រាជធានីភ្នំពេញ ៖ ការរស់នៅជិតគ្នាមិនចេះយោគយល់គ្នាទៅវិញទៅមក ជាក់ស្តែងមានផ្ទះមួយលក់ដូរនៅតាមផ្លូវ ហើយបង្ហូរទឹកដក់នៅលើផ្លូវរាល់ថ្ងៃធ្វើឲ្យផ្ទះដែលទល់មុខគ្នារៀងបញ្ឆិតបន្តិចអត់ទ្រាំមិនបានក៏ជេរដៀមដាមរហូតបង្កជាជម្លោះហិង្សាគប់គ្នាទៅវិញទៅមកបែកទូ កញ្ចក់ម្ជូរ បង្កឲ្យមានការភ្ញាក់ផ្អើលកាលពីម៉ោង៤និង៤០នាទីល្ងាច ថ្ងៃទី១ ខែមេសា ឆ្នាំ២០១៩ នៅផ្លូវបេតុង ស្ថិតក្នុងភូមិម័ល សង្កាត់ដង្កោ ខណ្ឌដង្កោ។
ភាគីទី១-ឈ្មោះ ម៉ម សុធីតា អាយុ៣១ឆ្នាំ មុខរបរលក់គ្រឿងម្ជួ និងភាគីទី២-ឈ្មោះគង់ មួយគីមអាយុ៥១ឆ្នាំ មុខរបរនៅផ្ទះ អ្នកទាំង២រស់នៅភូមិ-ឃុំកើតហេតុខាងលើ មានផ្ទះនៅបញ្ឆិតទល់មុខគ្នាបន្តិច ។
បើតាមសម្ដីភាគីទី១ បានឱ្យដឹងថា មុនកើតហេតុក្រុមគ្រួសារគាត់នាំគ្នាមុជទឹកឱ្យជីដូនចាស់ជរាដែមានអាយុ៩០ឆ្នាំនៅមុខផ្ទះ ក៏មានទឹកដក់នៅតាមផ្លូវ មួយសន្ទុះក្រោយមកឈ្មោះគង់ មួយគឹម បានមកស្រែកជេរដៀមដាម ហើយគាត់ក៏ជេរទៅ ស្រាប់តែឈ្មោះគង់ មួយគឹមបានយកដុំថ្មមកគប់លើទូរកញ្ចក់ដែលគាត់លក់ដូរគ្រឿងម្ជួរបែក ទើបគាត់គប់តបតទៅវិញ ។ មិនតែប៉ុណ្ណោះភាគីទី១ អះអាងថា ភាគីទី២ តែងតែជេរផ្ទះរបស់គេជារៀងរាល់ថ្ងៃទៀតផង។
ដោយឡែកភាគីទី២ ប្រាប់ឱ្យដឹងថា ពីរគ្រួសារនេះមិនដែលចុះសម្រុងនឹងគ្នាទេ កន្លងមក ដោយភាគីទី១ ដែលជាអ្នកលក់ដូរនៅតាមផ្លូវនេះបង្ហូរទឹកមកមុខផ្ទះគាត់ជារៀងរាល់ថ្ងៃធ្វើឱ្យគាត់ទ្រាំមិនបាន ចំពោះការបង្ហូរទឹកនេះមិនមែនជាការងូតទឹករបស់ជីដូនចាស់នោះទេ គឺការបង្ហូរទឹកដែលលក់ដូរនោះនៅលើថ្នល់សាធារណៈ ហើយហូរកាត់មកមុខផ្ទះរបស់គាត់ ទើបធ្វើឲ្យគាត់ទ្រាំមិនបានក៏ជេរដៀមដាមខ្លះទៅ តែពេលគាត់ជេរនោះភាគី១ក៏ជេរវិញ បានយកកាំបិតរត់ទៅមុខផ្ទះរបស់គាត់រកកាប់គាត់ទៀតផង ទើបគាត់យកដុំថ្មគប់ទៅទូរកញ្ចក់លក់គ្រឿងម្ជូររបស់ភាគីទី១ បណ្ដាលឱ្យបែក ចំណែកភាគីទី១ ក៏យកដុំថ្មគប់មកលើទ្វារផ្ទះរបស់គាត់ដែលធ្វើពីស័ង្កសីវិញផងដែរ តែមិនមានខូចខាតទេ ។
ដោយសារតែការឈ្លោះប្រកែកគ្នារហូតនគរបាលប៉ុស្តិ៍ដង្កោចុះមកឃាត់ណែនាំនៅតែមិន ព្រមស្តាប់ គឺនៅតែបន្តជេរគ្នាទៅវិញទៅមកទៀត សមត្ថកិច្ចក៏ដឹកភាគីទាំង២ទៅធ្វើការ ណែនាំ និងធ្វើកិច្ចសន្យាឈប់ជេរដៀមដាមគ្នា និងបង្កហិង្សាតទៅទៀតនៅប៉ុស្តិ៍នគរបាលដង្កោ ។
ទន្ទឹមនឹងនោះដែរភាគីទី២ បានសំណូមសុំឲ្យអាជ្ញាធរមេត្តាចុះរៀបចំផ្លូវបេតុងមួយខ្សែនៅក្នុងភូមិនេះផង កុំឲ្យភាគីទី១ បានយកផ្លូវដែលតូចចង្អៀតពាក់កណ្តាលទៅធ្វើអាជីវកម្មលក់ដូរនៅលើថ្នល់ជាប់ជាប្រចាំ រកតែផ្លូវរថយន្តបើកចេញ-ចូលទៅមកមិនរួចទេ ទាល់តែរថយន្តបើករ៉ឺយែចុះឡើងកិនថូផ្ការរបស់គាត់បែកក៏មានដែរ ។
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]