YG នឹងចាត់វិធានការ តាមត្រូវផ្លូវច្បាប់ ប្រសិនបើមានព័ត៌មានមិនពិត ពីតារាស្រីនៅក្នុងផលិតកម្ម ពាក់ព័ន្ធរឿងក្តីវីដេអូរបស់ Jung Joon Young ទៀត!

កូរ៉េខាងត្បូង៖ ថ្មីៗនេះ មានព័ត៌មានដ៏ក្តៅគគុកទាក់ទងនឹង រឿងក្តីតារាប្រុស Jung Joon Young បានរំលោភបំពានលើនារី និងថតទុកជាវីដេអូ ដែលធ្វើឲ្យអ្នកគាំទ្រមួយចំនួនធំមានការខឹងសម្បារយ៉ាងខ្លាំង។

ជាក់ស្តែងនៅថ្ងៃទី១៣ ខែមិនានេះ ខាងផលិតកម្ម YG Entertainment បានចេញសេចក្តីប្រកាសទាក់ទងនឹងព័ត៌មានដែលមិនពិត ថាសមាជិកក្រុម BLACKPINK និងតារាស្រីផ្សេងៗទៀត នៅក្នុងផលិតកម្មបានជាប់ពាក់ព័ន្ធ នឹងរឿងវីដេអូនោះ។

ដោយ YG Entertainment បានប្រកាសថា « តាមដែលឃើញព័ត៌មានផ្សេងៗ មានជាប់ទាក់ទងជាមួយតារាស្រី នៅក្នុងផលិកម្មទាំងអស់ និងកំពុងតែចែកចាយបន្តនៅលើប្រព័ន្ធអ៊ីនធើណែត ដែលទាំងនេះមិនមែនជាការពិតទេ ហើយក៏ជាព័ត៌មានដែលមានការប៉ះពាល់ខ្លាំងបំផុត។

ដំបូងយើង គ្រាន់តែគិតថាវាជាព័ត៌មានអត់ប្រយោជន៍ ប្រហែលជាគ្មានអ្នកចាប់អារម្មណ៍ទេ តែពេលនេះ យើងបានឃើញព័ត៌មានទាំងនេះ នៅលើប្រព័ន្ធអ៊ីនធើណែតជាច្រើន ដែលវាអាចប៉ះពាល់ដល់កេរ្តិ៍ឈ្មោះ តារាស្រីនៅក្នុងផលិតកម្ម ដូច្នេះហើយយើងសូមប្រកាសថា ពួកយើងនឹងចាត់វិធានការតាមផ្លូវច្បាប់ ទៅអ្នកដែលបង្កើតព័ត៌មានបែបនេះ និងអ្នកដែលចែកចាយផងដែរ អរគុណ»៕

• តារាកូរ៉េ