ខេត្តកំពត ៖ តាមសេចក្តីរាយការណ៍បឋមបានឱ្យដឹងថា កាលពីវេលាម៉ោង៣ទាបភ្លឺថ្ងៃទី១៩ ខែសីហា ឆ្នាំ២០១៩ មានករណីគ្រោះថ្នាក់ចរាចរណ៍មួយកើតឡើងរវាងរថយន្តដឹកស៊ីម៉ង់ត៍បុកជាមួយរថយន្តដែលជិះដោយមន្ត្រីអន្តោប្រវេសន៍ចំនួន៥នាក់បណ្តាលឱ្យស្លាប់បាត់បង់ជីវិត៤នាក់ ដែលហេតុការណ៍អកុសលនេះបានកើតឡើងលើផ្លូវជាតិលេខ៣៣ ស្ថិតក្នុងភូមិត្រពាំងធំ ឃុំជុំគ្រៀល ស្រុកទឹកឈូ ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សតាមប្រភពបានឱ្យដឹងថាជនរងគ្រោះទី១-ឈ្មោះ ងួន សារ៉ាត់ អាយុ៣៤ឆ្នាំ មុខរបរបម្រើការងារនៅព្រែកចាក (អ្នកបើកបរ) ស្លាប់ពេលបញ្ជូនទៅមន្ទីរពេទ្យ, ទី២-ឈ្មោះ ញឹប ភីរក្ស ឋានន្ដរស័ក្ដិថ្នាក់វរសេនីយ៍ឯក, ទី៣-ឈ្មោះ តាន់ ផេង អាយុ៣៧ឆ្នាំ ឋានន្ដរស័ក្ដិវីរសេនីយទោ, ទី៤-ឈ្មោះ ឃី ឡុក អាយុ៤០ឆ្នាំ ឋានន្ដរស័ក្ដិ វីរសេនីយទោ អ្នកទាំងបីស្លាប់នៅក្នុងរថយន្ដតែម្ដង និងទី៥-ឈ្មោះ ថៃ វីរ អាយុ៣៥ឆ្នាំ ឋានន្ដរស័ក្ដិអនុសេនីយ៍ឯក រងរបួសស្រាលបញ្ជូនទៅមន្ទីរពេទ្យបង្អែកខេត្តកំពត ។ ដោយឡែកអ្នកបើកបររថយន្ដដឹកស៊ីម៉ង់ត៍បានរត់គេចខ្លួនបាត់ពីកន្លែងកើតហេតុ ។
តាមប្រភពបានឱ្យដឹងទៀតថា រថយន្តទាំងពីរគ្រឿងនោះបានបើកបរក្នុងទិសដៅស្របគ្នា ហើយរថយន្តដែលជិះដោយមន្ត្រីអន្តោប្រវេសន៍នោះម៉ាក Highlander ពណ៌ស្ករ ពាក់ផ្លាកលេខ ភ្នំពេញ 2Z-0241 លុះមកដល់ចំណុចកើតហេតុបានបុកនឹងរថយន្តដឹកស៊ីម៉ង់ត៍ដែលពាក់ផ្លាកលេខ ព្រះសីហនុ 3A-1861 ពីក្រោយតែម្តង បណ្ដាលឲ្យមន្ដ្រីនគរបាលអន្ដោប្រវេសន៍៤នាក់ស្លាប់បាត់បង់ជីវិត ។ ព័ត៌មានលម្អិតនឹងផ្សាយជូនលើកាសែតកោះសន្តិភាព ៕
ប្រភព៖ កោះសន្តិភាព