បុរសប៉ាគីស្ថានទាំងពីរនាក់នេះ បានយកសត្វតោមកចិញ្ចឹមយ៉ាងរំភើយ សូម្បីដើរលេងក៏យកវាជិះឡានទៅជាមួយដែរ (មានវីដេអូ)

ប៉ាគីស្ថាន៖ បុរសជាបងប្អូនបង្កើតនឹងគ្នាពីរនាក់ដែលមានឈ្មោះថា Hamzah និង Hassan Hussain គឺជាជនជាតិប៉ាគីស្ថាន រស់នៅក្នុងទីក្រុង Karachi បានសម្រេចចិត្តយកសត្វតោមួយក្បាលមករស់នៅជាមួយតាំងពីវាមានអាយុ២សប្តាហ៍។

យោងតាមប្រភពព័ត៌មានបានឲ្យដឹងថា សត្វតោមួយក្បាលនេះត្រូវបានបុរសប៉ាគីស្ថានទាំងពីរនាក់ខាងលើ ដាក់ឈ្មោះឲ្យថា Simba ដែលជាតួអង្គសត្វតោក្នុងរឿងគំនូរជីវចល The Lion King របស់ផលិតកម្ម Disney នេះឯង។ មកទល់សព្វថ្ងៃនេះ សត្វតោមួយក្បាលនេះមានអាយុ២៦ខែហើយ រីឯមាឌវាក៏រីកធំខ្លាំងណាស់ដែរ។ គួរបញ្ជាក់ថា សត្វតោ Simba នេះគឺជាតោ ដែលមានពូជមកពីប្រទេសអាហ្វ្រិក។

យោងតាមប្រសាសន៍របស់លោក Hassan ផ្ទាល់បានបញ្ជាក់ថា “ សត្វតោនេះបានកើតក្នុងកសិដ្ឋានរបស់គ្រួសារខ្ញុំ។ គ្រានោះ ដោយសារតែមេវាមិនមានទឹកដោះក្នុងការបំបៅតោមួយក្បាលនេះ អីចឹងហើយទើបខ្ញុំយកវាមកចិញ្ចឹមក្នុងផ្ទះរបស់យើងតែម្តងទៅ“ ។

គួរបញ្ជាក់ថា Hamzah និង Hassan បានចាត់ទុកសត្វតោមួយក្បាលនេះជាប្អូនទី៣របស់ពួកគេ។ មិនតែប៉ុណ្ណោះ ពួកគេតែងតែយកសត្វតោនេះទៅដើរលេងជាមួយ ហើយតែងតែដាក់វាឲ្យអង្គុយនៅកៅអីឡានខាងក្រោយនៅពេលធ្វើដំណើរម្តងៗ។  

យ៉ាងណាមិញ បើយោងតាមការបញ្ជាក់របស់លោក Hamzah វិញបានបន្តថា “ វានឹងមិនធ្វើអ្វីអ្នកទេ ប្រសិនជាវាស្គាល់អ្នក។ ហើយប្រសិនបើមនុស្សថ្មីដែលវាមិនស្គាល់មុខចង់ទៅក្បែរឬលេងជាមួយវា នោះពួកគេត្រូវតែឈរឲ្យស្ងៀម ហើយវានឹងមិនធ្វើអ្វីអ្នកទេ។ ប៉ុន្តែបើក្នុងករណីដែលអ្នករត់ឫស្រែកឲ្យវា វាប្រហែលជាអាចនឹងខាំអ្នក”។

ជាទូទៅ តោ Simba នេះស៊ីសាច់ស្រស់ប្រហែល៥គីឡូក្នុងមួយថ្ងៃ។ ពេលខ្លះម្ចាស់វាក៏បានដាក់សត្វពពែឲ្យវាស៊ីដែរ។ ប៉ុន្តែសត្វតោមួយក្បាលនេះស្អប់សាច់មាន់ណាស់ ហើយវាក៏មិនដែលស៊ីសាច់មាន់ដែរ។ 

ឥឡូវនេះ លោក Hassan ក៏កំពុងស្វែងរកតោញីមួយក្បាលទៀតដើម្បីធ្វើជាដៃគូឲ្យ Simba។ លោកបានបន្តថា “បើគាត់មិនអាចស្វែងរកតោញីក្នុងប្រទេសប៉ាគីស្ថានបាន នោះគាត់នឹងទៅដឹកតោញីមួយក្បាល មកពីប្រទេសអាហ្វ្រិកខាងត្បូងតែម្តង”។  

មានវីដេអូនៅខាងក្រោម៖