រាជធានីភ្នំពេញ ៖ តាមសេចក្តីរាយការណ៍បឋមបានឱ្យដឹងថា ផ្ទះមួយខ្នងប្រភេទឈើលើ ថ្មក្រោម ដំបូលប្រក់ក្បឿង មានទំហំ៨ម៉ែត្រគុណនឹង៩ម៉ែត្រ ត្រូវអគ្គិភ័យឆាបឆេះបង្កឱ្យមានការភ្ញាក់ផ្អើលកើតឡើងកាលពីវេលាម៉ោង៨និង៤០នាទីព្រឹកថ្ងៃទី៣ ខែមេសា ឆ្នាំ២០១៩ ស្ថិតនៅតាមផ្លូវលេខ៤២ ភូមិត្រពាំងក្រសាំង សង្កាត់បឹងធំ ខណ្ឌពោធិ៍សែនជ័យ ។
ម្ចាស់ផ្ទះកើតេហតុឈ្មោះម៉ន ម៉ុន ភេទស្រី អាយុជាង៣០ឆ្នាំ មុខរបរលក់ដូរ ត្រូវជាប្រពន្ធ និងប្ដីឈ្មោះផង់ សារឿន អាយុ៤០ឆ្នាំ មុខរបរកម្មកររោងចក្រ ។
តាមសេចក្តីរាយការណ៍បានឱ្យដឹងថា មុនពេលកើតហេតុ ម្ចាស់ផ្ទះជាប្តីបានចេញទៅធ្វើការរោងចក្រ ចំណែកប្រពន្ធបានចេញទៅផ្សារដើម្បីទិញអីវ៉ាន់យកមកលក់ដូរ ហើយនៅផ្ទះកើតហេតុនោះគឺមានតែលោកតា និងលោកយាដែលត្រូវជាឪពុកម្តាយរបស់ម្ចាស់ផ្ទះតែប៉ុណ្ណោះ តែឪពុកម្តាយរបស់ម្ចាស់ផ្ទះមិនបាននៅក្នុងផ្ទះកើតហេតុនោះទេ គឺនៅក្នុងតូបលក់ដូរខាងមុខផ្ទះ។
លុះពេលកើតហេតុ ឪពុកម្តាយរបស់ម្ចាស់ផ្ទះមិនបានដឹងនោះទេ ទាល់តែអ្នកដំណើរ និងអ្នកជិតខាងឃើញផ្សែងហុយចេញពីខាងក្រោយផ្ទះ ក៏មានការភ្ញាក់ផ្អើលស្រែកឆោឡោតែម្តង ។
តាមសេចក្តីរាយការណ៍បានបន្តថា នៅព្រឹកថ្ងៃកើតហេតុ អគ្គិសនីបានដាច់តាំងពីម៉ោង៧ព្រឹក ហើយការឆាបឆេះផ្ទះមួយខ្នងខាងលើគេមិនដឹងថាបណ្តាលមកពីមូលហេតុអ្វីពិតប្រាកដនោះទេ តែបើតាមអាជ្ញាធរមូលដ្ឋានបានសន្និដ្ឋានថា អាចបណ្តាលមកពីទុស្សេតាំងពីពេលអគ្គិសនីមិនទាន់ដាច់មកម៉្លេះ ហើយភ្លើងបានឆេះតិចៗ តែដោយសារអត់មានអ្នកដឹង ទើបបង្កឱ្យមានការឆាបឆេះកាន់តែខ្លាំងឡើងៗ ក៏បង្កឱ្យមានការភ្ញាក់ផ្អើលតែម្តង ។
តាមសេចក្តីរាយការណ៍បានបន្តទៀតថា គិតមកត្រឹមវេលាម៉ោង៩និង៥២នាទីព្រឹកថ្ងៃដដែល អគ្គិភ័យបានឆាបឆេះផ្ទះមួយខ្នងខាងលើអស់ទាំងស្រុងតែម្តង ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
