គិលានុបដ្ឋាយិកាម្នាក់នេះ សរសេរបណ្ដាំមរតកទុកឲ្យមិត្តប្រុសរួចជាស្រេច ដោយសារខ្លាចបាត់បង់ជីវិតពេលប្រយុទ្ធជាមួយនឹងវីរុសកូវីដ-១៩

អៀរឡង់៖ ថ្មីៗនេះ គិលានុបដ្ឋាយិកាដ៏វ័យក្មេងម្នាក់ឈ្មោះថា Kate O’Flaherty អាយុ២១ឆ្នាំ មកពីរដ្ឋធានី Dublin នៃសាធារណរដ្ឋអៀរឡង់ បានសរសេរបណ្ដាំមរតកទុកឲ្យមិត្តប្រុសជាទីស្រលាញ់របស់នាង។

នាង Kate បានសរសេរលិខិតបណ្ដាំមរតកនោះ រួចយកទៅទុកនៅក្នុងបន្ទប់ និងប្រាប់មិត្តប្រុសពីកន្លែងលាក់ទុក ក្នុងករណីណាមួយកើតឡើងចំពោះនាងពេលប្រយុទ្ធនៅសមរភូមិជួរមុខនៃវីរុសកូវីដ-១៩។

យ៉ាងណាមិញ នាង Kate ត្រូវរង់ចាំរហូតដល់រដ្ឋាភិបាលប្រកាសបើកប្រទេសឡើងវិញ ដើម្បីរកសាក្សីចំនួន២នាក់ចុះហត្ថលេខាទៅលើឯកសារឲ្យមានសុពលភាព។ ហើយចំពោះការធ្វើបណ្ដាំមរតកនេះដែរ ត្រូវបានធ្វើឡើង បន្ទាប់ពីក្រុមហ៊ុន Farewill ផ្ដល់ជូនដោយឥតគិតថ្លៃចំពោះបុគ្គលិកពេទ្យទាំងអស់ ដែលជាធម្មតាគិតថ្លៃសេវាចំនួនប្រមាណ១១០ដុល្លារអាមេរិក។

ជុំវិញរឿងរ៉ាវខាងលើនេះ មានអ្នកប្រើប្រាស់បណ្ដាញសង្គមមួយចំនួន បានចេញមុខផ្ដល់កម្លាំងចិត្តទៅកាន់នាង Kate ឲ្យខិតខំប្រឹងប្រែងធ្វើការ និងត្រូវតែជោគជ័យក្នុងការងារជាមួយនឹងសុខភាពដ៏ល្អផងដែរ៕

សូមទស្សនារូបភាពខាងក្រោម៖