រាជធានីភ្នំពេញ ៖ ស្ត្រីវ័យចំណាស់ម្នាក់ក្រោយពេលប្ដីស្លាប់ចោលបានមួយរយៈក៏បានយកបុរសម្នាក់ដែលមានវ័យក្មេងជាងគាត់ធ្វើជាប្ដី ហើយក្រោយមកប្ដីវ័យក្មេងនោះមានចិត្តមិនស្មោះត្រង់បានលួចលាក់មានស្នេហាថ្មីជាមួយនារីវ័យក្មេងម្នាក់ទៀត ។ មិនតែប៉ុណ្ណោះ ថែមទាំងបានយកម៉ូតូស៊េរីទំនើប១គ្រឿងដែលគាត់ទើបនឹងទិញឲ្យថ្មីៗយកទៅឌុបស្រីស្នេហ៍ជាញឹកញាប់ទៀត។
ដោយសារតែរារាំងប្ដីវ័យក្មេងយកម៉ូតូទៅឌុបស្រីស្នេហ៍មិនបាន ទើបប្រពន្ធវ័យចំណាស់ក៏ប្ដឹងនគរបាលប៉ុស្តិ៍ចោមចៅ៣ ដោយចោទប្ដីវ័យក្មេងនោះថាជាចោរលួចម៉ូតូ បានបង្កឲ្យមានការភ្ញាក់ផ្អើលយ៉ាងខ្លាំងដល់កម្លាំងនគរបាលខណ្ឌនិងស្រុកចំនួន៤ រួមមាន ១-នគរបាលខណ្ឌពោធិ៍សែនជ័យ ២-នគរបាលខណ្ឌដង្កោ ៣-នគរបាលស្រុកកណ្ដាលស្ទឹង និង៤-នគរបាលស្រុកអង្គស្នួល បានប្រកាសតាមវិទ្យុទាក់ទងដើម្បីចេញពួនស្ទាក់ក្នុងស្ថានភាពប្រុងជើងការ។
ក្រោយមកនគរបាលក៏បានប្រទះឃើញម៉ូតូដែលមានភិនភាគដូចការប្រកាសខាងលើទៅដល់ផ្លូវ៦០ម៉ែត្រ ស្ថិតនៅក្នុងភូមិព្រែកថ្លឹង សង្កាត់ជើងឯក ខណ្ឌដង្កោ រាជធានីភ្នំពេញ ទើបនគរបាលខណ្ឌដង្កោឃាត់បានទាំងមនុស្ស និងម៉ូតូកាលពីវេលាម៉ោង៥ល្ងាចថ្ងៃទី១៩ ខែមីនា ឆ្នាំ២០១៩។
ក្រោយមកបាននាំទៅសាកសួរទើបដឹងថាករណីខាងលើនេះមិនមែនជាករណីចោរលួចម៉ូតូនោះទេ គឺជារឿងស្នេហាត្រីកោណ ព្រោះប្រពន្ធហាមឃាត់ប្ដីមិនឲ្យយកម៉ូតូទៅដឹកស្រីក្មេងមិនបាន ទើបប្ដឹងចោទប្ដីថាជាចោរលួចម៉ូតូដើម្បីឲ្យសមត្ថកិច្ចជួយចាប់ប្ដីនាំមកដោះស្រាយគ្នា។
តាមប្រភពពីនគរបាលបានឲ្យដឹងថា ស្ត្រីជាប្រពន្ធមានវ័យប្រហែលជាង៥០ឆ្នាំ និងបុរសដែលជាប្ដីវ័យក្មេងមានអាយុប្រហែ៣០ឆ្នាំ ហើយអ្នកទាំង២មិនបានប្រាប់ឈ្មោះឱ្យដឹងនោះទេ ។
ប្រភពដដែលបានបន្តថា ស្ត្រីជាប្រពន្ធបាននិយាយប្រាប់នគរបាលថា គាត់គឺជាស្ត្រីមេម៉ាយម្នាក់ដែលត្រូវប្ដីស្លាប់ចោល ក្រោយមកបានជួបបុរសម្នាក់ដែលមានវ័យក្មេងជាងគាត់ ហើយក៏មានចិត្តស្រឡាញ់គ្នាទៅវិញទៅមក រហូតសម្រេចចិត្តយកគ្នាជាប្ដីប្រពន្ធតែម្ដង។
គាត់សង្ឃឹមថាមានប្ដីក្មេងនឹងមានសុភមង្គល និងបានផ្ញើវាសនាលើប្ដីក្មេងនេះតែម្នាក់គត់ ប៉ុន្តែអ្វីៗដែលគាត់គិតគឺខុសស្រឡះនិងខកបំណងទាំងស្រុង ដោយសារតែប្ដីក្មេងមានចិត្តផិតក្បត់ មិនស្មោះត្រង់ជាមួយគាត់ឡើយ គឺប្ដីក្មេងបានទៅលួចលាក់មានស្នេហ៍ថ្មីជាមួយស្រីក្មេងម្នាក់ទៀត ។
ប្រភពដដែលបានបន្តទៀតថា មិនតែប៉ុណ្ណោះ ប្តីរបស់គាត់បានយកម៉ូតូ១គ្រឿងម៉ាកហុងដាឌ្រីម ធុនសេ១២៥ ស៊េរីឆ្នាំ២០១៩ ពណ៌ខ្មៅ ភ្នំពេញ ១HK-៤៩៣៧ ដែលគាត់ទើបទិញឲ្យជិះទៅដឹកស្រីក្មេងជាញឹកញាប់ ដោយមិនគិតការងាររកស៊ីនោះទេ ។ រយៈពេល១ឆ្នាំកន្លងទៅនេះ ប្ដីរបស់គាត់ចាយបំផ្លាញលុយអស់ជាច្រើនថែមទៀតផង។
នគរបាលបានបន្តទៀតថា លុះដល់វេលាម៉ោង៥ល្ងាចថ្ងៃទី១៩ ខែមិនា ឆ្នាំ២០១៩ ប្តីរបស់គាត់បានយកម៉ូតូជិះចេញពីផ្ទះទៅរកដឹកស្រីក្មេងទៀត ដោយសាតែមិនអាចរារាំងឈ្នះ ទើបគាត់សម្រេចចិត្តប្ដឹងនគរបាលប៉ុស្តិ៍ចោមចៅ៣ ខណ្ឌពោធិ៍សែនជ័យឲ្យជួយអន្តរាគមន៍ ពេលនោះក៏មានការប្រកាសតាមវិទ្យុទាក់ទងទៅតាមបណ្ដាគោលដៅនានាឲ្យជួយពួនស្ទាក់ផងដែរ និងបានបង្កឲ្យមានការភ្ញាក់ផ្អើលដល់សមត្ថកិច្ចខណ្ឌនិងស្រុកចំនួន៤ ក្នុងនោះរួមមាន១-នគរបាលខណ្ឌពោធិ៍សែនជ័យ ២-នគរបាលខណ្ឌដង្កោ (ក្នុងរាជធានីភ្នំពេញ) ៣-នគរបាលស្រុកកណ្ដាលស្ទឹង និង៤-នគរបាលស្រុកអង្គស្នួល (ក្នុងខេត្តកណ្ដាល) ចេញពួនស្ទាក់ក្នុងស្ថានភាពប្រុងជើងការ។
លុះក្រោយមក នគរបាលខណ្ឌដង្កោបានប្រទះឃើញម៉ូតូដូចមានភិនភាគខាងលើទៅដល់ផ្លូវ៦០ម៉ែត្រ ស្ថិតនៅក្នុងភូមិព្រែកថ្លឹង សង្កាត់ជើងឯក ខណ្ឌដង្កោ រាជធានីភ្នំពេញ ទើបនគរបាលខណ្ឌដង្កោឃាត់បានទាំងមនុស្សនិងម៉ូតូតែម្ដង។
ប្រភពខាងលើបានបន្តថា ក្រោយពីចាប់ឃាត់ខ្លួនបុរសជាប្តីខាងលើនាំទៅសាកសួរ ទើបដឹងថាមិនមែនជាចោរលួចម៉ូតូនោះទេ គឺជារឿងស្នេហាត្រីកោណ ដោយស្ត្រីចំណាស់ជាប្រពន្ធខឹងប្ដីវ័យក្មេងលួចមានស្រីថ្មី និងយកម៉ូតូថ្មីសន្លាង១គ្រឿងខាងលើ ដែលគាត់ទើបទិញឲ្យ បែរជាយកទៅដឹកស្រីក្មេង ហើយគាត់រារាំងមិនបាន ទើបគាត់ប្ដឹងចោទថាចោរ បង្កឲ្យមានការភ្ញាក់ផ្អើលបែបនេះតែម្ដង។
ក្រោយពេលកើតហេតុ បុរសជាប្ដីវ័យក្មេងត្រូវបានបញ្ជូនទៅកាន់ប៉ុស្តិ៍ចោមចៅ៣ ខណ្ឌពោធិ៍សែនជ័យ ដើម្បីសម្របសម្រួលគ្នាជាមួយប្រពន្ធវ័យចំណាស់ បន្ទាប់ពីធ្វើការសម្របសម្រួលគ្នារួចមក ស្ត្រីជាប្រពន្ធបានសម្រេចចិត្តឈប់ប្ដឹងវិញ រួចហើយប្ដីប្រពន្ធទាំង២នាក់ក៏បាននាំគ្នាចាកចេញពីប៉ុស្តិ៍នគរបាលត្រឡប់ទៅផ្ទះវិញបាត់ទៅ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
