អ្នកណាថាផ្កាមានតែសុភាពនារីស្រលាញ់ចូលចិត្តនោះ? ជាការពិតណាស់ ផ្កាភាគច្រើនគឺតំណាងឱ្យភាពស្រស់ស្អាត ឆើតឆាយ និងផ្តល់សម្រស់ជូនអ្នកទស្សនាដើម្បីរំសាយនូវទុក្ខកង្វល់ទាំងពួង ហេតុនេះហើយរាល់បណ្តាសួនផ្កាមិនថាតូច ឬធំ វាបានក្លាយទៅកន្លែងកម្សាន្តអារម្មណ៍មួយរបស់អ្នកទេសចរដើម្បីលំហែអារម្មណ៍ពេលសម្រាកពីការងារផងដែរ។
អ្វីដែលកាន់តែពិសេស គេបានរកឃើញថានៅលើលោកនេះ មានសួនផ្កាដ៏ស្រស់ស្អាតជាច្រើនកន្លែង សុទ្ធតែស្រស់ស្អាតទាក់ទាញដូចៗគ្នា តែនៅក្នុងនោះមានសួនផ្កា ១០កន្លែងដែលគេទទួលស្គាល់ថាមានភាពអស្ចារ្យ និងស្អាតជាងគេបំផុតលើលោក ព្រមទាំងពោរពេញដោយផ្កាចម្រុះពណ៌រាប់លានដើមផងដែរ។
ចង់ដឹងថា តើសួនផ្កាដែលល្បីថាស្រស់ស្អាតទាំងនោះ មានភាពអស្ចារ្យបែបម៉េច និងមានទីតាំងស្ថិតនៅក្នុងប្រទេសណាខ្លះ តោះ! យើងមកតាមដានទាំងអស់គ្នា៖
១. សួនផ្កា Keukenhof (Garden Of Europe) ប្រទេសហូឡង់
ប្រទេសហូឡង់ មានសួនផ្កាដ៏ស្រស់ស្អាតមួយកន្លែងស្ថិតនៅក្នុងទីក្រុង Lisse ដែលបានទាក់ទាញភ្ញៀវទេសចរមកកម្សាន្តយ៉ាងច្រើនកុះករ ដោយសារតែទេសភាពសួនផ្កាដ៏ស្រស់ស្អាតអស្ចារ្យ។ នៅក្នុងនោះគេបានដឹងថា សួនផ្កានេះមានដាំដុះផ្កាស្អាតៗប្លែកៗដល់ទៅជាង ៧លានដើមជារៀងរាល់ឆ្នាំ ដើម្បីធ្វើឱ្យទីនេះកាន់តែមានភាពស្រស់ស្អាតទ្វេដងអមដោយផ្កាចម្រុះពណ៌ច្រើនជាងគេក្នុងពិភពលោក។
២. ឧទ្យាន Hitachi Seaside ប្រទេសជប៉ុន
ទីតាំងសួនឧទ្យានមួយនេះមានដាំដុះផ្កាចម្រុះពណ៌រាប់សិបលានដើមពាសពេញផ្ទៃដីជាង ១៩០ហិចតា ដែលធ្វើឱ្យទីនេះមានទេសភាពស្រស់ស្អាតមែនទែនគួរឱ្យចង់គយគន់។ ជាពិសេសអ្នកមិនបាច់បារម្ភទេ មិនថាមកកម្សាន្តក្នុងពេលណា រដូវកាលណាក៏ដោយ ក៏សួនឧទ្យានមួយនេះមានផ្ការីកស្គុះស្គាយស្រស់ស្អាតគ្រប់ពេលវេលាស្វាគមន៍អ្នកទេសចរមកទស្សនាកម្សាន្តផងដែរ។
៣. ចម្ការផ្កាឈូករ័ត្ន ក្នុងតំបន់ Tuscany ប្រទេសអ៊ីតាលី
សម្រាប់អ្នកដែលស្រលាញ់ និងចូលចិត្តផ្កាឈូករ័ត្ន ប្រាកដណាស់កន្លែងនេះពិតជាកន្លែងដែលអ្នកប្រាថ្នាមកឱ្យទាល់តែបានជាមិនខាន ដោយសារតែវាគឺជាវាលចម្ការដ៏ធំធេងមានដាំដុះសុទ្ធតែផ្កាឈូករ័ត្នពណ៌លឿងឆ្អិនឆ្អៅជាជួរៗ បញ្ចេញសម្រស់ស្រស់ស្អាត និងឈរត្រង់ភ្លឹងបែរមុខសំដៅទៅរកព្រះអាទិត្យដូចៗគ្នាគួរឱ្យចង់គយគន់មែនទែន។
៤. សួនផ្កានៅក្នុងទីក្រុង Carlsbad រដ្ឋកាលីហ្វ័រញ៉ា សហរដ្ឋអាមេរិក
ផ្ការាប់រយរាប់លានដើមដែលត្រូវបានគេដាំដុះចម្រុះគ្នាទៅតាមរដូវកាលនីមួយៗលើផ្ទៃដីទំហំជាង ៥០ហិចតានៅក្នុងទីក្រុង Carlsbad បានធ្វើឱ្យតំបន់ឆ្នេរ Carsbad កាន់តែមានសម្រស់សម្រស់ស្រស់ស្អាត និងទាក់ទាញខ្លាំងមែនទែន។ ដោយក្នុងមួយឆ្នាំៗមានអ្នកទេសចរមិនតិចនាក់ទេបានមកកម្សាន្តនៅទីកន្លែងនេះ ដើម្បីទស្សនាទេសភាពសួនផ្កាដ៏អស្ចារ្យមួយនេះពោរពេញដោយភាពសប្បាយរីករាយមិនចេះដាច់។
៥. ពិធីបុណ្យផ្កា Fuji Shibazakura ប្រទេសជប៉ុន
ផ្កា Shibazakura ឬមានន័យថាផ្កាម្យ៉ាងដែលមានពណ៌ផ្កាឈូកស្រស់លាយឡំនឹងពណ៌ស ត្រូវបានគេដាំដុះយ៉ាងច្រើនបង្កើតជាទស្សនីយភាពដ៏អស្ចារ្យមួយនៅក្នុងពិធីបុណ្យផ្កា Fuji Shibazakura ដែលអមដោយជួរភ្នំ និងផ្ទៃទឹកថ្លាឆ្វេងអមសងខាងយ៉ាងស្រស់ស្អាតគួរជាទីគយគន់។ ពេលវេលាល្អបំផុតដើម្បីចូលរួមពិធីបុណ្យផ្កាដ៏អស្ចារ្យនេះ អ្នកអាចមកទស្សនានៅក្នុងអំឡុងចាប់ពីពាក់កណ្តាលខែឧសភា រហូតដល់ដើមខែមិថុនា។
៦. សួនផ្កា Dubai Miracle ប្រទេសអារ៉ាប់រួម
និយាយពីឌូបៃប្រាកដណាស់អ្នកប្រហែលជាយល់ថាវាគឺជាទីក្រុងដ៏ក្តៅហួតហែងដែលសម្បូរទៅដោយវាលខ្សាច់ តែវាមិនមែនដូច្នេះទាំងអស់នោះទេ ព្រោះថាឌូបៃបែរជាមានសួនផ្កាធម្មជាតិដ៏ស្រស់ស្អាតមួយកន្លែងដែលស្ទើរតែមិនជឿថាវាមានលក្ខណៈអស្ចារ្យបែបនេះទាល់តែសោះ។ Dubai Miracle មានដាំដុះផ្កាចម្រុះពណ៌ ៤៥លានប្រភេទនៅលើទំហំដីដល់ទៅជាង ៧ហិចតា តែវាមិនមែនត្រឹមតែជាសួន ឬចម្ការផ្កាប៉ុណ្ណោះទេ តែក៏មានច្នៃរចនាដើមផ្កាជារាងបេះដូង និងរូបរាងប្លែកៗស្អាតៗជាច្រើនទៀតផងដែរ។
៧. ពិធីបុណ្យ Tulip Festival នៅតំបន់ Skagit ទីក្រុងវ៉ាស៊ីនតោន សហរដ្ឋអាមេរិក
ជារៀងរាល់ឆ្នាំនៅក្នុងខែមេសា ពិធីបុណ្យ Tulip Festival Valley តែងតែត្រូវបានប្រារព្ធធ្វើឡើងនៅក្នុងរដ្ឋវ៉ាស៊ីនតោនសហរដ្ឋអាមេរិច។ ដោយក្នុងនោះផ្កា Tulip ជាង ១០០ ប្រភេទផ្សេងៗគ្នាត្រូវបានគេដាំដុះពេញលើផ្ទៃដី ៣៥០ ហិចតា ដែលផ្តល់នូវទស្សនីយភាពស្រស់ស្អាតទាក់ភ្នែកគួរឱ្យចង់គយគន់មែនទែន។
៨. សួនផ្កា ខាណូឡា ស្រុកឡៅភីង ប្រទេសចិន
នៅក្នុងចន្លោះពីខែកុម្ភៈ រហូតដល់ខែមីនា ស្រុកឡៅភីងមានដាំដុះផ្កា ខាណូឡាដ៏ស្រស់ស្អាតលឿងឆ្អិនឆ្អៅស្ទើរពេញផ្ទៃដី ដែលផ្តល់នូវទស្សនីយភាពស្រស់ស្អាតទាក់ភ្នែកមែនទែន។ ជាពិសេសគឺជួរភ្នំខៀវស្រងាត់នៅខាងក្រោយរឹតតែធ្វើឱ្យមានទេសភាពប្លែកភ្នែកចម្លែកអារម្មណ៍ស្ទើរតែមិនគួរឱ្យជឿ។
៩. ពិធីបុណ្យផ្កា Tulip កាណាណា នៅក្នុងទីក្រុង Ottawa
ជារៀងរាល់ឆ្នាំនៅក្នុងខែឧសភា ផ្កា Tulip ជាង ៣លានដើមត្រូវបានដាំដុះស្ទើរពាសពេញទីក្រុងទាំងមូលនៃប្រទេសកាណាដា។ តែនៅក្នុងនោះមានសួនផ្កា Tulip មានកន្លែងដែលមានទំហំធំមែនទែនមានសុទ្ធតែផ្កា Tulip ច្រើនជាងគេបង្អស់នៅក្នុងប្រទេស ដែលស្ថិតនៅក្បែរបឹង Dow ។
១០. ចម្ការផ្កាឡាវេនឌឺ តំបន់ Provence ប្រទេសបារាំង
សួនផ្កាឡាវេនឌឺពណ៌ឡើងស្វាយល្អូកលាតសន្ធឹងពាសពេញផ្ទៃដីដាច់ឆ្ងាយកន្ទុយភ្នែក នៅក្នុងតំបន់ Provence ពិតជាធ្វើឱ្យអារម្មណ៍អ្នកទេសចរចម្លែកចិត្តចម្លែកអារម្មណ៍ជាមិនខាន។ ជាពិសេសនោះ អ្វីដែលមិនអាចបំភ្លេចបាននោះ គឺអ្នកដែលមកកម្សាន្តអាចស្រូបយកនូវក្លិនក្រអូបប្រហើររបស់ផ្កាឡាវេនឌឺ ដែលអាចជួយធ្វើឱ្យអារម្មណ៍អ្នកស្រស់ស្រាយ អាចបំបាត់ភាពតានតឹងបានយ៉ាងល្អទៀតផង៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក យល់ដឹង និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]