ខេត្តស្ទឹងត្រែង ៖ សេចក្តីរាយការណ៍បឋមបានឲ្យដឹងថា អាណិតទេកូនគេកូនយើងអាយុទើប១៨ខែ ត្រូវបានគេប្រទះឃើញដេកស្លាប់ នៅក្នុងចម្ការស្វាយចន្ទីត្រពាំងត្រយ៉ង ស្ថិតនៅភូមិអន្លង់ស្វាយ ឃុំអូរ៉ៃ ស្រុកថាឡាបរិវ៉ាត់ ខេត្តស្ទឹងត្រែង ជាចម្ការស្វាយចន្ទីរបស់អ្នកស្រី នួន ម៉ៅ។ ហើយបើតាមការបញ្ជាក់ពី សមត្ថកិច្ចថា ក្មេងប្រុសនោះស្លាប់ដោយមូលហេតុអត់អាហារ ព្រោះតែវង្វេងឪពុកម្តាយ។ ក្មេងស្លាប់នោះមានឈ្មោះ វណ្ណា ពេជ្ជរ៉ា ភេទប្រុស អាយុ១៨ខែ។
សេចក្តីរាយការណ៍បន្តថា វេលាម៉ោង៨ព្រឹក ថ្ងៃទី១៦ ខែមីនា ឆ្នាំ២០១៩ មានគ្រួសារមួយពីរនាក់ប្តីប្រពន្ធ បានចេញទៅ ស៊ីឈ្នួលរើសផ្លែចន្ទីឲ្យគេ ដោយបានយកកូនប្រុសអាយុ១៨ខែទៅជាមួយផងដែរ។ នៅពេលឪពុកម្តាយចេញដើររើសគ្រប់ស្វាយចន្ទី បានទុកកូនតូចអាយុទើប១ឆ្នាំកន្លះនោះ ឲ្យនៅលេងក្នុងខ្ទមចាំចម្ការ ដែលពួកគាត់មិនបានទៅឆ្ងាយប៉ុន្មានពីកូនទេ អាចប្រហែលពី៥០ទៅ៦០ម៉ែត្រប៉ុណ្ណោះ ហើយស្ត្រីជាម្តាយតែងតែត្រឡប់ទៅមើលកូន២ទៅ៣ដងដែរ។
នាវេលាម៉ោងថ្ងៃត្រង់ ម្តាយបានត្រឡប់ទៅខ្ទមនោះវិញ ដើម្បីរកដាំបាយដាំទឹកហូបទាំងអស់គ្នា ពេលនោះស្រាប់តែបាត់កូនពីខ្ទមចាំចម្ការ ទើបពួកគាត់រួមទាំងកម្មករជាច្រើននាក់ បានដើររកតែរកមិនឃើញ។ លុះដល់វេលាម៉ោង៨ និង៣០នាទីព្រឹកថ្ងៃទី១៩ ខែមីនា ពោលគឺ៣ថ្ងៃក្រោយមក ទើបគេប្រទះឃើញសាកសពកូនប្រុសនោះ ស្លាប់នៅចំណុចត្រពាំងត្រយ៉ង ស្ថិតនៅភូមិអន្លង់ស្វាយ ឃុំអូរ៉ៃ ស្រុកថាឡាបរិវ៉ាត់ ក្នុងចម្ការចន្ទី របស់អ្នកស្រី នួន ម៉ៅ នោះ។
ក្រោយពីទទួលបានព័ត៌មាននេះ កម្លាំងសមត្ថកិច្ចនគរបាលការិយាល័យជំនាញ សហការជាមួយកម្លាំង អធិការស្រុក និងគ្រូពេទ្យ ចុះទៅពិនិត្យសាកសពខាងលើនោះ ដោយរកមិនឃើញមានស្នាកស្នាម នៅលើដងខ្លួនជនរងគ្រោះទេ។ ហើយបើតាមការសន្និដ្ឋានជាជំហានដំបូងរបស់គ្រូពេទ្យតុលាការគឺលោក ហុង ហៃ បានបញ្ជាក់ថា សពនេះពិតជាស្លាប់ដោយសារការអត់អាហារ អត់បាយអត់ទឹកពិតប្រាកដមែន ព្រោះតែដើរចេញពីខ្ទម ហើយវង្វេងឪពុកម្តាយរកមិនឃើញ។
តែទោះជាយ៉ាងណាការ សន្និដ្ឋាននោះ គ្រាន់តែជាជំហានដំបូងរបស់សមត្ថកិច្ច ប៉ុន្តែអ្វីៗវាស្ថិតនៅលើការស្រាវជ្រាវបន្ត។ សពក្មេងប្រុសនោះ ត្រូវបានសមត្ថកិច្ច ប្រគល់ជូនក្រុមគ្រួសារយកទៅរក្សាទុកដើម្បីរង់ចាំមន្ត្រីជំនាញ នៃនាយកដ្ឋាន បច្ចេកទេស វិទ្យាសាស្ត្រធ្វើលើកោសល្យវិច្ច័យម្ដងទៀត៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]