តោឈឺ! Chelsea បាក់ស្បាតក្រោមថ្វីជើង Everton ២-០ ធ្វើឱ្យក្តីសង្ឃឹម Top4 កាន់តែឃ្លាតឆ្ងាយ! (មានវីដេអូ)

អង់គ្លេស៖ គ្រាប់បាល់ ២គ្រាប់របស់ក្រុម Everton កាលពីយប់មិញ សមល្មមនឹងបំបាក់ក្រុមតោខៀវ Chelsea ដែលកំពុងតែស្រវ៉េស្រវ៉ាក្នុងការឈានទៅកាន់ចំណាត់ថ្នាក់ Top4 ម្តងទៀត។ ដោយឡែកលោក Maurizio Sarri បាននិយាយក្រោយបរាជ័យនោះថា ក្រុមរបស់លោកនៅមានកម្រិតនៅឡើយ។

ការប្រកួតទល់នឹង Everton កាលពីយប់មិញនេះ ក្រុមតោខៀវហាក់ធ្វើមិនបានល្អទាល់តែសោះ បើទោះបីជាមានឱកាសគ្រប់គ្រងបាល់បានច្រើនជាងក្រុមម្ចាស់ផ្ទះយ៉ាងណាក្តី។ គ្រូបង្វឹករបស់ Chelsea បានពោលថា៖ “សឹងតែពេញមួយរដូវកាលនេះ ក្រុមយើងពិតជាធ្វើបានល្អនៅ ៤៥នាទីដំបូងគ្រប់ប្រកួត ប៉ុន្តែពេលចាប់ផ្តើមចូលដល់តង់ទី២ អ្វីៗគ្រប់យ៉ាងហាក់នៅទ្រឹងមួយកន្លែង ដែលខ្ញុំផ្ទាល់ក៏មិនយល់ដែរថាមកពីហេតុអ្វី”? គួរបញ្ជាក់ថា គ្រាប់បាល់ជ័យជម្នះ ២គ្រាប់របស់ Everton យប់មិញនេះ ធ្វើបានដោយកីឡាករ Richarlison និងកីឡាករ Sigurdsson ដែលនេះជាជ័យជម្នះក្នុងដីជាលើកដំបូងរបស់ Everton បន្ទាប់ពីខកខានឈ្នះក្នុងផ្ទះចាប់តាំងពីខែមករាមកម្ល៉េះ។

សូមទស្សនាវីដេអូសង្ខេបការប្រកួតនៅខាងក្រោម៖