ក្រុមអ្នកវិទ្យាសាស្ត្រ បង្ហាញពីមូលហេតុនៃការស្លាប់របស់ខ្មោច​មាំមីកាលពី​ជាង ២៦០០ ឆ្នាំមុន

បរទេស៖ យោងតាមការវិភាគថ្មីមួយរបស់ក្រុមអ្នកវិទ្យាសាស្ត្របានរកឃើញថា សាកសពរបស់ខ្មោចមាំមីស្ត្រីអេហ្ស៊ីបបុរាណដ៏ល្បីល្បាញ​ដែលមានឈ្មោះថា តាកាប៊ូទី  បានទទួលមរណភាពដោយ​សារការចាក់សម្លាប់ជាច្រើនកាំបិតពីខាងក្រោយខ្នង។

​សាកសពខ្មោចមាំមីដែលមានអាយុកាលជាង ២៦០០ ឆ្នាំនេះ ត្រូវបានវិភាគដោយអ្នកជំនាញមកពីសារមន្ទីរជាតិ NI សាកលវិទ្យាល័យស្រាវជ្រាវ​ Manchester សាកលវិទ្យាល័យស្រាវជ្រាវ ​Belfast និងមន្ទីរពេទ្យឯកជន Kingsbridge ។

​វេជ្ជបណ្ឌិត Robert Loynes ដែលបានធ្វើការស្កេន​សាកសពរបស់ខ្មោច​មាំមីបាននិយាយថា “ តាកាប៊ូទី បាន​រងរបួសយ៉ាងធ្ងន់ធ្ងរនៅផ្នែកខាងក្រោយ​ខ្នងក្រោមស្មាខាងឆ្មេងរបស់គាត់ ដែលបណ្តាលឱ្យគាត់ស្លាប់យ៉ាងឆាប់រហ័ស។​ ​ការសិក្សាមុនៗបានបង្ហាញថា បេះដូងរបស់តាកាប៊ូទីត្រូវបានបាត់ ប៉ុន្តែបើយោងតាមការស្កេន​បានបង្ហាញឱ្យឃើញថា សរីរាង្គនេះនៅដដែលនិងត្រូវបានថែរក្សាយ៉ាងល្អឥតខ្ចោះ។

ទន្ទឹមនឹងនេះ ក្រុមអ្នកស្រាវជ្រាវក៏មានការភ្ញាក់ផ្អើលផងដែរ ដោយបានរកឃើញថា តាកាប៊ូទី មានធ្មេញ​ច្រើនខុសពីមនុស្សធម្មតា ដែលវាជា​លក្ខខណ្ឌកម្រ ហើយអាចកើតឡើងក្នុង ០.០២% នៃចំនួនសរុបប៉ុណ្ណោះ។ ​ក្រុមអ្នកស្រាវ
ជ្រាវក៏បានរកឃើញទៀតថា តាកាប៊ូទី បានរស់នៅក្នុងទីក្រុង Thebes កាលពីជាង ២៦០០ ឆ្នាំមុន ហើយ​ត្រូវបានគេសម្លាប់នៅអាយុ ២០ ឆ្នាំ​។

សូមបញ្ជាក់ផងដែរថា សាកសពរបស់ តាកាប៊ូទី ត្រូវបានដាក់នៅក្នុងសារមន្ទីរជាតិតាំងពីឆ្នាំ ១៨៣៤ ហើយ​មួយឆ្នាំ​ក្រោយមកគឺនៅឆ្នាំ ១៨៣៥ គេបានធ្វើការបើកមឈូសដើម្បីសិក្សា និងវិភាគ​លើសាកសព៕