បុរសម្នាក់ ធ្លាក់ពីលើស្ពាន ព្រោះតែចង់ថតរូប Selfie ឡូយខ្លាំងពេក (មានវីដេអូ)

ម៉ាឡេស៊ី៖ យោងតាមប្រភពសារព័ត៌មានម៉ាឡេស៊ីបានរាយការណ៍ថា បុរសអាយុ ៣៦ឆ្នាំម្នាក់ ប៊ិះបាត់បង់ជីវិត ព្រោះតែរូបលោកចង់ថតរូប Selfie នៅលើស្ពាន Darul Hana ក្នុងរដ្ឋ Sarawak។

ប្រភពដដែលបានបន្តថា មូលហេតុដែលរូបលោកធ្លាក់ពីលើស្ពាន ព្រោះតែលោកបានឡើងទៅដល់តំបន់ហាមឃាត់នៅលើស្ពាននោះ ដើម្បីថតរូប Selfie ក្រោយមកក៏រអិលជើងធ្លាក់ចូលទន្លេយកតែម្តងនៅវេលាម៉ោងប្រមាណ ៨:៥០ នាទីយប់ កាលពីថ្ងៃទី ១៤ ខែមីនា ឆ្នាំ២០១៩ កន្លងទៅនេះ។

ក្រោយកើតហេតុ បុរសខាងលើត្រូវបានជួយសង្រ្គោះដោយបុរសម្នាក់ឈ្មោះ Busrah Ede ខណៈពេលដែលលោកបានឮសំឡេងស្រែកផ្អើលឆោឡោនៅតំបន់នោះ។  

គួរឱ្យដឹងផងដែរថា លោក Busrah Ede គឺជាអ្នករកស៊ីចែវទូកក្នុងតំបន់នោះ។

លោក Busrah Ede បាននិយាយថា នៅពេលលោកបានឮសំឡេងផ្អើលឆោឡោភ្លាម លោកក៏ចេញទូកទៅជួយសង្រ្គោះ បុរសរងគ្រោះនោះភ្លាម។ ក្រោយមកលោកក៏បាននាំរូបគេឡើងគោក។ 

បន្ទាប់មក ក្រុមអ្នកជួយសង្រ្គោះ និងសមត្ថកិច្ចពាក់ព័ន្ធបានមកដល់កន្លែងកើតហេតុភ្លាមៗ បន្ទាប់ពីទទួលបានទូរស័ព្ទប្រមាណម៉ោង ៩:០០ នាទីយប់។

យ៉ាងណាមិញ ជនរងគ្រោះត្រូវបានបញ្ជូនទៅមន្ទីរពេទ្យដើម្បីសង្រ្គោះហើយ។ បច្ចុប្បន្នរូបគេកំពុងតែសម្រាកព្យាបាលនៅក្នុងមន្ទីរពេទ្យ។ 

គួរឱ្យដឹងផងដែរថា នេះមិនមែនជាលើកទីមួយទេ ដែលមានឧបទ្ទវហេតុបែបនេះកើតឡើង។ តួយ៉ាង កាលពីខែឧសភា ឆ្នាំ២០១៨ កន្លងទៅ ក៏ធ្លាប់មានសិស្សម្នាក់ បានធ្លាក់ចូលទៅក្នុងទន្លេដូចគ្នាដែរ បន្ទាប់ពីរូបគេបានប្រលែងគ្នាលេងជាមួយមិត្តភក្កិនៅលើស្ពាន។

ដូច្នេះ សូមចៀសឱ្យឆ្ងាយពីការប្រលែងគ្នាលេង ឬទៅថតរូប Selfie នៅលើស្ពាន ឬក៏កន្លែងនានាដែលអាចបង្កគ្រោះថ្នាក់ដល់លោកអ្នក៕  

ទស្សនាវីដេអូខាងក្រោម៖

• វីដេអូ