ខេត្តស្ទឹងត្រែង ៖ កម្លាំងមានសមត្ថកិច្ចនៅមិនទាន់ស្វែងរកការចាប់ខ្លួនជនសង្ស័យ ជាខ្មាន់កាំភ្លើងលបបាញ់អ្នកនេសាទក្នុងម្នាក់ធ្លាយភ្លៅពីម្ខាងទៅម្ខាងបាននៅឡើយទេ គិតត្រឹមថ្ងៃទី១៩ វិច្ឆិកា នេះ ខណៈជនរងគ្រោះក៏កំពុងស្ថិតនៅលើគ្រែក្នុងមន្ទីរពេទ្យបង្អែកខេត្តដែរ ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សគួររំលឹកថា ជនរងគ្រោះត្រូវគេបញ្ជាក់ថា មានគ្នាពីរនាក់នៅមុនកើតហេតុ ពួកគេបានចុះទូកទៅរាយសន្ទូចចាប់ត្រី ក្រោយមកនៅវេលារំលងអធ្រាត្រឈានចូលថ្ងៃទី១៧ វិច្ឆិកា ស្ថិតនៅលើផ្ទៃទឹកទន្លេត្រង់ចំណុចភូមិអូរម្រះ ឃុំអូរម្រះ ស្រុកសៀមបូក ខណៈដែលជនរងគ្រោះកំពុងនៅលើទូកស្រាប់មានជនសង្ស័យចំនួនពីរនាក់មិនស្គាល់មុខជិះទូកស្មាច់មួយគ្រឿង តម្រង់មកទូកជនរងគ្រោះរួចផ្ទុះអាវុធមួយគ្រាប់បណ្តាលឱ្យជនរងគ្រោះម្នាក់របួសធ្លាយភ្លៅពីម្ខាងទៅម្ខាង ។
ប្រភពបន្តថា ក្រោយធ្វើសកម្មភាពផ្ទុះអាវុធនោះ ក្រុមជនសង្ស័យបើកទូករត់គេចខ្លួន ចំណែកជនរងគ្រោះត្រូវបានក្រុមគ្រួសារដឹកទៅសង្គ្រោះនៅមន្ទីរពេទ្យបង្អែកខេត្ត។ យោងតាមប្រភពពីស្រី្តជាប្រពន្ធជនរងគ្រោះឈ្មោះឈន គន្ធា បានរៀបរាប់ថា ប្តីគាត់មានឈ្មោះ តែ ថ្នាំ ភេទប្រុស អាយុ៣៤ឆ្នាំ មានទីលំនៅភូមិកោះជ្រឹម ស្រុកសៀមបូក ខេត្តស្ទឹងត្រែង។
គាត់បន្តថា នៅយប់កើតហេតុ ប្តីគាត់បានទៅដាក់សន្ទូចនៅចំណុចកើតហេតុខាងលើ ក៏មានទូកស្មាច់មួយគ្រឿងមានគ្នាពីរនាក់ជិះមកជិតប្រហែល១០ម៉ែត្រ ហើយក៏បានប្រើអាវុធមិនដឹងម៉ាកបាញ់មកលើប្ដីគាត់តែម្តង ។ ស្ត្រីជាប្រពន្ធជនរងគ្រោះថា រហូតមកដល់ថ្ងៃទី១៩ វិច្ឆិកា នេះ ដោយជាប់រវល់មើលប្ដីរបស់គាត់គាត់មិនទាន់បានដាក់ពាក្យបណ្ដឹងនៅឡើយទេ។ ចំណែកជនសង្ស័យដែលបាញ់ប្រហារមកលើប្ដីគាត់មិនត្រូវបានស្គាល់អត្តសញ្ញាណដែរ ក្រោយបាញ់រួចពួកគេបើកទូករត់គេចបាត់ស្រមោលតែម្ដង។
មេប៉ុស្តិ៍រដ្ឋបាលកោះជ្រឹម លោក ឆា រ័ត្ម ឱ្យដឹងថា លោកមិនបានទទួលពាក្យបណ្ដឹងនោះទេ ទើបនឹងទទួលដំណឹងពិតជាមានការបាញ់ពិតប្រាកដមែន។ ពេលនេះលោកកំពុងតែឲ្យកម្លាំងរបស់លោកចុះទៅធ្វើកំណត់ហេតុជាមួយជនរងគ្រោះ ដើម្បីស្រាវជ្រាវក្នុងករណីបាញ់ខាងលើនេះ ។ លោកមេប៉ុស្តិ៍បន្តបញ្ជាក់ថា បើតាមការសន្និដ្ឋានការបាញ់នេះ មិនមែនជាអាវុធធុនទំនើបទេ សង្ស័យជាកាំភ្លើងកែច្នៃ ។
ប្រភព៖ កោះសន្តិភាព