មិនមែនមីល្ពៅទេ តែមីឆាពិសេសសិង្ហបុរី! គេហ៊ានឱ្យថ្លៃ ១,៤ លានដុល្លារសម្រាប់ទិញរូបមន្តសម្ងាត់ តែម្ចាស់ហាងមិនព្រមលក់!

សិង្ហបុរី៖ ថ្មីៗនេះ មានជនអនាមិកម្នាក់ត្រូវបានរាយការណ៍ថា ហ៊ានឱ្យថ្លៃរហូតដល់ ១,៤ លានដុល្លារអាមេរិក ដើម្បីទិញរូបមន្តសម្ងាត់ធ្វើមីឆាពិសេស ពីហាងលក់មីឆាដ៏ល្បីមួយកន្លែងក្នុងប្រទេសសិង្ហបុរី។

យោងតាមប្រភពសារព័ត៌មានបរទេសមួយបានឱ្យដឹងថា ហាងលក់មីឆានេះមានឈ្មោះថា Kok Kee Wanton Noodle គឺជាហាងលក់មីឆាដ៏ល្បីមួយនៅក្នុងប្រទេសសិង្ហបុរី។ ហាងនេះបើករកស៊ីរាប់ឆ្នាំមកហើយ ប៉ុន្តែបានបិទទ្វារកាលពីឆ្នាំ ២០១៦ កន្លងទៅនេះ។ មូលហេតុដែលហាងនេះត្រូវបិទទ្វារ ត្រូវបានគេដឹងថា គឺដោយសារម្ចាស់ហាងមានបញ្ហាសុខភាពមួយចំនួន។

យ៉ាងណាមិញ បន្ទាប់ពីរង់ចាំអស់រយៈពេលជាច្រើនឆ្នាំ នៅទីបំផុតហាងនេះបានបើកទ្វារសាជាថ្មីម្តងទៀតកាលពីខែមីនា ឆ្នាំ២០១៩ នេះ។ ដោយក្នុងនោះម្ចាស់ហាងបាននាំកូនប្រុស-ស្រីពីរនាក់មករកស៊ីជាមួយគ្នាផងដែរ។

ខណៈពេលដែលកំពុងតែទទួលបទសម្ភាសន៍ជាមួយអ្នកសារព័ត៌មាន កូនប្រុសម្ចាស់ហាងដែលមានវ័យ ៣៥ឆ្នាំ និងកូនស្រីម្ចាស់ហាងដែលមានអាយុ ៣២ឆ្នាំ បាននិយាយថា ពួកគេបាននឹងកំពុងតែរៀនសូត្រពីរូបមន្តសម្ងាត់ធ្វើមីឆាពិសេសនេះដើម្បីធានានូវ «រសជាតិដើម» ដែលមនុស្សម្នាចូលចិត្តពិសា។

ការបើកហាងសាជាថ្មីនេះ បានទាក់ចិត្តមនុស្សម្នាជាច្រើន ដោយក្នុងនោះក៏មានវិនិយោគិនដ៏មានសក្តានុពលមួយចំនួនចាប់អារម្មណ៍ផងដែរ។ ជាក់ស្តែង មានអ្នកវិនិយោគម្នាក់ហ៊ានឱ្យថ្លៃរហូតដល់ ២លានដុល្លារសិង្ហបុរី ស្មើនឹង ១,៤ លានដុល្លារអាមេរិក ដើម្បីទិញរូបមន្តសម្ងាត់នេះ ប៉ុន្តែត្រូវម្ចាស់ហាងធ្វើការបដិសេធដោយអះអាងថា៖

«ជាក់ស្តែង អ្នកវិនិយោគសម្លឹងឃើញផលចំណេញខ្ពស់ភ្លាមៗ ប៉ុន្តែសម្រាប់ពេលឥឡូវនេះ យើងមិនទាន់ចង់ក្លាយជាអ្នកមានឆាប់ ដោយការលក់រូបមន្តសម្ងាត់ឱ្យគេនោះទេ។ ពិតប្រាកដណាស់ ការរកលុយគឺជារឿងសំខាន់ ប៉ុន្តែយើងចង់ផ្តោតលើការធ្វើមីឆាពិសេសឱ្យបានល្អឥតខ្ចោះជាង ដើម្បីធានាបាននូវរសជាតិដើមសម្រាប់ក្មេងៗជំនាន់ក្រោយ» ។ (សម្តីកូនប្រុសម្ចាស់ហាងប្រាប់ក្រុមសារព័ត៌មាន)។

លោកក៏បានបន្ថែមទៀតថា លោកនឹងពិចារណាក្នុងការបង្កើតសាខាមួយផ្សេងទៀត នៅពេលដែលលោកអាចរកឃើញមនុស្សដែលស្រលាញ់ និងចូលចិត្តចម្អិនអាហារឱ្យអ្នកដទៃដូចជាលោក។

គួរឱ្យដឹងផងដែរថា ជាក់ស្តែង មានហាងលក់មីឆាជាច្រើនកន្លែងនៅក្នុងប្រទេសសិង្ហបុរី ប៉ុន្តែមូលហេតុដែលហាងនេះពិសេសខុសប្លែកពីគេ គឺដោយសារតែទឹកជ្រលក់ និងសរសៃមីពិសេសធ្វើដោយពួកគេផ្ទាល់។  

ប្រសិនបើអ្នកមានឱកាសបានទៅលេងកម្សាន្តនៅប្រទេសសិង្ហបុរី អ្នកអាចសាកល្បងទៅញុំាមីឆាពិសេសនេះដែលមានឈ្មោះ Kok Kee Wanton Noodle នៅលើផ្លូវ 30 Foch Road បាន៕

• អាហារ
• ជំនួញ