រាជធានីភ្នំពេញ ៖ យុវជនមួយក្រុមបានសម្ងំប្រើប្រាស់ថ្នាំញៀនរួចមក ក៏នាំគ្នាជិះម៉ូតូទៅលេងកោះពេជ្រ ហើយយុវជនម្នាក់ក្នុងចំណោមយុវជនច្រើននាក់បានជិះម៉ូតូចេញមកមុន ដោយបានមកឈប់ម៉ូតូនៅលើផ្លូវជិតម្តុំព្រះអង្គដងកើ រួចដើរទៅអង្គុយលេងនៅលើសួន ដោយទុកសោម៉ូតូជាប់នឹងម៉ូតូ លុះមួយសន្ទុះក្រោយក៏មានមិត្តភក្តិរបស់គេចំនួន២ម៉ូតូទៀតមានគ្នា៤នាក់ ជិះតាមពីក្រោយមកដល់ក៏អោយយុវជនម្នាក់ផ្សេងទៀតចុះទៅលួចជិះម៉ូតូនោះ ធ្វើឱ្យប្រជាពលរដ្ឋប្រទះឃើញស្មានថាជាចោរលួចម៉ូតូ ក៏នាំគ្នាជួយដេញចាប់ឃាត់ខ្លួនបាន រួចស្វាគមន៍ម្នាក់មួយដៃម្នាក់មួយជើងទ្រោមខ្លួនផ្អើលអស់សមត្ថកិច្ចជួយអន្តរាគមន៍ ។
បន្ទាប់ពីកើតហេតុ ស្រាប់តែយុវជនជាម្ចាស់ម៉ូតូបាននិយាយថា ជនសង្ស័យគឺជាប្អូនរបស់ខ្លួន ហើយពួកគេកំពុងតែសម្តែង និងថតវីដេអូ លុះពេលនាំគ្នាសួររកកាមេរ៉ា បែរជាយុវជនជាម្ចាស់ម៉ូតូបានប្រាប់ថាអត់មានទេ គឺគេថតនឹងភ្នែក និងនិយាយក្នុងសភាពវង្វេងវង្វាន់លែងដឹងអី (សង្ស័យបែកថ្នាំ) ធ្វើអោយប្រជាពលរដ្ឋហួសចិត្តគ្រប់គ្នា។
ហេតុការណ៍គួរឱ្យហួសចិត្តខាងលើនេះបានបង្កការភ្ញាក់ផ្អើលកើតឡើងកាលពីវេលាម៉ោង១១និង៤០នាទីយប់ថ្ងៃទី៧ ខែមិនា នៅតាមបណ្ដោយមហាវិថីព្រះស៊ីសុវត្ថិ ជិតម្តុំព្រះអង្គដងកើ សង្កាត់ជ័យជំនះ ខណ្ឌដូនពេញ។
យុវជនម្នាក់ដែលសម្តែងជាជនសង្ស័យឈ្មោះ ឈុន លាង អាយុ១៨ឆ្នាំ មុខរបរធ្វើសំណង់ ស្នាក់នៅម្តុំផ្សារទួលសង្កែ សង្កាត់ទួលសង្កែ ខណ្ឌឫស្សីកែវ ។ ចំណែកយុវជនម្នាក់ដែលសម្តែងជាជនរងគ្រោះឈ្មោះ សៀងមុន្នីរ័ត្ន ដានិត អាយុ២០ឆ្នាំ ជាម្ចាស់ម៉ូតូមួយគ្រឿងម៉ាកហ្សូ៊មមើអិច ពណ៌ទឹកក្រូច ពាក់ស្លាកលេខ កំពង់ស្ពឺ ១L-៧១៨៩ ។
តាមប្រភពព័ត៌មានពីយុវជនម្នាក់ដែលសម្តែងជាជនសង្ស័យបានប្រាប់អោយដឹងថា មុនកើតហេតុ គឺគាត់និងមិត្តភក្តិផ្សេងទៀតបានសម្ងំប្រើប្រាស់ថ្នាំញៀនជាមួយគ្នានៅផ្ទះនៅទួលសង្កែ បន្ទាប់មកក៏នាំគ្នាជិះម៉ូតូទៅលេងនៅកោះពេជ្រ ហើយយុវជនដែលសម្តែងជាជនរងគ្រោះបានជិះម៉ូតូមកមុន ចំណែកគាត់ និងមិត្តភក្តិមានគ្នាចំនួន៤នាក់បានជិះម៉ូតូ២គ្រឿងមកតាមក្រោយ ។
ប្រភពដដែលបានបន្តថា លុះពេលគាត់ជិះមកដល់កន្លែងកើតហេតុខាងលើ ក៏ស្រាប់តែឃើញម៉ូតូមួយគ្រឿងចតចោលដោយឃើញទុកសោនៅជាប់នឹងម៉ូតូទៀត តែគាត់មិនស្គាល់ ។ ភ្លាមៗនោះមិត្តភក្តិរបស់គាត់បានប្រាប់អោយគាត់ចុះទៅលួចម៉ូតូនោះជិះចេញទៅ តែគាត់មិនហ៊ាន ក៏ត្រូវមិត្តភក្តិស្តីបន្ទោសថា «ពួកអញជាចោរ បើហ្អែងអត់ចេះធ្វើចោរម៉េចដើរត្រូវគ្នាជាមួយអញ» ។ ឮដូច្នោះគាត់ក៏ចុះទៅឡើងជិះម៉ូតូនោះបម្រុងគេចចេញទៅ ក៏ត្រូវប្រជាពលរដ្ឋនៅកន្លែងកើតហេតុប្រទះឃើញនាំគ្នាចេញទៅជួយដេញចាប់បាន និងស្វាគមន៍ម្នាក់មួយដៃម្នាក់មួយជើងទ្រោមខ្លួនផ្អើលសមត្ថកិច្ចចេញអន្តរាគមន៍ព្រោងព្រាត ។
បន្ទាប់ពីឃាត់ខ្លួនយុវជនដែលសម្តែងជាជនសង្ស័យរួចមក ស្រាប់តែម្ចាស់ម៉ូតូដែលសម្តែងជាជនរងគ្រោះបាននិយាយថាជាប្អូនរបស់គេទេ គឺពួកគេកំពុងតែសម្តែង និងថតវីដេអូ លុះពេលនាំគ្នាសួររកកាមេរ៉ា បែរជាយុវជនដែលសម្តែងជាជនរងគ្រោះបានប្រាប់ថាអត់មានទេ គឺគេថតនឹងភ្នែក និងនិយាយវង្វេងវង្វាន់លែងដឹងអី ធ្វើអោយប្រជាពលរដ្ឋហួសចិត្តគ្រប់គ្នា។
ក្រោយពេលកើតហេតុ ជនរងគ្រោះ និងជនសង្ស័យសុទ្ធតែបែកថ្នាំដូចគ្នា ហើយនិយាយលែងដឹងអី ក៏ត្រូវសមត្ថកិច្ចនាំទៅសាកសួរ និងធ្វើការអប់រំដល់អ្នកទាំងពីរនៅប៉ុស្តិ៍នគរបាលរដ្ឋជ័យជំនះ រួចក៏ដោះលែងអោយយុវជនទាំងពីរនាក់ជិះម៉ូតូត្រឡប់ទៅវិញផងដែរ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]