រាជធានីភ្នំពេញ៖ ឧត្តមក្រុមប្រឹក្សាសេដ្ឋកិច្ចជាតិ ដោយសហការជាមួយធនាគារពិភពលោកប្រចាំកម្ពុជា នឹងរៀបចំសិក្ខាសាលាពិគ្រោះយោបល់ថ្នាក់ជាតិលើកដំបូងស្ដីពី«គោលនយោបាយ និងទិសដៅនៃសេដ្ឋកិច្ចឌីជីថលកម្ពុជា» ដែលប្រព្រឹត្តទៅនៅថ្ងៃទី១២-១៣ខែមីនា នៅសណ្ឋាគារភ្នំពេញ។ នេះបើតាមសេចក្ដីប្រកាសព័ត៌មានរបស់ឧត្តមក្រុមប្រឹក្សាមួយនេះ នៅថ្ងៃទី៦ខែមីនា។
សិក្ខាសាលានេះ ត្រូវរៀបចំឡើងដើម្បីប្រមូលធាតុចូលជាទស្សនាទាន និងផែនទីបង្ហាញផ្លូវ សម្រាប់រៀបចំសេចក្ដីព្រាងក្របខណ្ឌគោលនយោបាយសេដ្ឋកិច្ចឌីជីថល។ ក្រុមហ៊ុនធំៗ ដូចជា Facebook, Microsoft, Alibaba, Unionpay, Visa, Huawei, Grab និងធុរកិច្ចថ្មីៗ (Startup) ព្រមទាំងក្រុមហ៊ុនក្នុងស្រុកមួយចំនួនទៀត នឹងចូលរួមធ្វើបទបង្ហាញ និងចែករំលែកទស្សនៈក្នុងសិក្ខាសាលា។
សិក្ខាសាលានេះនឹងមានការធ្វើបទបង្ហាញពីបទពិសោធន៍ប្រទេសក្នុងតំបន់ ក្នុងការរៀបចំគោលនយោបាយសេដ្ឋកិច្ចឌីជីថលក្នុងតំបន់ ដែលមានប្រទេសដូចជាថៃ ម៉ាឡេស៊ី និងប្រទេសសិង្ហបុរីជាដើម។ អ្នកចូលរួមផ្សេងទៀតមកពីស្ថាប័នពាក់ព័ន្ធក្នុងវិស័យសាធារណការ ធនាគារ ក្រុមហ៊ុនបច្ចេកវិទ្យាហិរញ្ញវត្ថុ អង្គការអន្តរជាតិ វិទ្យាស្ថានស្រាវជ្រាវ សាកលវិទ្យាល័យ តំណាងស្ថានទូត ដែលសរុបប្រមាណ ៣០០នាក់។
«សិក្ខាសាលានេះក៏ជាវេទិកាជជែកពិភាក្សាកម្រិតគោលនយោបាយដ៏សំខាន់ ហើយលទ្ធផលចេញពីការពិភាក្សានេះមិនត្រឹមតែជាធាតុចូលសម្រាប់រៀបចំគោលនយោបាយសេដ្ឋកិច្ចឌីជីថលកម្ពុជាប៉ុណ្ណោះទេ តែថែមទាំងជាធាតុចូលក្នុងការជំរុញពិពិធកម្ម និងបង្កើនប្រសិទ្ធភាព និងភាពប្រកួតប្រជែងសេដ្ឋកិច្ចរបស់កម្ពុជា»។ សេចក្ដីប្រកាសព័ត៌មានបញ្ជាក់ដូច្នេះ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក បច្ចេកវិទ្យា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
