សៀមរាប៖ ក្រោយពីមានរឿងរ៉ាវដ៏កក្រើក ពាក់ព័ន្ធនឹងករណីជនជាតិជប៉ុន ២នាក់ បានធ្វើសកម្មភាពអារ-ក និងប្លន់យករថយន្តមួយគ្រឿងនៅខេត្តសៀមរាបកាលពីពេលថ្មីៗនេះ ស្រាប់តែលោក Akihiro Kato បានចេញមុខសុំទោសប្រជាជនខ្មែរ តាមរយៈហ្វ៊េសបុករបស់លោកតែម្តង។
លោក Akihiro Kato បានសរសេរថា៖ “ I’m so sorry for this robbery murder… I will donate $1,000 to wife and 4 kids of victim driver” ដែលមានន័យជាភាសាខ្មែរថា “ឱ្យខ្ញុំសុំទោសចំពោះករណីប្លន់សម្លាប់នេះផង...ខ្ញុំនឹងធ្វើការបរិច្ចាគទឹកប្រាក់ចំនួន ១,០០០ដុល្លារ ដល់ប្រពន្ធ និងកូនទាំង៤នាក់របស់ជនរងគ្រោះ”។
សូមបញ្ជាក់ថា លោក Akihiro Kato គឺជាជនជាតិជប៉ុនម្នាក់ដែលស្នាក់នៅប្រទេសកម្ពុជា និងជាម្ចាស់ក្លិបបាល់ទាត់អង្គរថាយហ្គើរនៅខេត្តសៀមរាបផងដែរ។ បុរសជនជាតិជប៉ុនរូបនេះ តែងតែបានរៀបចំសកម្មភាពសប្បុរសធម៌ពាក់ព័ន្ធនឹងបាល់ទាត់ជាច្រើន នៅខេត្តសៀមរាបផ្ទាល់តែម្តង។
គួររម្លឹកផងដែរថា កាលពីថ្ងៃទី ១៥ ខែមីនាកន្លងទៅ មានករណីដែលជនជាតិជប៉ុន ២នាក់ បានធ្វើសកម្មភាពអារ-ក និងប្លន់យករថយន្តពីអ្នករត់តាក់ស៊ីម្នាក់នៅខេត្តសៀមរាប។ ជនសង្ស័យដែលឃាត់ខ្លួនបានរួមមាន៖ ទី១ ឈ្មោះ Ishida Reimon ភេទប្រុស អាយុ ២៤ឆ្នាំ ជនជាតិជប៉ុន និងទី២ ឈ្មោះ Naka Kuki Ryuji ភេទប្រុស អាយុ ២៤ឆ្នាំ ជនជាតិជប៉ុនដូចគ្នា។ ដោយឡែកជនរងគ្រោះដែលបាត់បង់អាយុជីវិតឈ្មោះ ហឹម ចាន់ ភេទ ប្រុស អាយុ ៤០ឆ្នាំ ជាអ្នករត់តាក់ស៊ី មានទីលំនៅភូមិជាន់ត្រាច ឃុំឈូកដាច់ ស្រុកបារាយណ៍ ខេត្តកំពង់ធំ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]