ខេត្តឧត្តរមានជ័យ ៖ ព្រោះតែរងារខ្លាំងពេក ទាំងពីនាក់ប្តីប្រពន្ធក៏នាំគ្នាបង្កាត់ភ្នក់ភ្លើង ដើម្បីដេកឆ្អើរ លុះលង់លក់ ស្រាប់តែភ្លើងរាលដាលឆាបឆេះផ្ទះអស់ទាំងស្រុងកាលពីវេលាម៉ោង៤និង២០នាទីទៀបភ្លឺថ្ងៃទី៦ ធ្នូ ឆ្នាំ២០១៩ នៅក្នុងភូមិក្រសាំង សង្កាត់បុស្បូវ ក្រុងសំរោង ខេត្តឧត្តរមានជ័យ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
គ្រួសាររងគ្រោះដោយសារអគ្គីភ័យឆាបឆេះផ្ទះខាងលើ ប្តីឈ្មោះព្រឿយ ជួន អាយុ២៤ឆ្នាំ ចំណែកប្រពន្ធឈ្មោះម៉ន សុផា អាយុ២២ឆ្នាំ មានកូនប្រុសម្នាក់ទើបមានអាយុ៣ខែ និងរស់នៅក្នុងភូមិសង្កាត់កើតហេតុខាងលើ ។
តាមប្រភពពីប្តីប្រពន្ធរងគ្រោះខាងលើបានបញ្ជាក់ថា ផ្ទះកើតហេតុខាងលើជាប្រភេទផ្ទះតៀម មានទំហំ៤,៥០ម៉ែត្រគុណនឹង៨ម៉ែត្រ ដំបូលប្រក់ស័ង្កសី និងជញ្ជាំងក្តារ ។
តាមប្រភពដដែលបានឱ្យដឹងថា មុនពេលកើតហេតុ ពួកគាត់ទាំងពីរនាក់ប្តីប្រពន្ធរងារខ្លាំងពេក ក៏នាំគ្នាបង្កាត់ភ្នក់ភ្លើង និងដេកឆ្អើរ ហើយក៏លង់លក់ទាំងពីនាក់ ស្រាប់តែភ្លើងបាន រាលដាលឆាបឆេះផ្ទះយ៉ាងសន្ធោសន្ធៅ តែសំណាងល្អគាត់នាំប្រពន្ធនិងកូនរត់ចេញផុតពីគ្រោះថ្នាក់។
តាមប្រភពពីប៉ូលិសរដ្ឋបាលសង្កាត់បុស្បូវបានឱ្យដឹងថា ពេលមានអគ្គីភ័យកើតឡើង ម្ចាស់ផ្ទះទាំងពីរនាក់ប្តីប្រពន្ធបានស្រែកឱ្យអ្នកភូមិជិតខាង និសមត្ថកិច្ចជួយពន្លត់ដែរ ប៉ុន្តែមិនអាចជួយពន្លត់បានទាន់ពេលវេលានោះទេ ដោយសារតែមានខ្យល់បក់បោកយ៉ាងខ្លាំងហើយភ្លើងក៏ឆាបឆេះផ្ទះមួយខ្នងនេះអស់ទាំងស្រុង៕
ប្រភព៖ កោះសន្តិភាព
Bong I.T