មានម្ចាស់បេះដូងហើយ! Preem បើកចិត្តនិយាយពីទំនាក់ទំនងស្នេហារបស់ខ្លួន និងគូស្នេហ៍លើកដំបូងជាសាធារណៈ!

ថៃ៖ Preem Ranida គឺជាតារាស្រីវ័យក្មេងមួយរូប (២២ឆ្នាំ) ដែលមានទេពកោសល្យក្នុងការសម្តែង មិនចាញ់តារាស្រីដទៃ ខណៈដែលប្រជាប្រិយភាពក៏កំពុងតែទទួលបានការចាប់អារម្មណ៍ខ្លាំង និងការស្រលាញ់ចូលចិត្ត ពីសំណាក់អ្នកគាំទ្រផងដែរ។ 

ជាក់ស្តែង តាំងពីចូលប្រឡូកនៅក្នុងវិស័យសិល្បៈមក តារាស្រីរូបនេះមិនដែលលេចឮព័ត៌មានទាក់ទងនឹងរឿងស្នេហានោះទេ។

ប៉ុន្តែស្រាប់តែថ្មីៗនេះ ដោយយោងតាមបទសម្ភាសន៍មួយ Preem នាងក៏បានបើកចិត្តនិយាយពីទំនាក់ទំនងស្នេហារបស់ខ្លួនជាលើកដំបូងយ៉ាងដូច្នេះថា៖

«ពេលនេះខ្ញុំរៀនចប់ហើយ ក៏មានពេលច្រើនជាងមុនសម្រាប់គិតពីខ្លួនឯង និងរឿងស្នេហាដូចគ្នា។ ចំពោះចំណុចដែលធ្វើឲ្យខ្ញុំយល់ព្រមបើកចិត្តស្រលាញ់គាត់ ក៏ព្រោះតែពួកយើងទាំងពីរចេះយល់ពីគ្នាទៅវិញទៅមក ហើយអាចពិភាក្សាគ្នាបានគ្រប់រឿង ព្រោះពួកយើងធ្លាប់ជាមិត្តភក្តិនឹងគ្នាជាយូរមកហើយ និងជាសិស្សប្អូនសិស្សច្បង ពេលរៀននៅសាកលវិទ្យាល័យផងដែរ។ គាត់មិនមែនជាអ្នកសិល្បៈទេ តែគាត់បានធ្វើឲ្យខ្ញុំដឹងថា គាត់យល់ពីការងាររបស់ខ្ញុំ ហើយតែងតែផ្តល់កម្លាំងចិត្តដល់ខ្ញុំជានិច្ច។ ពួកខ្ញុំទាំងពីរមានទំនាក់ទំនងជាមួយគ្នាមិនទាន់បានយូរប៉ុន្មានទេ ទើបតែចាប់ផ្តើមនៅមុនពេលដែលខ្ញុំជិតរៀនចប់នេះឯង» ។

ប៉ុន្តែបើទោះបីជាយ៉ាងណាក្តី តារាស្រី Preem ក៏នៅតែមិនទាន់បង្ហាញរូបភាពជាមួយគូស្នេហ៍ជាសាធារណៈ ក៏ដូចជាអត្តសញ្ញាណពិតនៅឡើយនោះទេ៕ 

• តារាថៃ