រាជធានីភ្នំពេញ ៖ បុរសម្នាក់ជាមន្ត្រីនគរបាលម្នាក់រងរបួសដាច់ម្រាមដៃចង្អុលខាងឆ្វេង បន្ទាប់ពីអាមេកាំភ្លើងខ្លីចូលគ្រាប់ ដើម្បីការពារលុយចំណងដៃការកូន បែរជារាលកៃផ្ទុះរបួសដៃបង្កឱ្យមានការភ្ញាក់ផ្អើលកាលពីម៉ោង១១យប់ ថ្ងៃទី១៥ ខែមីនា ឆ្នាំ២០១៩ ត្រង់ចំណុចវិមានពិភពថ្មីសែនសុខ អគារA ក្បែរផ្សារទំនើបអ៊ីអនទី២ ស្ថិតក្នុងសង្កាត់ភ្នំពេញថ្មី ខណ្ឌសែនសុខ។
ជនរងគ្រោះខាងលើឈ្មោះ ផង់ សុផល ភេទប្រុស អាយុ៥០ឆ្នាំ ជាមន្ត្រីនគរបាលសក្ដិ៣ ផ្នែកចរាចរណ៍ និងសណ្តាប់សាធារណៈនៃអគ្គស្នងការនគរបាលជាតិ ស្នាក់នៅភូមិថ្មគោល សង្កាត់ចោមចៅទី៣ ខណ្ឌពោធិ៍សែនជ័យ។
តាមប្រភពពីសមត្ថកិច្ចមូលដ្ឋានឲ្យដឹងថា នៅមុនកើតហេតុ មន្ត្រីនគរបាលខាងលើបានរៀបចំកម្មវិធីអាពាហ៍ពិពាហ៍ឱ្យកូនស្រីរបស់គាត់នៅត្រង់ចំណុចកើតហេតុ ដោយមានភ្ញៀវកិត្តិយសជាច្រើនកុះករមកចូលរួម ពិសារអាហារ រាំរែក និងច្រៀងកំសាន្តយ៉ាងសប្បាយរីករាយ ហើយកម្មវិធីនេះក៏បានចប់ទៅដោយរលូន ចំណែកឯភ្លៀវកិត្តិយសក៏នាំគ្នាត្រលប់ទៅផ្ទះវិញរៀងៗខ្លួនបាត់អស់ទៅ។ លុះដល់វេលាកើតហេតុ មន្ត្រីនរគបាលដែលជាឪពុកក៏ប្រមូលលុយចំណងដៃទាំងអស់យកទៅទុកក្នុងរថយន្តដែលចតនៅខាងក្រោមអគារ A ដើម្បីយកត្រលប់ទៅផ្ទះវិញ។
ប្រភពដដែលបន្តថា ខណៈនោះមានលឺដំណឹងថា មានជនមិនស្គាល់មុខបានចូលមកក្នុងទីតាំងខាងលើ ធ្វើឲ្យមន្ត្រីនរគបាលរូបនោះភ័យខ្លាចត្រូវគេប្លន់ ឬអាចមានករណីផ្សេងទៀតកើតឡើងជាយថាហេតុ ក៏ដកកាំភ្លើងខ្លីម៉ាក K54 មួយដើមរបស់គាត់យកមកអាមេបញ្ចូលគ្រាប់ទុក ដើម្បីការពារខ្លួន និងលុយចំណងដៃរបស់កូន តែបែរជារាលកៃកាំភ្លើងបណ្តាលឲ្យផ្ទុះចំម្រាមចង្អុលដៃខាងឆ្វេងដាច់ពាក់កណ្តាល ។ ភ្លាមៗនោះមន្ត្រីនរគបាលខាងលើ ក៏ត្រូវសាច់ញាតិក្រុមគ្រួសារដឹកយកទៅព្យាបាលភ្លាមៗនៅឯគ្លីនិកផងដែរ ។
ក្រោយពេលកើតហេតុសមត្ថកិច្ចមូលដ្ឋានក៏បានចុះទៅដល់កន្លែងកើតហេតុ និងចុះទៅធ្វើការសាកសួរមន្ត្រីនរគបាលខាងលើដែលបានទៅព្យាបាលនៅឯគ្លីនិក ដើម្បីធ្វើកំណត់ហេតុបញ្ចូនទៅថ្នាក់លើជាបន្តទៀត៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
