ការសន្និដ្ឋានថ្មីរបស់ណាសាបង្ហាញពីមូលហេតុនៃការហួតទឹកនៅភពអង្គារ

បរទេស៖ កន្លងទៅអង្គការណាសាធ្លាប់គិតថាការរីងទឹកនៅលើភពអង្គារប្រហែលជាមកពីព្យុះធូលីយក្សដ៏ខ្លាំងមហិមាបានគួចយកទឹកដែលមាននៅលើផ្ទៃនៃភពទៅកាន់លំហ។ កាលពីពេលថ្មីៗនេះអង្គការណាសាបានធ្វើការសន្និដ្ឋានជាថ្មីថាពពកធូលីដែលកើតមានបន្ទាប់ពីព្យុះធូលីនេះទេទើបជាដើមហេតុនៃការហួតទឹកនៅលើភពអង្គារ នេះបើយោងតាមការស្រាវជ្រាវថ្មីរបស់អង្គការណាសា។ កាលពីឆ្នាំមុនផ្កាយរណបរបស់ណាសាដែលមានឈ្មោះថា Mars Reconnaissance Orbiter ថតបានទិដ្ឋភាពព្យុះធំមួយគ្របដណ្ដប់ពេញភពអង្គារ​ ហើយក្រុមអ្នកវិទ្យាសាស្ត្រកំពុងសិក្សាពីដំណើរការរបស់ខ្យល់ព្យុះមួយនោះ។

នៅពេលនោះដែរក្រុមអ្នកវិទ្យាសាស្ត្របានអង្កេតនិងសិក្សាពីព្យុះនោះអស់ជាច្រើនសប្ដាហ៍ ហើយវាមានសណ្ឋានស្រដៀងព្យុះផ្គររន្ទះនៅលើផែនដីដែរ។ បន្ទាប់ពីមានព្យុះធូលីកើតមានពេញលើភពអង្គារមក ពពកធូលីក៏ចាប់ផ្ដើមកកើតឡើងហើយវាអាចស្រូបទាញទឹកឲ្យហួតទៅលើអាកាសបាន។ ពពកធូលីអាចមានសកម្មភាពជាច្រើនសប្ដាហ៍ ហើយទំហំរបស់វាអាចរីកកាន់តែធំរហូតដល់ប្រវែង ៧៨៩គីឡូម៉ែត្រ៕