Man UTD សម្លឹងឃើញអតីតខ្សែប្រយុទ្ធជួរមុខម្នាក់របស់ Man City នៅទីផ្សារខែមករា

អង់គ្លេស៖ Manchester United ត្រូវបានគេរាយការណ៍មកថាបានចាប់អារម្មណ៍ទៅលើខ្សែប្រយុទ្ធរបស់ Roma កីឡាករ Edin Dezko ក្នុងការនាំយកមកលេងនៅកីឡដ្ឋាន Old Trafford សម្រាប់ទីផ្សារដោះដូរកីឡាករខែមករាខាងមុខ។

ក្រោយមិនអាចស្វែងរកអ្នកមកជំនួសតំណែងរបស់ Alexis Sanchez និង Romelu Lukaku នៅទីផ្សាររដូវក្ដៅកន្លងទៅ អ្នកចាត់ការទូទៅរបស់ Man UTD លោក Ole Gunnar Solskjaer កំពុងបន្តស្វែងរកកីឡាករមកពង្រឹងបន្ថែមនូវតំបន់ប្រយុទ្ធ។

បើតាមការចុះផ្សាយរបស់សារព័ត៌មាន ESPN ក្លិបបិសាចក្រហមបានដាក់ការចង់បានទៅលើអតីតខ្សែប្រយុទ្ធរបស់ Manchester City ដែលបច្ចុប្បន្នកំពុងតែលេងឲ្យក្លិបនៅអ៊ីតាលី​ Roma។

តាមពិតទៅក្រៅពី Dzeko នៅមានខ្សែប្រយុទ្ធលេងនៅអ៊ីតាលីម្នាក់ទៀតដែល Man UTD ចាប់អារម្មណ៍គឺកីឡាករ Mario Mandzukic ប៉ុន្តែបើតាមប្រភពដដែលបានឲ្យដឹងថា Dzeko មានភាគរយខ្ពស់ជាង Mandzukic ក្នុងការផ្លាស់មកលេងនៅទឹកដីអង់គ្លេស។

ជាមួយ Roma រដូវកាលនេះខ្សែប្រយុទ្ធជម្រើសជាតិបូសនី Dzeko ចូលលេងឲ្យ Roma បាន១៥ប្រកួត រកគ្រាប់បាល់បាន៦គ្រាប់ និងបញ្ជូនបាល់ឲ្យមិត្តរួមក្រុមបញ្ចប់ទីបានសម្រេចចំនួន២ដង៕

ប្រភព៖ SportsMole