អង្គុយ​ផឹក​​​ទឹកត្នោត​ជូរ ត្រូវគេ​កាប់​២​កាំបិត​​ចំក្បាល​ ព្រោះ​ខឹង​ចាក់​ម៉ាញ៉េ​​ឌឺដង​ដាក់​គេ

ខេត្តកំពង់ឆ្នាំង ៖ យុវជនម្នាក់ត្រូវបាន ក្រុមគ្រួសារដឹកមកសង្គ្រោះនៅមន្ទីរពេទ្យ បន្ទាប់ពីត្រូវយុវជនមួយក្រុមទៀត លួចឆ្មក់កាប់ចំក្បាលបណ្តាលឱ្យរងរបួសជាទម្ងន់ កាលពីវេលាម៉ោង៥និង១០នាទីល្ងាចថ្ងៃទី៣១ មករា ២០១៣ នៅក្នុងកន្លែងលក់ទឹកត្នោតជូរមួយកន្លែងឈ្មោះ «ទឹកត្នោតបង្ហាញខ្លួន» ស្ថិតក្នុងភូមិធម្មយុត្តិ សង្កាត់កំពង់ឆ្នាំង ក្រុងកំពង់ឆ្នាំង ខណៈដែលជនរងគ្រោះ កំពុងផឹកទឹកត្នោតជូរជាមួយឪពុកមា ។

យុវជនរងគ្រោះឈ្មោះយៀវ សុធន អាយុ១៨ឆ្នាំ មានទីលំនៅភូមិទួលក្រឡាញ់ សង្កាត់កំពង់ឆ្នាំង ។ តាមការរៀបរាប់របស់ បុរសឈ្មោះយៀវ សុផាន អាយុ២៩ឆ្នាំ ត្រូវជាឪពុកមា និងជាអ្នកបានស្ថិតនៅក្នុងហេតុការណ៍នោះដែរបាននិយាយថា មុនពេលកើតហេតុរូបគាត់បានត្រឡប់ពីបាញ់ថ្នាំ ក៏ដំណាំវិញ ក៏បានជួបនឹងក្មួយឈ្មោះយៀវ សុធន ដែលជាជនរងគ្រោះ ទើបមកធ្វើសំណង់ដែរ ហើយក៏បបួលគ្នាទៅផឹក ទឹកត្នោតជូរនៅហាង «ទឹកត្នោតបង្ហាញខ្លួន» ។ បុរសរូបនេះបានបន្តថា ពេលអង្គុយផឹកមិនទាន់ បានអស់១ថូផង ម្ចាស់ហាងប្រាប់ឱ្យគាត់យកធុងបាញ់ថ្នាំរបស់គាត់ ចេញពីលើគ្រែមួយទៀត ព្រោះគាត់សុំយកគ្រែដាក់ឱ្យភ្ញៀវចូលមកថ្មី ។ ភ្លាមនោះគាត់បានងើបទៅ យកធុងបាញ់ថ្នាំនោះស្រាប់តែ ក្មួយគាត់ដែលកំពុងនៅអង្គុយផឹកលើគ្រែ ជាមួយគាត់ត្រូវបានយុវជនមួយក្រុមស្ទុះយកកាំបិត មកកាប់លើក្បាលក្មួយគាត់ចំនួន២កាំបិតឃើញដូចនោះគាត់ក៏បានហក់មកជួយ និងចាប់បានគ្នាវាម្នាក់ ប៉ុន្តែពេលនោះមានបក្សពួកវាម្នាក់ទៀតស្ទុះមកកាប់ គាត់មួយកាំបិតចំប្រអប់ដៃឆ្វេងស្តាំធ្វើឱ្យគាត់ទ្រាំពុំបានក៏លែងម្នាក់នោះទៅហើយ ពួកវាក៏នាំគ្នាហក់ឡើងជិះម៉ូតូប្រមាណ៥គ្រឿងគេចខ្លួនបាត់អស់ទៅ ៕

បញ្ចូលអត្ថបទ ៖ បុប្ផា កោះ

ផ្តល់សិទ្ធដោយ កោះសន្តិភាព