រាជធានីភ្នំពេញ ៖ បុរសចំនួន៤នាក់ ក្នុងនោះមានបុរសចំនួន៣នាក់បានកោរសក់គ្រងស្បង់ចីវរ បន្លំខ្លួនធ្វើជាព្រះសង្ឃដើរបិណ្ឌបាត្រ និងបុរសម្នាក់ទៀតជាអ្នករត់រ៉ឺម៉កម៉ូតូកង់បី ត្រូវបានប្រជាការពារសង្កាត់ភ្នំពេញថ្មីឃាត់ខ្លួន បន្ទាប់ពីពួកគេរៀបចំចេញដំណើរ ទៅបិណ្ឌបាត្រនៅតាមទីផ្សារ និងតាមទីសាធារណៈ ដើម្បីប្រមូលប្រាក់ដើរលេងបុណ្យចូលឆ្នាំនាពេលខាងមុខនេះ ។
ហេតុការណ៍ចុះឃាត់ខ្លួនក្រុមជនបន្លំខ្លួនធ្វើជាព្រះសង្ឃខាងលើនេះបានធ្វើឡើងកាលពីវេលាម៉ោងប្រមាណ៧និង១៥នាទីព្រឹកថ្ងៃទី២៦ ខែមីនា ឆ្នាំ២០១៩ នៅចំណុចផ្លូវលេខ១៩៧៤ ក្នុងភូមិពោងពាយ សង្កាត់ភ្នំពេញថ្មី ខណ្ឌសែនសុខ។
ជនសង្ស័យទាំង៤នាក់ខាងលើដែលត្រូវសមត្ថកិច្ចចាប់ឃាត់ខ្លួនរួមមាន១-ឈ្មោះ ប៉យ យៀត ភេទប្រុស អាយុ៣៥ឆ្នាំ ២-ឈ្មោះភួង ឆៃ ភេទប្រុស អាយុ១៤ឆ្នាំ ៣-ឈ្មោះ ភិន សារ៉ុម ភេទប្រុស អាយុ២៥ឆ្នាំ ។ អ្នកទាំងបីនាក់កោសក់ គ្រង់ស្បង់ចីវរបន្លំខ្លួនធ្វើជាសង្ឃ ស្នាក់នៅបន្ទប់ជួលក្នុងភូមិឧកញ៉ា វាំង សង្កាត់ភ្នំពេញថ្មី ខណ្ឌសែនសុខ និងមានស្រុកកំណើតភូមិស្រម៉រ ឃុំត្រពាំងស្រែ ស្រុកមេសាង ខេត្តព្រៃវែង។
ដោយឡែកអ្នករត់រ៉ឺម៉កម៉ូតូកង់បីម្នាក់ឈ្មោះរុណ ភារ៉ុម ភេទប្រុស អាយុ៣២ឆ្នាំ ស្នាក់នៅម្តុំវត្តញាញរង្សី ក្នុងសង្កាត់ទួលសង្កែទី១ ខណ្ឌឫស្សីកែវ ។
តាមមន្ត្រីសង្កាត់ភ្នំពេញថ្មីបានអោយដឹងថា នៅព្រឹកថ្ងៃកើតហេតុ កម្លាំងប្រជាការពារបានចុះរៀបចំសណ្តាប់នៅផ្សារក្រមួន ក៏បានប្រទះឃើញរ៉ឺម៉កម៉ូតូកង់បីមួយគ្រឿងបានទំលាក់វាំងនន ដោយមានការសង្ស័យ ក៏ទៅបើកមើលឃើញ ស្រាប់តែបុរស៣នាក់កំពុងតែគ្រងស្បង់ចីវរបន្លំខ្លួនធ្វើជាសង្ឃក៏ធ្វើការឃាត់ខ្លួនតែម្តង ព្រមទាំងដកហូតបានបាត្រមួយចំនួនផងដែរ ។
តាមព័ត៌មានដដែលបានអោយដឹងបន្តថា នៅព្រឹកថ្ងៃកើតហេតុនោះដែរ ក្រុមជនបន្លំខ្លួនធ្វើជាសង្ឃត្រូវបានប្រជាការពារបញ្ជូនទៅកាន់វត្តឧកញ៉ាវាំង ហើយដោះស្បង់ចីវរចេញ រួចហៅនគរបាលចាប់វាយខ្នោះបញ្ជូនទៅកាន់អធិការដ្ឋានខណ្ឌសែនសុខ ដើម្បីចាត់ការតាមច្បាប់តែម្តង។
ក្រោយពេលចាប់ឃាត់ខ្លួន ជនសង្ស័យម្នាក់ឈ្មោះ ប៉យ យៀត បានឆ្លើយសារភាពថា ខ្លួនបានកោសក់ដើម្បីមកពីភ្នំពេញ និងទិញស្បង់ចីវរ ព្រមទាំងបាត្រនៅតាខ្មៅអស់ប្រមាណជាង៣០ដុល្លារដើម្បីបន្លំខ្លួនធ្វើជាសង្ឃដើរបិណ្ឌបាត្រប្រមូលប្រាក់យកទៅដើរលេងចូលឆ្នាំ ។
ដោយឡែក ជនសង្ស័យម្នាក់ទៀតឈ្មោះ ភិន សារ៉ុម ក៏បានឆ្លើយសារភាពដែរថា ខ្លួនបានទិញស្បង់ចីវរ និងបាត្រនៅខេត្តព្រៃវែងអស់ប្រមាណជាង៣០ដុល្លារផងដែរ ហើយបានណាត់គ្នា ដើម្បីបិណ្ឌបាត្រ លុះនៅពេលរៀបចំចេញទៅបិណ្ឌបាត្រក៏ត្រូវបានសមត្ថកិច្ចចាប់ឃាត់ខ្លួនតែម្តង ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]