រាជធានីភ្នំពេញ ៖ បុរសជនជាតិចិនម្នាក់ត្រូវបានមិត្តភក្តិរួមការងារប្រទះឃើញស្លាប់នៅក្នុងបន្ទប់ និងមានស្នាមអារ.កឈាមហូរឡើងកក បង្កឲ្យភ្ញាក់ផ្អើលកាលពីវេលាម៉ោង៩យប់ ថ្ងៃទី១០ ខែមីនា ឆ្នាំ២០១៩ នៅក្នុងបន្ទប់កន្លែងសម្រាកក្នុងឃ្លាំងបរិវេណទល់មុខរោងចក្រសឺពីយ៉ា ខេមបូឌែ ហ្គាមេន ដែលមានទីតាំងនៅ តាមផ្លូវលំ ក្នុងភូមិត្រពាំងជ្រៃ សង្កាត់កាកាបទី២ ខណ្ឌពោធិសែនជ័យ ។
បុរសដែលស្លាប់ខាងលើនេះមិនទាន់ស្គាល់ឈ្មោះនោះទេ គ្រាន់តែដឹងថាជាជនជាតិចិន រស់នៅក្នុងបន្ទប់ឃ្លាំងផ្ទុកអីវ៉ាន់របស់រោងចក្រសឺពីយា ។
តាមព័ត៌មានបឋមបានឱ្យដឹងថា បន្ទប់សម្រាកក្នុងឃ្លាំងស្តុកអីវ៉ាន់រោងចក្រខាងលើមានបុរសជាជនជាតិចិនស្នាក់នៅចំនួន២នាក់ ហើយកាលពីយប់ថ្ងៃទី៩ ខែមីនា ឆ្នាំ២០១៩ បុរសជនជាតិចិនម្នាក់មិនបានស្នាក់នៅជាមួយឡើយ រវល់តែទៅផ្ទះសង្សារពេញមួយថ្ងៃ ហើយព្យាយាមទូរស័ព្ទមកជនរងគ្រោះដែរ តែមិនលើកហើយឆាតក៏មិនឆ្លើយតប ។
ប្រភពដដែលបានបន្តថា រហូតមកដល់យប់ថ្ងៃទី១០ ខែមីនា មុនមានការភ្ញាក់ផ្អើល គឺបុរសជាជនជាតិចិនម្នាក់ និងជាមិត្តរួមការងារដែលស្នាក់នៅជាមួយជនរងគ្រោះខាងលើបានត្រឡប់មកដល់រោងចក្រវិញ ហើយចូលមកបន្ទប់សម្រាកក្នុងឃ្លាំងដាក់អីវ៉ាន់នោះ តែបានជាប់សោ ហើយបុរសជនជាតិចិនម្នាក់នោះព្យាយាមទូរស័ព្ទរកជនរងគ្រោះ តែមិនលើក ទើបបុរសជនជាតិចិននោះហៅសន្តិសុខមកជួយគាស់ទ្វារដើម្បីចូលក្នុងបន្ទប់នោះ ស្រាប់តែប្រទះឃើញជនរងគ្រោះដេកស្លាប់ទាំងមានស្នាមអារ.កឈាមហូរឡើងកកបាត់ទៅហើយ ទើបបង្កការភ្ញាក់ផ្អើលឆោឡោ និងរាយការណ៍ប្រាប់សមត្ថកិច្ចភ្លាមៗផងដែរ ។
បន្ទាប់ពីទទួលបានសេចក្តីរាយការណ៍ខាងលើ កំលាំងសមត្ថកិច្ចគ្រប់ជំនាញបានចុះមកត្រួតពិនិត្យករណីខាងលើ ដោយបាននាំជនជាតិចិនប្រមាណ៣នាក់យកទៅសាកសួរនៅប៉ុស្តិ៍នគរបាលភ្លាមៗផងដែរ ដោយមានអ្នកបកប្រែភាសាចិនខាងលើផងដែរ។ ចំណែកឯសពជនជាតិចិនខាងលើត្រូវបានជំនាញព្រហ្មទណ្ឌខណ្ឌពោធិ៍សែនជ័យសហការចូលរួមជាមួយជំនាញចក្ខុរាជធានីភ្នំពេញធ្វើការពិនិត្យសពជនរងគ្រោះខាងលើ ភ្លាមៗនោះផងដែរ ។
ពាក់ព័ន្ធនឹងករណីខាងលើ សមត្ថកិច្ចជំនាញពុំទាន់បញ្ជាក់ថាជាករណីឃាតកម្ម ឬជាករណីអត្តឃាតនៅឡើយទេ ព្រោះសមត្ថកិច្ចកំពុងស្រាវជ្រាវ។
ក្រោយពេលកើតហេតុ សពជនជាតិចិនខាងលើត្រូវបានសមត្ថកិច្ចជំនាញព្រហ្មទណ្ឌខណ្ឌពោធិ៍សែនជ័យ និងជំនាញចក្ខុរាជធានីភ្នំពេញបានយកសពទៅតម្កល់នៅវត្តស្ទឹងមានជ័យ ដើម្បីរង់ចាំសាច់ញាតិមកទទួលយកទៅធ្វើបុណ្យតាមប្រពៃណី ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]