ត្រីចម្លែកមានរូបរាងស្រដៀងនឹងលិង្គ ត្រូវជីវវិទូប្រទះឃើញនៅឆ្នេរសមុទ្ររដ្ឋកាលីហ្វ័រញ៉ាយ៉ាងសន្ធឹកសន្ធាប់ ក្រោយពីមានព្យុះ

អាមេរិក៖ មានជីវវិទូម្នាក់ឈ្មោះថា Ivan Parr បានរកឃើញប្រភេទត្រីម៉្យាង ដែលមានរូបរាងប្លែកស្រដៀងទៅនឹងលិង្គមនុស្សប្រុស។ តាមការឲ្យដឹងពីសំណាក់ជីវវីទូខាងលើថា គាត់ប្រទះឃើញត្រីប្រភេទនេះរាប់ពាន់ក្បាលកាលពីថ្ងៃទី ៦ ខែធ្នូ កន្លងទៅ បន្ទាប់ពីមានព្យុះមួយបានវាយប្រហារតំបន់នោះដែលស្ថិតនៅឯឆ្នេរ Drakes Beach រដ្ឋកាលីហ្វ័រញ៉ា។ វាជាប្រភេទត្រីម៉្យាងដែលគេហៅថា ត្រីដង្កូវនាង មានទំហំ១០ អ៊ីញ មើលទៅស្រដៀងនឹងសាច់ក្រក និងមានរៀងជាអក្សរ U  ។

លោកបានបន្តថា វាជាប្រភេទត្រីសមុទ្រម៉្យាងដែលមានអាយុវែងរហូតទៅដល់ ២៥ ឆ្នាំ ហើយត្រីនេះជាត្រីដែលស៊ីបាក់តេរី ប្លង់តុង និងសត្វល្អិតតូចៗជាអាហារ ដោយការប្រើខ្លាញ់រំអិលរបស់វាជាសំណាញ់ចាប់យកអាហារ ប៉ុន្តែវាជាសត្វដែលគ្មានគ្រោះថ្នាក់ដល់មនុស្សទេ។

ហើយអ្វីដែលកាន់តែពិសេសនោះ គេក៏អាចយកវាចម្អិនជាអាហារដែលមានរសជាតិប្រៃ និងផ្អែមផងដែរ ហើយគេតែងតែបរិភោគវាជាមួយទឹកជ្រលក់ជូរអែម ធ្វើពីប្រេងល្ង និងអំបិល ឬជ្រលក់ជាមួយទឹកម្ទេសដែលលាយទឹកខ្មេះ រួមទាំងម្ទេសខាប់របស់កូរ៉េក៏បាន។

ទន្ទឹមនឹងនេះ ក៏មានការគំរាមកំហែងជាច្រើនពីសំណាក់អយស្ទ័រ, ត្រីឆ្លាម និងមនុស្ស លើវាផងដែរ។ សព្វថ្ងៃត្រីប្រភេទនេះជាត្រីប្រភេទកម្រមួយ ដែលគេឃើញមាននៅតែសហរដ្ឋអាមេរិក កូរ៉េខាងត្បូង និងចិនប៉ុណ្ណោះ៕