បរទេស៖ កីឡាករ Franck Ribery បានរម្លឹក និងបើកកកាយអំពីបញ្ហារបួសយ៉ាងសាហាវ និងស្លាកស្នាមយ៉ាងធំនៅលើផ្ទៃមុខរបស់លោក។ កីឡាកររបស់ក្លិប Bayern Munich រូបនេះបានបញ្ជាក់ថា “ស្លាកស្នាម” និង “ការឈឺចាប់” ទាំងនេះហើយ ដែលបានផ្តល់ភាពជាខ្លួនឯង និងភាពរឹងមាំសម្រាប់លោកក្នុងការតស៊ូលើអាជីពជាកីឡាករបាល់ទាត់។
កីឡាករវ័យ ៣៥ឆ្នាំរូបនេះ បានលើកឡើងជាសាធារណៈតែម្តង អំពីការទទួលរងរបួសផ្លូវចិត្តក្នុងរយៈពេលប៉ុន្មានឆ្នាំកន្លងមកនេះ ក្នុងបទសម្ភាសន៍ដ៏គួរឱ្យចាប់អារម្មណ៍ជាមួយ Canal+ Sport។ ក្នុងនោះដែរ លោកក៏បាននិយាយអំពីការប្រឈមមុខតទល់ជាមួយភាពឈឺចាប់ផ្លូវចិត្តកាលពីកុមារភាពផងដែរ។
គួររំឮកថា កីឡាករ franck Ribery បានជួបគ្រោះថ្នាក់ចរាចរណ៍ដ៏គួរឱ្យរន្ធត់មួយ គឺគ្រោះថ្នាក់ក្រឡាប់ឡាននៅឯស្រុកកំណើតរបស់លោកនៅតំបន់ Boulogne-sur-Mer ប្រទេសបារាំង ដែលកាលនោះលោកនៅមានវ័យទើបតែ ២ឆ្នាំនៅឡើយ។ ក្រោយជួបហេតុការណ៍ដ៏គួរឱ្យរន្ធត់នោះ Ribery ត្រូវបានគេបញ្ជូនទៅសង្គ្រោះបន្ទាន់ភ្លាមៗនៅឯមន្ទីរពេទ្យ និងបានបន្សល់ទុកស្លាកស្នាមលើផ្ទៃមុខ ដោយការដេររបួសរហូតដល់ជិត ១០០ថ្នេរ។
Ribery បានបញ្ជាក់ថា ពេញមួយវ័យកុមារភាពរបស់លោក តែងតែមានមនុស្សម្នាផ្សេងៗសម្លឹងមើល និងចង្អុលទៅកាន់ស្នាមរបួសរបស់លោក ថែមទាំងបាននិយាយថាស្នាមរបួសនោះពិតជាអាក្រក់មើលខ្លាំងណាស់។ ប៉ុន្តែទោះបីជាបែបនេះក្តី Ribery មិនបានតូចចិត្តឡើយ លើសពីនេះលោកបានយកចំណុចទាំងនេះមកគិតក្នុងផ្លូវវិជ្ជមានដើម្បីលើកទឹកចិត្តខ្លួនឯងឡើងវិញ។ Ribery ក៏បានលើកឡើងថា កាលពីនៅក្មេងលោកធ្លាប់ត្រូវបានមនុស្សម្នាជុំវិញខ្លួន និយាយថាស្នាមរបួសទាំងអស់នោះពិតជាគួរឱ្យខ្លាច ឬអាក្រក់មើល -ល- ប៉ុន្តែលោកមិនដែលតូចចិត្ត ឬពួនយំអ្វីនោះឡើយ ផ្ទុយទៅវិញលោកមានតែប្រឹងទទួលយកចំណុចទាំងនេះ។
អាចនិយាយបានថាវាជារឿងចៃដន្យមួយដែរ ខណៈពេលដែលលោកនៅវ័យក្មេង លោកបានប្រទះទៅនឹងសៀវភៅដ៏ល្អមួយក្បាល ដែលបានជំរុញទឹកចិត្តលោកយ៉ាងខ្លាំងក្លាដើម្បីក្លាយជាកីឡាករបាល់ទាត់។ សៀវភៅមួយក្បាលនោះមានចំណងជើងថា "The Football Men: Up Close with the Giants of the Modern Game"។
ជាចុងក្រោយកីឡាករ Franck Ribery បាននិយាយថា៖ “ព្រះជាម្ចាស់បានប្រទានឱ្យខ្ញុំនៅភាពខុសគេ ហើយស្លាកស្នាមមួយនេះគឺជាផ្នែកមួយនៃខ្ញុំ។ នៅពេលនេះមនុស្សដែលស្គាល់ខ្ញុំ សុទ្ធតែទទួលយកបាននូវរាល់អ្វីដែលជាខ្ញុំផ្ទាល់”៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]