ចាំសេដ្ឋីទុរេនរើសកូនប្រសាអត់? ថ្វីបើលោកបានរំសាយការរើសកូនប្រសាហើយ ប៉ុន្តែនៅតែមានបុរសចិត្តស្មោះហោះពីស្រុកចិនមករកទៀត (មានវីដេអូ)

ថៃ៖ ភ្ញៀវទេសចរជនជាតិចិនម្នាក់បានហោះពីប្រទេសចិន ដើម្បីមកផ្សងសំណាងធ្វើជាកូនប្រសារបស់សេដ្ឋីទុរេននៅស្រុកថៃ ប៉ុន្តែត្រូវបានបដិសេធ។

កាលពីខែមុន លោកសេដ្ឋីទុរេន Rodthong បានប្រកាសជាសាធារណៈថា លោកកំពុងស្វែងរកកូនប្រសាឱ្យកូនស្រីលោក ជាមួយនឹងប្រាក់រង្វាន់ ៣១៥,០០០ដុល្លារសម្រាប់កូនប្រសាណា ដែលលោកពេញចិត្ត។ ប៉ុន្តែគួរឱ្យសោកស្តាយ ភ្ញៀវទេសចរចិនរូបនេះ មិនបានដឹងថា លោកសេដ្ឋី Rodthong បានរំសាយការរើសកូនប្រសានេះជាយូរមកហើយ។

យោងតាមគណនីហ្វេសប៊ុករបស់លោកទើបតែបានបង្ហោះកាលពីថ្ងៃអាទិត្យសប្តាហ៍មុនថា លោកគ្រាន់តែរម្លឹកអ្នករាល់គ្នាថា ការរើសប្តីឱ្យកូនស្រីលោកគឺកញ្ញា Karnsita ត្រូវបានរំសាយហើយ។ ការបង្ហោះសារមួយនេះ រួមមានទាំងរូបថតរបស់ភ្ញៀវទេសចរជនជាតិចិនឈរនៅពីក្រោយកូនស្រីរបស់លោកថែមទៀត។

ដោយក្នុងនោះលោកសេដ្ឋីវ័យ ៥៨ឆ្នាំរូបនេះបានសរសេរថា៖

«ខ្ញុំបានរំសាយព្រឹត្តិការណ៍រើសកូនប្រសាចោលហើយ ប៉ុន្តែគេនៅតែហោះពីប្រទេសចិនមករកខ្ញុំទៀត។ ពិតជាកំសត់មែន។ ចំពោះអ្នកណាម្នាក់ដែលចង់មករកខ្ញុំនៅថ្ងៃស្អែកទៀត សូមកុំមកអី ព្រោះខ្ញុំបានរំសាយវាចោលហើយ។» (បកប្រែជាភាសាខ្មែរ)

យោងតាមប្រភពច្បាស់ការណ៍មួយបានរាយការណ៍ថា បុរសជនជាតិចិនម្នាក់នេះ មកដល់ស្រុកថៃតាមរយៈសេវាកម្មទេសចរណ៍ (Tour) ប៉ុន្តែត្រូវបានលោកសេដ្ឋីបដិសេធ ដោយប្រាប់ថាការរើសកូនប្រសាត្រូវបានរំសាយចោលហើយ។

យ៉ាងណាមិញ យោងតាមប្រភពដដែលបានឱ្យដឹងថា លោកបានសរសើរថាកញ្ញា Karnsita «ខ្ជូតគួរឱ្យស្រលាញ់» ហើយបាននិយាយថា បើទោះបីជាលោកមិនអាចធ្វើជាឧត្តមស្វាមីរបស់នាងក្តី សូមត្រឹមធ្វើជាមិត្តភក្តិក៏លោកអស់ចិត្តដែរ។

គូសបញ្ជាក់ផងដែរ ភ្ញៀវទេសចរជនជាតិនេះមិនមែនជាមនុស្សទីមួយ ដែលត្រូវបានលោកសេដ្ឋីទុរេន បដិសេធនោះទេ។ តួយ៉ាងក៏មានបុរសម្នាក់ធ្លាប់ត្រូវបានលោកសេដ្ឋីបដិសេធផងដែរ មូលហេតុគឺព្រោះតែបុរសម្នាក់នោះស្អាតពេក៕

សូមទស្សនាវីដេអូខាងក្រោម៖

• គ្រួសារ
• វីដេអូ