រាជធានីភ្នំពេញ ៖ ជនសង្ស័យ៣នាក់ត្រូវកម្លាំងនគរបាលឃាត់ខ្លួនបានជាបន្តបន្ទាប់ ក្រោយពីក្រុមពួកគេមានគ្នា៦ទៅ៧នាក់ប្រើប្រាស់ហិង្សាទៅលើបុរសម្នាក់រងរបួសធ្ងន់រហូតដល់ដាច់ខ្យល់ស្លាប់ ដោយគ្រាន់តែលឺគេស្រែកថា «បុរសរូបនោះគឺជាចោរ» ។ ការឃាត់ខ្លួននេះធ្វើឡើងកាលពីរសៀលថ្ងៃទី២៤ ខែមីនា ឆ្នាំ២០១៩ នៅចំណុចសំណង់មិនរៀបរយ តាមបណ្តោយផ្លូវ៦០ម៉ែត្រ ក្នុងភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ ។
ជនសង្ស័យទាំង៣នាក់ខាងលើ ១-ឈ្មាះ វ៉ាត វិឆ័យ ភេទប្រុស អាយុ៣០ឆ្នាំ មុខរបរកម្មករ ២-ឈ្មោះ ធី ភា ភេទប្រុស អាយុ១៩ឆ្នាំ មុខរបរសន្តិសុខ ៣-ឈ្មោះ សេង សុខធី ហៅ អាយួន ភេទប្រុស អាយុ២២ឆ្នាំ ជនជាតិវៀតណាម មុខរបរមិនពិតប្រាកដ ។ ចំណែកបុរសត្រូវគេចោទថា ជាចោរ ឈ្មោះ ហ៊ុន សំអុល ហៅឡឹង អាយុ៣៥ឆ្នាំ មុខរបរកម្មករសំណង់ មានទីលំនៅភូមិតាក្តុល សង្កាត់តាក្តុល ក្រុងតាខ្មៅ ខេត្តកណ្តាល (ស្លាប់ដោយប៉ះទង្គិចក្បាលធ្ងន់ធ្ងរ) ។
ប្រភពជុំវិញរឿងរ៉ាវខាងលើនេះ ឱ្យដឹងថា នៅម៉ោង១២និង៤៥នាទីថ្ងៃត្រង់ ថ្ងៃទី២៣ មីនា បុរសដែលត្រូវគេចោទថា ជាចោរខាងលើបានចូលទៅក្នុងផ្ទះខ្ទមមួយកន្លែងនៅក្នុងតំបន់មិនរៀបរយ ។ ពេលនោះគេលឺសូរសម្លេងនារីម្នាក់ស្រែកចេញពីក្នុងផ្ទះឱ្យគេឯងជួយ និងស្រែកខ្លាំងៗថា «មានចោរចូលផ្ទះ» ។ ភ្លាមនោះបុរសរូបនេះក៏ចេញមកក្រៅវិញ ស្រាប់តែត្រូវក្រុមយុវជនជាពលរដ្ឋច្រើននាក់រស់នៅក្បែរនោះលឺសម្រែកថា ចោរនោះ ក៏នាំគ្នាចាប់ព្រួតវាយដោយដៃ និងដំបងដែកតែម្តងទៅ ជាហេតុធ្វើឱ្យបុរសរូបនោះបែកក្បាលហូរឈាមស្រោចខ្លួន ។
ប្រភពបន្តថា ក្រោយពីព្រួតវាយរួចមក បុរសត្រូវគេចោទព្យាយាមរត់គេចចេញ តែត្រូវក្រុមពលរដ្ឋរត់ដេញតាម និងស្រែកថា «ចោរៗ» ពីក្រោយរហូតរត់ដល់ចំណុចច្រមុះជ្រូកក្បាលថ្នល់ក៏ត្រូវនគរបាលចរាចរណ៍ប្រចាំការឃាត់បានតែម្តងទៅ ។ ទន្ទឹមនឹងនោះ ដោយឃើញរបួសបុរសនេះធ្ងន់ធ្ងររហូតសន្លប់ស្តូកស្តឹងផង នគរបាលហៅរថយន្តសាមុយមកដឹកយកទៅសង្គ្រោះ ប៉ុន្តែអកុសលពេលទៅដល់មន្ទីរពេទ្យ ក៏ត្រូវដាច់ខ្យល់ស្លាប់តែម្តង។
អធិការនគរបាលខណ្ឌមានជ័យ លោកវរសេនីយ៍ទោ ម៉េង វិមានតារ៉ា បញ្ជាក់ប្រាប់តាមទូរស័ព្ទនាព្រឹកថ្ងៃទី២៥ មីនានេះថា តាមការសួរនាំលើនារីរងគ្រោះដែលស្រែកថាចោរនោះបញ្ជាក់ថា សពបុរសដែលស្លាប់បានចូលទៅក្នុងផ្ទះរបស់ខ្លួនមានបំណងមិនល្អ និងប៉ងឆក់កាបូបលុយ ខណៈនាងកំពុងនៅម្នាក់ឯង ទើបរូបនាងស្រែកឆោឡោឱ្យអ្នកភូមិជួយ ពេលនោះក្រុមយុវជនរស់នៅតំបន់នោះ ក៏ស្ទុះនាំគ្នាព្រួតវាយតែម្តងទៅ ។ យ៉ាងណាមិញ ជុំវិញរឿងរ៉ាវនេះនារីរងគ្រោះក៏ដាក់ពាក្យបណ្តឹងប្តឹងសពដែលស្លាប់ចំពោះសកម្មភាពដែលប្រព្រឹត្តិផងដែរ។
លោកអធិការបន្តថា ក្រោយការស្លាប់បុរសត្រូវចោទរួចមក សាច់ញាតិរបស់គេមកដាក់ពាក្យបណ្តឹងនៅប៉ុស្តិ៍រដ្ឋបាលនគរបាលមូលដ្ឋាន ដើម្បីឱ្យជួយស្រាវជ្រាវរកយុត្តិធម៌ជូនសាច់ញាតិរបស់គេដែលស្លាប់ផង ព្រោះពួកគេថា ករណីនេះជាករណីមានចេតនាព្រួតវាយសម្លាប់ ដោយបុរសដែលស្លាប់ពុំមែនជាចោរលួច ឬចោរឆក់ដូចគេចោទប្រកាន់ឡើយ ។
ក្រោយទទួលពាក្យបណ្តឹងហើយនោះ កម្លាំងនគរបាលចម្រុះដឹកនាំដោយលោកអធិការនគរបាលខណ្ឌចុះទៅចំណុចកើតហេតុ រហូតឃាត់ខ្លួនមនុស្ស៣នាក់ ក្នុងនោះមានម្នាក់ជាប់ថ្នាំញៀនក្នុងខ្លួនជាច្រើនកញ្ចប់ទៀតផង ។ តាមចម្លើយសារភាពជនទាំង៣នាក់មេះថា ពួកខ្លួនពិតជាចូលរួមក្នុងសកម្មភាពព្រួតវាយនោះប្រាកដមែន ប៉ុន្តែពួកគេប្រើដៃវាយលើបុរសរូបនោះប៉ុណ្ណោះ ដោយឡែកនៅមានគ្នីគ្នាពួកគេផ្សេងទៀតដែលជាអ្នកប្រើដំបងវាយក្បាលបុរសរូបនោះ រហូតរបួសធ្ងន់ដល់ស្លាប់បែបនេះ ។
ជនសង្ស័យទាំង៣នាក់បញ្ជាក់ថា មូលហេតុដែលពួកគេទៅវាយបុរសរូបនោះ គឺដោយសារលឺសម្លេងនារីនៅក្នុងផ្ទះនោះស្រែកថា មានចោរ និងស្រែកឱ្យជួយ ទើបពួកគេសម្រេចទៅជួយ និងព្រួតវាយបុរសរូបនោះតែម្តងទៅ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]