ចិន៖ ក្មេងប្រុសអាយុ ១២ ឆ្នាំម្នាក់រស់នៅក្នុងទីក្រុង Luoyang ខេត្តហឺណាន ត្រូវបានម្តាយអប្រិយម្នាក់វាយ និងបោះបង់ចោលនៅលើចិញ្ចើមផ្លូវ ព្រោះតែរូបគេប្រលងមិនបាន ៩៥ ពិន្ទុ។
ហេតុការណ៍ដ៏ហួសចិត្តនេះបានកើតឡើងកាលពីថ្ងៃទី២២ ខែកុម្ភៈកន្លងទៅ នៅពេលដែលអ្នកដំណើរម្នាក់បានឃើញម្តាយមួយរូប កំពុងតែវាយធ្វើបាបកូននៅលើផ្លូវ Luoyang។ ភ្លាមៗនោះ គាត់ក៏បានប្តឹងប៉ូលិស។ ក្រោយមកប៉ូលិសក៏បានដល់កន្លែងកើតហេតុតែមិនបានឃើញម្តាយនោះទេ ពោលគឺឃើញតែកូនម្នាក់តែប៉ុណ្ណោះ។
យោងតាមសម្តីសាក្សីនៅកន្លែងកើតហេតុបានឱ្យដឹងថា ស្រ្តីម្នាក់នោះស្រាប់តែកំរោលចូល រួចក៏វាយកូនផង ស្តីឱ្យគេផង។ សំណាងល្អ ប៉ូលិសបានរកឃើញក្មេងនេះនៅលើផ្លូវ Nanjing–Luoyang Expressway។
យោងតាមវីដេអូខាងក្រោមបានឱ្យដឹងថា ប៉ូលិសបានសួរក្មេងប្រុសម្នាក់នោះថា៖
«តើអ្នកដែលវាយឯងគឺជាម្តាយរបស់ឯងមែនទេ?»
គេក៏ឆ្លើយតបថា៖
«ខ្ញុំប្រលងមិនបានពិន្ទុល្អ។»
ជាក់ស្តែង ម្តាយរបស់ក្មេងប្រុសនេះ ចង់ឱ្យកូនប្រលងបានពិន្ទុយ៉ាងតិចណាស់ក៏ ៩៥ពិន្ទុដែរ ប៉ុន្តែគេប្រលងបានតែ ៨១ពិន្ទុ ទើបមានរឿងនេះកើតឡើង។ ក្រោយមក ប៉ូលិសបានទាក់ទងទៅម្តាយបង្កើតរបស់ក្មេងប្រុសម្នាក់នេះ បន្ទាប់ពីកំណត់ស្លាកលេខឡានរបស់នាងបាន។ តែស្រ្តីម្នាក់នេះបែរជាមិនចង់ឱ្យកូនត្រលប់ទៅផ្ទះវិញទេ បែរជានិយាយប្រាប់ប៉ូលិសថា នាងមិនចង់បានកូនម្នាក់នេះទេ។
ម្តាយអប្រិយនោះបាននិយាយថា៖
«ខ្ញុំមិនត្រូវការកូននេះទៀតទេ។ លោកចង់ធ្វើអីក៏ធ្វើទៅចុះ។ លោកចង់ប្តឹងខ្ញុំក៏ប្តឹងទៅចុះ។» (នេះជាសម្តីចេញពីវីដេអូ)
សមត្ថកិច្ចមានការភ្ញាក់ផ្អើលជាខ្លាំងនូវអ្វីដែលលោកស្តាប់ឮ ហើយលោកក៏តបវិញថា៖
«នាងពិតជាម្តាយម្នាក់គ្មានការទទួលខុសត្រូវពិតមែន។»
«នាងគួរតែមានចិត្តអំនត់ និងផ្តល់ដំបូន្មានឱ្យកូនប្រុសនាង ប្រសិនបើគេធ្វើខុសនូវរឿងអ្វីមួយ។ ហើយនាងមិនគួរបោះបង់គេចោលនៅតាមចិញ្ចើមផ្លូវបែបនេះទេ។» (នេះជាសម្តីចេញពីវីដេអូ)
មួយម៉ោងក្រោយមក ពូរបស់ក្មេងប្រុសនេះ ក៏បានមកទទួលរូបគេនៅប៉ុស្តិ៍ប៉ូលិស។ យ៉ាងណាមិញ យើងពុំទាន់ដឹងច្បាស់ថាតើម្តាយអប្រិយម្នាក់នោះទទួលពិន័យឬក៏អត់នោះទេ ចំពោះសកម្មភាពដែលបោះបង់កូនចោលតាមចិញ្ចើមផ្លូវបែបនេះ៕
ទស្សនាវីដេអូខាងក្រោម៖
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក ប្លែកៗ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]