ច្បាស់ការហើយ! ក្រុមបាល់ទាត់ខេត្តកំពង់ចាម នឹងប្រើប្រាស់ទីលានវិទ្យាល័យខេត្តត្បូងឃ្មុំមួយនេះ ជាទឹកដីបណ្តោះអាសន្ន

ភ្នំពេញ៖ ខណៈដែលពានរង្វាន់លីគកំពូលកម្ពុជា កាន់តែកៀកខិតជិតចូលមកដល់នោះ គណៈកម្មការប្រកួតបាល់ទាត់ជាតិក៏បានធ្វើសន្និសីទសារព័ត៌មានមួយ ដើម្បីផ្តល់ជូននូវព័ត៌មានសំខាន់ៗ មុនការប្រកួតពានរង្វាន់ថ្នាក់ជាតិមួយនេះចាប់ផ្តើម។

រឿងរ៉ាវដែលគួរឱ្យចាប់អារម្មណ៍នោះគឺ ពាក់ព័ន្ធនឹងក្រុមបាល់ទាត់ខេត្តកំពង់ចាម ដែលជាក្រុមថ្មីទើបចូលរួមក្នុងលីគកំពូលឆ្នាំ ២០១៩ នេះតែម្តង។ ក្រុមបាល់ទាត់ដែលមានមូលដ្ឋាននៅខេត្តកំពង់ចាមមួយនេះ បានស្នើសុំប្រើប្រាស់ទីលាននៅក្រៅខេត្តរបស់ខ្លួន គឺទីលានបាល់ទាត់វិទ្យាល័យប៊ុន រ៉ានីហ៊ុនសែន មេមត់ ដែលស្ថិតនៅខេត្តត្បូងឃ្មុំជំនួសវិញ។ ពាក់ព័ន្ធនឹងបញ្ហានេះដែរ លោក ឆាំង ពិសិដ្ឋ បានធ្វើការបកស្រាយពីមូលហេតុនេះថា ដោយសារកីឡដ្ឋានខេត្តកំពង់ចាម មិនទាន់បានជួសជុល និងរៀបចំរួចរាល់។

គួរបញ្ជាក់ថា ទីលានបាល់ទាត់វិទ្យាល័យប៊ុន រ៉ានីហ៊ុនសែន មេមត់ បានជួសជុល និងដាំស្មៅថ្មីយ៉ាងស្រស់ស្អាត ក្រោមគម្រោងអភិវឌ្ឍន៍សាលាតម្រង់ទិសបាល់ទាត់ទូទាំង ២៥រាជធានី/ខេត្ត របស់សហព័ន្ធកីឡាបាល់ទាត់ជាតិកម្ពុជា៕