ក្រោយចាញ់វេណេស៊ុយអេឡា! Messi បានចេញពីជម្រើសជាតិ មកកាន់ Barcelona ដោយសារបញ្ហារបួស

បរទេស៖ កីឡាករ Lionel Messi ត្រូវបានដកឈ្មោះចេញពីបញ្ជីក្រុមជម្រើសជាតិអាហ្សង់ទីន ក្រោយពីជួបប្រទះបញ្ហារបួស ក្នុងជំនួបដែលអាហ្សង់ទីន ចាញ់វេណេស៊ុយអេឡា ៣-១។ ក្រោយជួបប្រទះបញ្ហារបួសនេះ មានន័យថា Messi ត្រូវត្រឡប់មកចូលរួមជាមួយ Barcelona វិញមុនកាលកំណត់ ដើម្បីសម្រាកព្យាបាលរបួសមុនជំនួបជាមួយ Manchester United នៅក្របខណ្ឌ UEFA Champions League។

ក្នុងការត្រឡប់មកកាន់អេស្ប៉ាញវិញនេះ គេសង្កេតឃើញមានក្រុមអ្នកកាសែត និងអ្នកគាំទ្រជាច្រើនរង់ចាំទទួលវត្តមាន Messi ក៏ដូចជាភរិយារបស់ Messi ដែលអង្គុយរង់ចាំក្នុងរថយន្តរួចជាស្រេច។ បើទោះបីជាយ៉ាងណាក្តី អាហ្សង់ទីននៅមិនទាន់អស់ភារកិច្ចសម្រាប់ប្រកួតមិត្តភាពអន្តរជាតិនៅឡើយទេ ដោយត្រៀមជួបជាមួយក្រុមជម្រើសជាតិម៉ារ៉ុក ដែលជាភារកិច្ចបន្ត បើទោះបីជាអវត្តមានកីឡាករ Messi យ៉ាងណាក្តី។ ដោយឡែក សម្រាប់ Messi វិញ រូបគេអាចនឹងត្រឡប់មកសម្រាកព្យាបាល និងត្រៀមខ្លួនសម្រាប់ប្រកួតទល់នឹង Espanyol នាថ្ងៃទី ៣០ ខែមីនានេះ មុននឹងត្រៀមប៉ះ Manchester United នៅថ្ងៃទី ១១ ខែមេសាខាងមុខ៕