ខេត្តកំពង់ឆ្នាំង ៖ ដោយសារភ្លើងប្រចណ្ឌគួបផ្សំនឹងផឹកស្រវឹងរាល់ថ្ងៃផងនោះ បុរសជាប្តីបានយកពូថៅវាយទៅលើប្រពន្ធ បណ្ដាលឲ្យស្លាប់យ៉ាងអាណោចអាធ័មនៅនឹងកន្លែង ចំណែកឯកូនប្រុសម្នាក់អាយុ៩ឆ្នាំរងរបួសជាទម្ងន់ និងកូនៗ៣នាក់ទៀតបានរត់រួច ។ អំពើហិង្សានេះបានកើតឡើងនៅម៉ោង៧យប់ ថ្ងៃទី២១ ខែមេសា ឆ្នាំ២០១៩ ស្ថិតនៅក្នុងភូមិអណ្ដូងរវាង ឃុំអញ្ចាញរូង ស្រុកបរិបូណ៌ ។
សមត្ថកិច្ចនគរបាលមូលដ្ឋានបានប្រាប់ព័ត៌មានជាបឋមថា ជនដៃដល់ជាប្តីឈ្មោះ តូច ញ៉ន អាយុ៤១ឆ្នាំ មានទីលំនៅភូមិ-ឃុំខាងលើ ចំណែកស្ត្រីជាប្រពន្ធឈ្មោះ សួន ធីម អាយុ៤៦ឆ្នាំ បានស្លាប់នៅនឹងកន្លែងកើតហេតុ ចំណែកឯកូនប្រុសឈ្មោះ ញិប សុគុណ អាយុ៩ឆ្នាំ បានរងរបួសធ្ងន់ ។
ប្រភពដដែលបានបន្តថា មុនពេលកើតហេតុ ក្រោយពីផឹកស្រាស្រវឹងបុរសជាប្ដីបានទៅរករឿងប្រពន្ធ ហើយក៏បានទាញពូថៅវាយប្រពន្ធពីខាងខ្នងពូថៅជាច្រើនពូថៅ បណ្តាលឲ្យស្ត្រីជាប្រពន្ធស្លាប់ភ្លាមៗនៅនឹងកន្លែង រួចបុរសជាប្តីក៏ស្ទុះវាយកូនប្រុសអាយុ៩ឆ្នាំដែលរត់មិនរួច បណ្តាលឱ្យរងរបួសធ្ងន់ ហើយត្រូវបានដឹកទៅសង្គ្រោះនៅឯមន្ទីរពេទ្យ ចំណែកឯកូនៗ៣នាក់ទៀតបានរត់គេចខ្លួនរួច ។
ក្រោយពេលកើតហេតុ បុរសជាជនដៃដល់ត្រូវបានសមត្ថកិច្ចចាប់ខ្លួន និងបញ្ជូនមកកាន់ស្នងការនគរបាលខេត្តកំពង់ឆ្នាំងទាំងយប់ ដើម្បីផ្ដន្ទាទោសតាមច្បាប់៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
