ខេត្តបាត់ដំបង ៖ បុរសម្នាក់ដែលល្បីល្បាញថា មានជាប់សាច់សារលោហិត ជាមួយមន្ត្រីៗមានអំណាចធំប៉ុនមេឃផង ត្រូវបានកម្លាំងនគរបាលផ្នែកអនុវត្តដីកានាំខ្លួនយកទៅប្រគល់ឱ្យស្ថាប័នអយ្យការចាត់ការនីតិវិធី កាលពីរសៀលថ្ងៃទី១៧ មីនា ដែលជាប់ចោទពីបទ«ឆបោក»ប្រាក់រាប់សិបម៉ឺនដុល្លារតាមរយៈការធានា និងជ្រើសរើសមនុស្សរាប់សិបនាក់ ឱ្យចូលក្នុងក្របខណ្ឌនគរបាលជាតិ តែតាមពិត គឺជាការបោកប្រាស់ប្រមូលលុយគេទៅលេងល្បែងកាស៊ីណូហ្មត់ ។
មន្ត្រីផ្នែកអនុវត្តដីកា នៃការិយាល័យព្រហ្មទណ្ឌកំរិតធ្ងន់បានឲ្យដឹងថា ជនឆបោកនោះឈ្មោះស៊ិន សោម អាយុ៤៦ឆ្នាំ រស់នៅភូមិដូង ឃុំបឹងរាំង ស្រុកកំរៀង ។ ជននេះ ត្រូវបានកម្លាំងនគរបាលផ្នែកអនុវត្តដីកានៃស្នងការខេត្ត ចុះទៅនាំខ្លួនតាមដីការបស់ស្ថាប័នអយ្យការអមសាលាដំបូងខេត្តបាត់ដំបង កាលពីថ្ងៃទី១៥ មីនា ២០១៩ ខណៈដែលជននេះ បានព្យាយាមរត់គេចទៅសំងំលាក់ខ្លួននៅឯភូមិគគី ឃុំកោះ ស្រុកពញ្ញាក្រែក ខេត្តត្បូងឃ្មុំ ក្រោយពីបានប្រព្រឹត្តនូវអំពើ«ឆបោក»យកលុយរាប់សិបម៉ឺនដុល្លារ ពីជនរងគ្រោះរាប់សិបនាក់។
យោងតាមដីកាបង្គាប់ឲ្យចូលខ្លួនលេខ១៦ អក របស់លោកឈឺន សុផុន ព្រះរាជអាជ្ញារង អមសាលាដំបូងខេត្តបាត់ដំបង ចុះថ្ងៃទី០១ មីនា ២០១៩ ជនសង្ស័យឈ្មោះស៊ិន សោម នេះ ត្រូវបានចោទប្រកាន់ពីបទ«ឆបោក» ដែលប្រព្រឹត្តកាលពីអំឡុងខែវិច្ឆិកា ឆ្នាំ២០១៨ កន្លងទៅ នៅភូមិ-ឃុំរបស់ខ្លួន តាមរយៈការធានា និងដើរជ្រើសរើសមនុស្សរាប់សិបនាក់ ឱ្យចូលក្របខណ្ឌនគរបាលជាតិ ។
បើតាមប្រភពដែលកោះសន្តិភាពទទូលបាន នៅព្រឹកថ្ងៃទី១៧ មីនា នោះ បានបង្ហើបឲ្យដឹងថា ឈ្មោះស៊ិន សោម នេះ អាងខ្នង ឬសាច់ញាតិជាមន្ត្រីមានអំណាចធំប៉ុនមេឃផង ដែលកន្លងមក គ្មានមន្ត្រីណាហ៊ានក្អកជាមួយទេ ព្រោះខ្លាចជ្រុះបុណ្យស័ក្ដិ ។ ប្រភពដដែលបានឲ្យដឹងទៀតថា ជននេះ គឺជាមេខ្លោងក្នុងការផ្ដើមគំនិតឱ្យមន្ត្រីនគរបាល ដែលមានក្របខណ្ឌស្រាប់ ក្នុងនោះ មានទាំងមន្ត្រីនគរបាលអន្តោប្រវែសន៍ច្រកទ្វារអន្តរជាតិ«ដូង» និងមន្ត្រីនគរបាលក្នុងអធិការស្រុកកំរៀងមួយចំនួនផង ធ្វើជាឈ្មួញកណ្ដាលដើរបំផុសជ្រើសរើសមនុស្សចូលក្របខណ្ឌនគរបាលជាតិ ។
អ្នកទម្លាយព័ត៌មាននេះបានប្រាប់ថា ការជ្រេីសរើសមនុស្សឱ្យចូលធ្វើជាមន្ត្រីនគរបាលជាតិនេះ ពួកក្រុមឆបោកតម្រូវឲ្យបង់ប្រាក់ក្នុងម្នាក់១ម៉ឺនដុល្លារ ឬលើសពីនេះ ដោយក្រុមឆបោកនេះ ធានាយ៉ាងមុតមាំថា នឹងបានជាប់ជាមន្ត្រីក្របខណ្ឌនគរបាលជាតិដោយស្វ័យប្រវត្តិ១០០% ។ ប៉ុន្តែទីបំផុត ក្រោយពីប្រមូលបានប្រាក់យ៉ាងតិចជិតកន្លះលានដុល្លារ ជននេះបានស្ពាយរត់គេចខ្លួនបាត់ស្រមោលស្ងាត់ឈឹង នៅសល់តែក្រុមឈ្មួញកណ្ដាលឆ្លេឆ្លាភ្នែកលើថ្ងាស ។
ជនរងគ្រោះ ដោយសារចាញ់បោកក្រុមទុច្ចរិត ស៊ិន សោម នេះម្នាក់ ដែលសុំមិនប្រាប់ឈ្មោះព្រោះខ្មាស់គេ បានប្រាប់កោះសន្តិភាព តាមទូរស័ព្ទនៅព្រឹកថ្ងៃទី១៧ មីនា នេះថា គាត់បានខាតបង់ប្រាក់អស់១២,០០០ដុល្លារ ដោយសារតែជឿលើការជ្រើសរើសមន្ត្រីនគរបាលនេះ ។ គាត់និយាយថា មន្ត្រីនគរបាលម្នាក់(សុំលាក់ឈ្មោះ) ជាអ្នកធានាក្នុងរឿងនាំចូលក្រមខណ្ឌនគរបាលនេះ ជាថ្នូរនឹងប្រាក់ចំនួន១២,០០០ដុល្លារ ដោយមន្ត្រីទុច្ចរិតនោះ ធានាអះអាងថា នឹងបានជាប់ជាមន្ត្រីក្របខណ្ឌ ដោយស្វ័យប្រវត្តិ១០០% មិនចាំបាច់ប្រលងប្រណាំងស្អីទេ ។
មន្ត្រីនោះអ៊ួតថា អ្នកដែលចាំទទូលនិងនាំចូលក្របខណ្ឌ នោះ គេមានខ្សែធំ និងមានសាច់ញាតិជាលោកធំដ៏មានអំណាចទៀតផង ដូច្នេះ១០០% ដឹងតែជាប់ហើយ កុំបាច់បារម្ភធ្វើអី ។ ប៉ុន្តែចាប់តាំងពីខែវិច្ឆិកា២០១៨ រហូតមកដល់ពេលនេះ គ្មានដំណឺងអំពីក្របខណ្ឌនគរបាលជាតិនេះទេ ហើយគាត់បានព្យាយាមទាក់ទងទៅអ្នកជ្រើសរើស និងយកប្រាក់ពីគាត់ជា១ម៉ឺនដុល្លារនោះជាបន្តបន្ទាប់ បានត្រឹមតែចម្លើយបោកប្រាស់ត្រឡប់មកវិញតែប៉ុណ្ណោះ។
មន្ត្រីម្នាក់ដែលសុំមិនប្រាប់ឈ្មោះដែរបានប្រាប់កោះសន្តិភាពដែរថា ក្រុមជនឆបោកដែលមានមេខ្លោងឈ្មោះស៊ិន សោម នេះ បានដើរបោកប្រាសប្រជាពលរដ្ឋច្រើនខេត្តណាស់ តាមរយះការធានាច្រើសរើសមន្ត្រីក្របខ័ណ្ឌនគរបាលជាតិនេះ។ ប៉ុន្តែជនរងគ្រោះខ្លះបានដាក់ពាក្យប្ដឹង រីឯខ្លះទៀតមិនហ៊ានប្ដឹងទេ ព្រោះខ្លាចខ្មាសគេ។
ដោយឡែក សម្រាប់អ្នកនៅខេត្តបាត់ដំបង ដែលគេប៉ាន់ស្មានត្រូសៗថា មានជនរងគ្រោះក្នុងអំពើឆបោកនេះយ៉ាងតិចជាង៥០នាក់ ដែលម្នាក់ៗអស់ប្រាក់ចាប់ពី១ម៉ឺនដុល្លាឡើងទៅ។ មន្ត្រីដដែលបានបញ្ជាក់ថា ពេលនេះមានឈ្មួញកណ្ដាលមួយចំនួនកំពុងវ័ណ្ឌកដោយសារដើរច្រើសរើសមន្ត្រីក្របខ័ណ្ឌបន្តចង់បានកុំមីស្យុង ក្រោយពីមេខ្លោងឈ្មោះស៊ិន សោម នោះស្ពាយប្រាក់ជិតកន្លះលានដុល្លាគេចខ្លួនបាត់។
ជនឆបោកឈ្មោះស៊ិន សោម ត្រូវបានគេលាតត្រដាងអំពីប្រវត្តិអាស្រូវខ្លះៗថា បុរសនេះពិតជាសំបូរមន្ត្រីមានអំណាចចាំជួយធ្វើជាខ្នងបង្អែកក្នុងសកម្មភាពប្រព្រឹត្តបទល្មើសនេះមែន។ ជននេះបានដើរឆបោក តាមរយៈការដើរច្រើសរើសមន្ត្រីក្របខណ្ឌនគរបាលជាតិនេះស្ទើរគ្រប់ខេត្ត រាជធានី។ ហើយជននេះក៏ជាមនុស្សពុល នឹងល្បែងកាស៊ីណូយ៉ាងវក់វីដែរ។
បើតាមសមត្ថកិច្ចបានបង្ហើបឲ្យដឹងថា ជនឆបោកឈ្មោះស៊ិន សោម បានសារភាពពេលត្រូវចាប់ខ្លួនថា លុយរាប់សិបម៉ឺនដុល្លាដែលខ្លួននិងបក្សពួកបោកបានពីជនរងគ្រោះរាប់រយនាក់នោះ គឺខ្លួនបានយកទៅលេងល្បែងកាស៊ីណូនៅព្រំដែនយូនអស់ហើយ។ ប៉ុន្តែជាមួយនឹងការចាប់ខ្លួននេះ សមត្ថកិច្ចបានរឹបអួសយកទ្រព្យសម្បត្តិបានមួយចំនួន ដូចជារថយន្តស៊េរីទំនើបនិងម៉ូតូជាដើម។
យ៉ាងណាក៏ដោយ ពេលនេះជនសង្ស័យឈ្មោះស៊ិន សោម ត្រូវបានកម្លាំងនគរបាលផ្នែកអនុវត្តដីកា បញ្ជូនខ្លួនទៅកាន់តុលាការ ដើម្បីសួរនាំហើយ។ បើគិតត្រិមម៉ោង៤រសៀលថ្ងៃទី១៧មិនា ជនសង្ស័យរូបនេះកំពុងត្រូវបានសួរនាំ នៅក្នុងបន្ទប់ចៅក្រមស៊ើបសួរនៅឡើយ។ ប៉ុន្តែបើតាមប្រភពពីសមត្ថកិច្ចថា ជនឆបោករូបនេះចៀសមិនផុតពីឃុំខ្លួនបណ្ដោះអាសន្ននៅក្នុងគុកនោះទេ ព្រោះដើមបណ្ដឹងច្រើនណាស់ដែលចាំទាមទាសំណងវិញ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]