រាជធានីភ្នំពេញ ៖ តាមសេចក្តីរាយការណ៍ព័ត៌មានបឋមបានឱ្យដឹងថា មានករណីជនសង្ស័យម្នាក់ធ្វើសកម្មភាពឆក់កាបូបពីស្ត្រីជនជាតិជប៉ុនម្នាក់បានសម្រេចនៅម្តុំអង់តែនផ្សារធីខេ ក្នុងសង្កាត់បឹងកក់១ ខណ្ឌទួលគោក ដោយសារទូរស័ព្ទដែលនៅក្នុងកាបូបនោះមានភ្ជាប់ប្រព័ន្ធGPS ធ្វើឱ្យស្ត្រីរងគ្រោះនិងប្តីព្រមទាំងមិត្តភក្តិនាំគ្នាតាមរក ស្រាប់តែប្រទះឃើញជនសង្ស័យកំពុងតែអង្គុយលើម៉ូតូ ពេលនោះជនសង្ស័យភ័យក៏ផ្តួលម៉ូតូរត់គេចខ្លួនបាត់ បន្សល់ទុកតែម៉ូតូមួយគ្រឿងនៅកន្លែងកើតហេតុ។
ហេតុការណ៍តាមរក និងប្រទះឃើញជនសង្ស័យខាងលើបានបង្កឱ្យមានការភ្ញាក់ផ្អើលកើតឡើងកាលពីវេលាម៉ោង៤រសៀលថ្ងៃទី១២ មីនា ឆ្នាំ២០១៩ នៅចំណុចភូមិស្ពានខ្ពស់ សង្កាត់គីឡូម៉ែត្រលេខ៦ ខណ្ឌឫស្សីកែវ ។
ជនរងគ្រោះជាម្ចាស់កាបូបឈ្មោះ យូ ជីយោ ភេទស្រី អាយុ៤៦ឆ្នាំ ជាជនជាតិជប៉ុន មុខរបរនៅផ្ទះ ស្នាក់នៅសង្កាត់បឹងកក់២ ។ ចំណែកនៅក្នុងកាបូបមួយដែលត្រូវជនសង្ស័យឆក់យកទៅបាត់នោះ មានលុយចំនួន៣០ដុល្លារ ទូរស័ព្ទចំនួន២គ្រឿង និងមានឯកសារមួយចំនួនទៀត។
តាមសេចក្តីរាយការណ៍បានឱ្យដឹងថា មុនពេលកើតហេតុ គឺស្ត្រីរងគ្រោះជាជនជាតិជប៉ុនធ្វើដំណើរដោយថ្មើរជើងនៅមុខផ្សារធីខេ ក្នុងសង្កាត់បឹងកក់១ ខណ្ឌទួលគោក ស្រាប់តែមានជនសង្ស័យម្នាក់ជិះម៉ូតូមួយគ្រឿងម៉ាកនិច ពណ៌ទឹកប្រាក់ ពាក់ស្លាកលេខ ភ្នំពេញ ១HS-៩២៦១ ធ្វើសកម្មភាពឆក់កាបូបបានសម្រេច ហើយនៅក្នុងកាបូបនោះមានទូរស័ព្ទភ្ជាប់ប្រព័ន្ធ GPS ។
តាមសេចក្ីរាយការណ៍បានបន្តទៀតថា តាមរយៈប្រព័ន្ធ GPS នោះ គឺស្ត្រីរងគ្រោះជាជនជាតិជប៉ុន និងប្តី ព្រមទាំងមិត្តភក្តិជាអ្នកបកប្រែតាមស្វែងរក ក៏ប្រទះឃើញជនសង្ស័យនិងបក្ខពួកសរុបមានគ្នាចំនួន៣នាក់កំពុងឈប់ម៉ូតូចំនួន២គ្រឿងនៅតាមដងផ្លូវ ក្នុងនោះម៉ូតូមួយគ្រឿងបានធ្វើសកម្មភាពឆក់ និងម៉ូតូមួយគ្រឿងជាអ្នកបិទគូទ បន្ទាប់ពីជនសង្ស័យក្រឡេកឃើញជនរងគ្រោះ ធ្វើឱ្យជនសង្ស័យភ័យបានរត់គេចខ្លួនចោលម៉ូតូមួយគ្រឿងតែម្តង។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]