ខេត្តរតនគិរី ៖ គ្រោះថ្នាក់ចរាចរណ៍មួយបានកើតឡើង កាលពីថ្ងៃទី១៧ មីនា វេលា ម៉ោង១០និង១៥នាទីព្រឹក នៅចំណុចប៉ុស្តិ៍រដ្ឋបាលសង្កាត់ឡាបានសៀក ដោយម៉ូតូមួយគ្រឿងបុករថយន្តពីក្រោយ ហើយមន្ត្រីប៉ូលិសបានឃាត់ខ្លួនស្ត្រីក្មេងម្នាក់ ដែលជាម្ចាស់ម៉ូតូដើម្បីសួរនាំ ។
លោក កែវ សុផាតថន នាយរងប៉ុស្តិ៍រដ្ឋបាលសង្កាត់ឡាបានសៀកបានឱ្យដឹងថា ម្ចាស់ម៉ូតូឈ្មោះ យ៉ែម ធីដា អាយុ១៨ឆ្នាំ មុខរបរលក់គ្រឿងទេសក្នុងផ្សារបានលុង រស់នៅភូមិអូរទទឹង ឃុំរបាំងមួយ ស្រុកលំផាត់ ម៉ូតូរបស់នាងម៉ាកឌ្រីមសេ១២៥ ស៊េរី២០១១ ពណ៌ខ្មៅ ។ ចំណែកម្ចាស់រថយន្តឈ្មោះ ឡុក វ៉ាន់ថន ភេទប្រុស អាយុ៤៤ឆ្នាំ ជាមន្ត្រីពេទ្យក្រុងបានលុង រស់នៅក្នុងភូមិ៦ សង្កាត់ឡាបានសៀក ក្រុងបានលុង រថយន្តដែលត្រូវម៉ូតូបុកពីក្រោយម៉ាកកាមរីបាឡែន ខណៈចតនៅលើចិញ្ចើមផ្លូវ ។
មន្ត្រីប៉ូលិសដដែលបន្តទៀតថា រថយន្តខាងលើរងការខូចខាតខាងក្រោយផែ្នកខាងឆ្វេងបែកស្តុបមួយ និងក្រពឹតកាងខាងឆ្វេង ឯម៉ូតូវៀចកង់ខាងមុខ និងបាក់គម្របខាងមុខ ឯម្ចាស់ម៉ូតូរងរបួសបែកបបូរមាត់ត្រូវគ្រូពេទ្យដេរអស់៣ថ្នេរ និងសងថ្លៃខូចខាតរថយន្ត ៣៧០ដុល្លារ ។ម្ចាស់ម៉ូតូបានប្រាប់សមត្ថកិច្ចថា មូលហេតុរូបគេដែលបើកម៉ូតូបុកគូទរថយន្តនោះ គឺនាងរវល់តែងាកក្រោយទើបបណ្តាលឱ្យសយទាំងព្រឹកបែបនេះ ។ ករណីនេះត្រូវមន្ត្រីប៉ូលិសធ្វើការដោះស្រាយគ្នា នៅប៉ុស្តិ៍សង្កាត់ឡាបានសៀក រួចក៏ទៅផ្ទះរៀងៗខ្លួន ៕
ដោយ ៖ ប្រុសកោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]