ខេត្តសៀមរាប ៖ ផ្ទះ២នាក់បងប្អូនបង្កើតនៅជាប់គ្នាកំពុងរកស៊ីរកនៅផ្សារលើធំថ្មីបានចាក់សោរចោល ស្រាប់តែត្រូវអគ្គិភ័យឆេះអស់គ្មានសល់ បង្កឱ្យមានការភ្ញាក់ផ្អើលពេញភូមិ ជាពិសេសអ្នកជិតខាងនាំគ្នាយកឥវ៉ាន់ចេញពីផ្ទះញាប់ដៃញាប់ជើង។ ហេតុការណ៍អគ្គិភ័យកើតឡើងកាលពីម៉ោង១និង១៥នាទីរសៀល ថ្ងៃទី១៧ ខែមេសា ឆ្នាំ២០១៩ ស្ថិតនៅចំណុចក្នុងភូមិតាវៀន សង្កាត់សាលាកំរើក ក្រុង/ខេត្តសៀមរាប។
តាមប្រភពពីអ្នកជិតខាងរៀបរាប់ទាំងភ័យញ័រថា មុនពេលកើតហេតុ បានឃើញអណ្តាតភ្លើងចេញពីផ្ទះខាងកើត ស្រាប់តែគាត់នាំគ្នាទៅអើតមើលពុំឃើញមានម្ចាស់ផ្ទះ ខណៈពេលនោះគាត់ក៏រាយការណ៍មកមេភូមិតាវៀន ដើម្បីឱ្យជួយហៅរថយន្តពន្លត់អគ្គិភ័យមកជួយអន្តរាគមន៍។ បន្ទាប់ពីរាយការណ៍បានមួយសន្ទុះក៏ឃើញរថយន្តរបស់ស្នងការខេត្តមកដល់បន្តបន្ទាប់គ្នាចំនួន៤ឡាន រួចក៏ជួយបាញ់ពន្លត់ភ្លាមៗផងដែរ។
លោកវរសេនីយ៍ទោ អ៊ុន ភិរម្យ នាយរងការិយាល័យបង្កាពន្លត់អគ្គីភ័យនិងសង្គ្រោះបានប្រាប់ថា មុនកើតហេតុ មានសមរកិច្ចមូលដ្ឋានបានរាយណ៍មកថា មានករណីភ្លើងឆេះផ្ទះប្រជាពលរដ្ឋនៅក្នុងភូមិតាវៀន ខណៈនោះលោកក៏សុំយោបល់ពីលោកស្នងការរងទទួលផែនការិយាល័យបង្កាពន្លត់អគ្គីភ័យនិងសង្គ្រោះ ដើម្បីដឹកនាំកម្លាំងយករថយន្តពន្លត់អគ្គិភ័យទៅជួយអន្តរាគមន៍បាញ់ពន្លត់។
លោកបានបញ្ជាក់ថា ការចុះអន្តរាគមន៍ជួយបាញ់ទឹកពន្លត់នោះមានរថយន្ត៤គ្រឿង ក្នុងនោះរថយន្តពន្លត់អគ្គីភ័យរបស់ស្នងការខេត្ត២គ្រឿង បាញ់ទឹកអស់ទាំង២គ្រឿង និងរថយន្តពន្លត់អគ្គីភ័យរបស់កងរាជអាវុធហត្ថខេត្ត២គ្រឿងបាញ់ទឹកអស់ទាំង២គ្រឿង ទើបអាចទប់ទល់ស្ថានភាពបានដោយជោគជ័យ។
លោកបានបញ្ជាក់ទៀតថា ម្ចាស់ផ្ទះទាំង២គ្រួសារបងប្អូនបង្កើតនោះមាន គ្រួសារទី១ មានប្តីឈ្មោះ ឆោម វណ្ឌី អាយុ៣២ឆ្នាំ មុខរបរកម្មករដាក់សំបុត្រម៉ូតូនៅផ្សារលើធំថ្មី និងប្រពន្ធឈ្មោះ ឡាន់ ស្រីឡុង អាយុ២៧ឆ្នាំ មុខរបរលក់ដូរនៅផ្សារលើធំថ្មី (ផ្ទះនៅជាប់គ្នាពីខាងលិច) ប្រក់សង្ក័សីជញ្ជាំងដែកគ្រោងដែក។ គ្រួសារទី២ ប្តីឈ្មោះ រ៉េត ណុយ អាយុ៣១ឆ្នាំ មុខរបរកម្មករដាក់សំបុត្រម៉ូតូនៅផ្សារលើធំថ្មី និង ប្រពន្ធឈ្មោះ ណុក ណៃ អាយុ៣០ឆ្នាំ មុខរបរធ្វើក្រចកនៅផ្សារលើធំថ្មី ផ្ទះពីខាងកើត ប្រក់សង្ក័សីជញ្ជាំងដែក គ្រោងដែក។ ផ្ទះទាំង២គ្រួសារនោះ មានទីលំនៅភូមិតាវៀន សង្កាត់សាលាកំរើក ក្រុងសៀមរាប ផ្ទះនៅជាប់គ្នា។
លោកបន្តថា ចំពោះមូលហេតុ គឺបណ្តាលមកទុស្សេខ្សែភ្លើង ព្រោះម្ចាស់ផ្ទះកំពុងទៅរកស៊ីនៅផ្សារលើធំថ្មី ហើយធ្វើឱ្យខូចខាតអស់ផ្ទះទាំង២ល្វែង ព្រមទាំងទ្រព្យសម្បត្តិនៅក្នុងផ្ទះឆេះអស់ទាំងស្រុង។ បច្ចុប្បន្នផ្ទះ២នាក់បងប្អូនបង្កើតត្រូវបានអគ្គីភ័យឆេះអស់ទាំងស្រុង ខណៈម្ចាស់រវល់ទៅរកស៊ីនៅក្នុងផ្សារ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
