រាជធានីភ្នំពេញ ៖ បុរសជាងទងម្នាក់ដែលមានប្រពន្ធនិងកូនមួយទៅហើយ បានលួចមានស្រីកំណាន់រហូតមានផ្ទៃពោះ២ខែ ដោយសារតែភ្លើងប្រចណ្ឌបានយកខ្សែភ្លើងឆក់នាងរហូតដល់ស្លាប់ រួចយកកាំបិតបុ័ងតោអារ.កថែមខ្លាចមិនស្លាប់ ។
បន្ទាប់មក យកក្រមាចងភ្ជាប់ទៅនិងដែកមេដំបូលបន្ទប់ជួល ចងកសម្លាប់ខ្លួនឯងតាមក្រោយ ។ ហេតុការណ៍នេះ បង្កឲ្យមានការភ្ញាក់ផ្អើលកាលពីវេលាម៉ោង១០និង៣០នាទី យប់ថ្ងៃទី៦ មេសា ឆ្នាំ២០១៩ នៅត្រង់ចំណុចបន្ទប់ជួលលេខស៊ី១៣ ក្រុម១ ភូមិទួលសង្កែសង្កាត់ទួលសង្កែ១ ខណ្ឌឬស្សីកែវ ។
បុរសដែលចងកធ្វើអត្តឃាតសម្លាប់ខ្លួនឯង ក្រោយសម្លាប់ស្ត្រីកំណាន់ឈ្មោះទុយ រ៉ាន អាយុ៣៩ឆ្នាំ ជាជាងទង (ជាងមាស) មានប្រពន្ធកូនប្រុសម្នាក់ អាយុប្រមាណ១០ឆ្នាំ ស្នាក់នៅផ្ទះលេខ១០៥ ផ្លូវលេខ១១០ សង្កាត់ផ្សារចាស់ ខណ្ឌដូនពេញ ជិះរថយន្តមួយគ្រឿងម៉ាកឡិចស៊ីស RX330 បិទតែម350 ពណ៌ទឹកប្រាក់ ពាក់ស្លាកលេខភ្នំពេញ 2AJ-4378។
ចំណែកស្រីកំណាន់ ដែលបុរសខាងលើសម្លាប់នោះ ឈ្មោះណុង ស្រីមុំ អាយុ២៣ឆ្នាំ មុខរបរនៅផ្ទះ មានផ្ទៃពោះ២ខែ និងមានកូនស្រីម្នាក់ជាមួយប្តីដើមអាយុ៣ឆ្នាំ រស់នៅជាមួយស្នាក់នៅបន្ទប់ជួលកន្លែងកើតហេតុ មានស្រុកកំណើតនៅភូមិជំនុំពល ឃុំជាំតាម៉ៅ ស្រុកមេម៉ត់ខេត្តត្បូងឃ្មុំ ។
តាមប្រភពព័ត៌មានពីកន្លែងកើតហេតុបានឲ្យដឹងថា ស្ត្រីរងគ្រោះបន្ទាប់ពីប្តីដើមរបស់នាងត្រូវជាប់ពន្ធនាគារចំនួន២ឆ្នាំ អត់មានលុយចិញ្ចឹមកូន និងបង់លុយថ្លៃផ្ទះជួល ក៏បានចេញទៅធ្វើការនៅក្នុងខារ៉ាអូខេយីហោស្ពានមាស ដែលមានទីតាំងតាមបណ្តោយផ្លូវជាតិលេខ៥ ក្នុងសង្កាត់ស្រះចក ខណ្ឌដូនពេញ ទើបបានស្គាល់គ្នា ជាមួយជាងទងឈ្មោះ ទុយ រ៉ាន ក្នុងអំឡុងខែវិច្ឆិកា ឆ្នាំ២០១៨ ។
ប្រភពព័ត៌មានបានបន្តទៀតថា បន្ទាប់ពីស្គាល់គ្នា បុរសជាងទងបានឲ្យនាងឈប់បំរើការងារខារ៉ាអូខេនៅទីនោះហើយដោយជួលបន្ទប់រស់នៅជាមួយគ្នា ដូចជាប្តីប្រពន្ធ មិនបានរៀបការឬសែនព្រេននោះទេ ។
តាំងពីរស់នៅជាមួយគ្នាជាប្តីប្រពន្ធឥតខាន់ស្លានេះមក បុរសនោះមិនសូវទៅរួមរស់ជាមួយប្រពន្ធដើមទេ យូរៗទៅម្តងដោយរស់នៅជាមួយនាងជាស្រីកំណាន់ច្រើនជាងប្រពន្ធដើម ហើយតែងតែប្រចណ្ឌនាងរក រឿងឈ្លោះប្រកែកគ្នាជាញឹកញាប់ផងដែរ ព្រោះតែបុរសនោះស្រលាញ់នាងខ្លាំងពេក ស្រឡាញ់ណាស់ចាក់ទឹកមិនលិច ។
ប្រភពព័ត៌មានឲ្យដឹងទៀតថា បុរសជាប្តីដើមរបស់ស្ត្រីរងគ្រោះនៅសល់តែ៤ទៅ៥ខែទៀតនឹងត្រូវចេញពីពន្ធធនាគារហើយ ចំណែកបុរសជាឃាតករក៏បានដឹងរឿងនេះដែរ ហើយធ្លាប់ប្រាប់ស្ត្រីរងគ្រោះថា បើប្តីចេញពីពន្ធនាគារវិញរូបគេនិងចេញលុយឲ្យប្តីដើមឲ្យដាច់គ្នាដើម្បីយកនាងធ្វើជាប្តីប្រពន្ធពេញមុខតែម្តង ព្រោះស្រឡាញ់ខ្លាំងណាស់ អត់នាងមិនបានឡើយ ។
ប្រភពបានបន្តទៀតថា នៅមុនពេលកើតហេតុ ពួកគេទាំង២នាក់បានឈ្លោះប្រកែកគ្នាខ្លាំងណាស់ រហូតផ្អើលអ្នកជិតខាង ។ ចំពោះមូលហេតុដែលឈ្លោះប្រកែកគ្នានេះ សង្ស័យបុរសជាឃាតករប្រចណ្ឌរឿងប្តីជិតចេញពីពន្ធនាគារនេះ ។ បន្ទាប់មកពួកគេទាំង២នាក់ ក៏បានចូលក្នុងបន្ទប់ជួលវិញរួចបិទទ្វារជិត តែមិនបានចាក់គន្លឹះទេ ហើយកូនស្រីអាយុ៣ឆ្នាំ ដោយឃើញម្តាយឈ្លោះគ្នា បានរត់ទៅលេងផ្ទះអ្នកជិតខាង ខណៈពេលឮសូរសំឡេងអ្នកទាំង២នាក់ឈ្មោះប្រកែកគ្នាខ្លាំងៗនោះ ។ លុះមួយសន្ទុះក្រោយមកក៏ស្ងាត់ទៅវិញ ។
ស្របពេលនោះ កូនស្រីអាយុ៣ឆ្នាំបានត្រឡប់មកពីលេងផ្ទះអ្នកជិតខាងវិញ បានរុញទ្វារចូលក៏ឃើញបុរសជាប្តីកំពុងអារកម្តាយជិតដាច់ និងឃើញបុរសជាឃាតករដេកអោបសពម្តាយ នាងតូចក៏រត់ចេញក្រៅវិញទៅស្រែកប្រាប់អ្នកជិតខាងឲ្យមកជួយ។ ភ្លាមៗនោះ អ្នកជិតខាងមានការភ្ញាក់ផ្អើលបាននាំគ្នាមកមើល ត្រូវបុរសជាឃាតករបានងើប ស្ទុះមកចាក់គន្លឹះទ្វារបន្ទប់ជាប់អត់ឱ្យអ្នកណាចូលទេ និងយកក្រមាចងភ្ជាប់ទៅនិងមេដំបូលដែកបន្ទប់ជួលចងកសម្លាប់ខ្លួនឯងព្យួរស្តោកតែម្តង ។
ក្រោយកើតហេតុ សមត្ថកិច្ចមូលដ្ឋានបានរាយការណ៍បន្តទៅខាងជំនាញកោសល្យវិច័យមកធ្វើការត្រួតពិនិត្យទើបដឹងថា ជាករណីសម្លាប់ស្រីកំណាន់ហើយចងកសម្លាប់ខ្លួនឯងពិតប្រាកដមែន ។ ចំពោះស្ត្រីដែលស្លាប់ គឺដោយសារបុរសជាឃាតករបានយកខ្សែភ្លើងឆក់នាងរហូតដល់ស្លាប់ រួចយកកាំបិតបុ័ងតោអារកថែមទៀត រួចហើយទើបយកក្រមាចងកសម្លាប់ខ្លួនឯងតាមក្រោយ ។
បន្ទាប់ពីសមត្ថកិច្ចជំនាញបានធ្វើការត្រួតពិនិត្យសាកសពរួចរាល់ ក៏បានប្រគល់សពស្ត្រីរងគ្រោះឲ្យក្រុមគ្រួសារយកទៅធ្វើបុណ្យនៅខេត្តត្បូងឃ្មុំ ។ ចំណែកសពបុរសជាឃាតករប្រគល់ឱ្យប្រពន្ធយកទៅធ្វើបុណ្យតាមប្រពៃណីនៅគេហដ្ឋានរបស់ខ្លនផងដែរ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]