស៊ើបការណ៍សម្ងាត់មួយថា មេដឹកនាំកំពូលកូរ៉េខាងជើង លោក គីម ជុងអ៊ុន កំពុងស្ថិតក្នុងស្ថានភាពគ្រោះថ្នាក់ បន្ទាប់ពីវះកាត់ នេះបើយោងតាមមន្ត្រីអាមេរិក។

ថ្មីៗនេះ លោក គីម បានខកខានពិធីខួបកំណើតរបស់ជីតារបស់គាត់ នៅថ្ងៃទី១៥ ខែមេសា ដែលបានធ្វើឲ្យមានការសង្ស័យ អំពីសុខុមាលភាពរបស់គាត់។ គាត់ត្រូវបានគេឃើញបួនថ្ងៃមុនពិធីខួបកំណើត នៅក្នុងការប្រជុំរដ្ឋាភិបាល។

ក្រុមប្រឹក្សាសន្តិសុខជាតិនិងការិយាល័យនៃទីភ្នាក់ងារស៊ើបការណ៍សម្ងាត់ជាតិបានបដិសេធ មិនធ្វើអត្ថាធិប្បាយ នៅពេលដែលសារព័ត៌មាន CNN បានទាក់ទង កាលពីថ្ងៃចន្ទ។ ការប្រមូលព័ត៌មានស៊ើបការណ៍សម្ងាត់ចេញពីកូរ៉េខាងជើង គឺជាការលំបាកយ៉ាងខ្លាំង​​ ដែលជាគោលដៅមួយក្នុងចំណោមគោលដៅប្រឈមបំផុត សម្រាប់ភ្នាក់ងារស៊ើបការណ៍អាមេរិក។

កូរ៉េខាងជើងគ្រប់គ្រងយ៉ាងតឹងរឹង​ នូវព័ត៌មានណាមួយជុំវិញមេដឹកនាំរបស់ខ្លួន ដែលត្រូវបានគេចាត់ទុកថា ដូចជាអាទិទេពនៅក្នុងប្រទេស។ អវត្តមានរបស់លោកពីប្រព័ន្ធផ្សព្វផ្សាយរដ្ឋជាញឹកញាប់ បង្កឲ្យមានការសង្ស័យនិងពាក្យចចាមអារ៉ាម អំពីសុខភាពរបស់គាត់។

កូរ៉េខាងជើងមិនមានសារព័ត៌មានសេរីទេ ហើយច្រើនតែត្រូវបានគេនិយាយចំណុចមិនល្អ នៅពេលនិយាយដល់ថ្នាក់ដឹកនាំប្រទេស។ ក្រុមអ្នកវិភាគពឹងផ្អែកខ្លាំង លើការស្កេនបញ្ជូនប្រព័ន្ធផ្សព្វផ្សាយរដ្ឋ និងមើលវីដេអូឃោសនា សម្រាប់តម្រុយពីខាងក្រៅ។

លោក គីម បានបង្ហាញខ្លួនជាលើកចុងក្រោយ នៅក្នុងប្រព័ន្ធផ្សព្វផ្សាយរដ្ឋកូរ៉េខាងជើង​ នៅថ្ងៃទី១១​ ខែមេសា។ ថ្ងៃទី១៥ ខែមេសា ជាថ្ងៃឈប់សំរាកសំខាន់បំផុតរបស់កូរ៉េខាងជើង ដែលជាថ្ងៃខួបកំណើតរបស់លោក គីម អ៊ីលស៊ុង ប៉ុន្តែបែរជាមិនមានវត្តមានរបស់លោក គីម ជុងអ៊ុន៕