រាជធានីភ្នំពេញ ៖ កាលពីម្សិលមិញផ្ទុះរឿងគួរឱ្យភ្ញាក់ផ្អើលមួយ បន្ទាប់ពីកីឡាករសំបូរ សុភ័ណ្ឌ បានបង្ហោះសារនៅលើបណ្តាញសង្គមសុំការអន្តរាគមន៍ពីសម្តេចតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ពាក់ព័ន្ធនឹងការបាត់ប្រាក់រង្វាន់លើកទឹកចិត្តក្នុងនាមខ្លួនជាម្ចាស់មេដាយមាសកីឡាកាយវប្បកម្មជើងឯកពិភពលោកត្រូវបាន១២០លានរៀល បែរជាបាន២០លានរៀលទៅវិញ ។
ក្រោយពីផ្ទុះរឿងដ៏រសើបនេះ លោកអ៊ុក សិទ្ធិជាតិ អគ្គនាយកនៃអគ្គនាយកដ្ឋានកីឡាដែលជាសេនាធិការក្រសួងអប់រំ យុវជន និងកីឡា បានធ្វើការបកស្រាយថា ពុំមានការបាត់លុយប្រាក់រង្វាន់អីនោះទេ គ្រាន់តែមានការភាន់ច្រឡំ និងមិនបានដឹងអំពីដំណើររឿងនៃការផ្តល់ប្រាក់រង្វាន់តែប៉ុណ្ណោះ ។ លោកថា ប្រាក់រង្វាន់ចំនួន២០លានរៀលនោះគឺកើតចេញពីគោលការណ៍ស្នើសុំពិសេស ដើម្បីតម្រូវទៅលើមេដាយសំបូរ សុភ័ណ្ឌ ដណ្តើមបាន មិនមែនកំណត់១២០លានរៀលដូចទៅនឹងអនុក្រឹត្យនោះទេ ។
លោកបានពន្យល់ទៀតថា ករណីមេដាយរបស់សំបូរ សុភ័ណ្ឌ ដណ្តើមបានពីប្រទេសថៃ គឺមានវិញ្ញាសាច្រើនរហូតដល់ទៅ៥១វិញ្ញាសា ហើយមេដាយខ្លះប្រកួតពីពីរទៅបីប្រកួតក៏ទទួលបានមេដាយដែរ ។ ហេតុនេះក្រសួងមិនបានចាត់មេដាយនេះជាមេដាយមាសពិភពលោកពេញលេញ ដើម្បីទទួលបានប្រាក់រង្វាន់១២០លានរៀលនោះទេ ដោយក្រសួងបានប្រជុំប្រើប្រាស់ប្រកាសអន្តរក្រសួងដោយផ្តល់ប្រាក់រង្វាន់ប្រមាណជា២០លានរៀលតែម្តង ដើម្បីលើកទឹកចិត្តចំពោះការខិតខំរបស់កីឡាករ។
បន្ថែមពីលើនេះទៀត អគ្គនាយកនៃអគ្គនាយកដ្ឋានកីឡាដដែលក៏បានលើកឧទាហរណ៍ភ្ជាប់ទៅនឹងកីឡាប៉េតង់ផងដែរ ដែលជាប្រភេទកីឡាធ្លាប់ដណ្តើមបានមេដាយមាសពិភពលោកច្រើនជាងគេ ហើយតែងទទួលបាននូវប្រាក់រង្វាន់១២០លានរៀលពេញថា ប៉េតង់ទៅចូលរួមប្រកួតជើងឯកពិភពលោកម្តងៗមានប្រទេសចូលរួមច្រើន ហើយវិញ្ញាសាត្រឹមតែ៣ទៅ៤វិញ្ញាសាប៉ុណ្ណោះ ទម្រាំដណ្តើមបានមេដាយមាស១ កីឡាប៉េតង់ត្រូវឆ្លងកាត់ការប្រកួតច្រើន តែបើធៀបនឹងកីឡាករសំបូរ សុភ័ណ្ឌ ដណ្តើមបានមេដាយខាងលើគឺខុសគ្នា ។
យ៉ាងណាមិញ បន្ទាប់ពីមានការបង្ហោះសារនៅលើបណ្តាញសង្គមធ្វើឱ្យមានប្រតិកម្មពីមហាជនយ៉ាងច្រើន គេពុំទាន់ឃើញមានចំណាត់ការអ្វីពីក្រសួងអប់រំ ឬភាគីពាក់ព័ន្ធនោះទេ តែបើតាមការបញ្ជាក់របស់លោកសំបូរ ណាន ជាបងប្រុសបង្កើតរបស់កីឡាករសំបូរ សុភ័ណ្ឌ បានអះអាងថា នៅព្រឹកថ្ងៃទី៧ មីនា ម្សិលមិញនេះ តំណាងក្រសួងអប់រំបានកោះប្រជុំជាមួយបងប្អូនប្រុសរបស់ខ្លួន ដើម្បីដោះស្រាយនូវបញ្ហានេះ ។
គួរបញ្ជាក់ផងដែរថា ការប្រកួតកីឡាកាយវប្បកម្មជ្រើសរើសជើងឯកពិភពលោកលើកទី១០ ដែលធ្វើនៅក្នុងប្រទេសថៃកាលពីខែធ្នូ ឆ្នាំ២០១៨ គឺមានកីឡាករ-កីឡាការិនីចូលរួមសរុប៣៣៥នាក់ មកពី៥១ប្រទេស ដោយប្រកួតនៅលើ៥១វិញ្ញាសា ក្នុងនោះកម្ពុជាក៏បានបញ្ជូនកីឡាករ៥នាក់ទៅចូលរួមប្រកួតផងដែរ តែលទ្ធផលមានតែកីឡាករសំបូរ សុភ័ណ្ឌ ប៉ុណ្ណោះដែលដណ្តើមបានមេដាយមាស១គ្រឿង ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]