ប្រយ័ត្នប្រយែង! កីឡាករបាល់ទាត់ម្នាក់បានស្លាប់ភ្លាមៗ បន្ទាប់ពីភ្លាត់ស្នៀតគ្រោះថ្នាក់ពេលកំពុងប្រកួត (មានវីដេអូ)

ហ្កាបុង៖ កីឡាករបាល់ទាត់អាជីពម្នាក់បានដួលសន្លប់ និងដាច់ខ្យល់ស្លាប់ភ្លាមៗ ក្រោយពេលដែលរូបគេព្យាយាមធ្វើការប្រជែងតែតបាល់ខ្ពស់ខ្លាំង។ កីឡាករដែលបាត់បង់ជីវិតមានឈ្មោះថា Herman Tsinga ប្រកបអាជីពជាមួយក្លិប Akanda FC ដែលជាក្លិបស្ថិតនៅក្របខណ្ឌលីគកំពូលរបស់ប្រទេសហ្កាបុង។

ឧបទ្ទវហេតុនេះបានកើតឡើងក្នុងការប្រកួតរវាងក្រុម Akanda FC ជាមួយ Missile FC ដែលទើបតែដំណើរការបាន ២៣នាទីប៉ុណ្ណោះ។ ក្នុងវីដេអូខ្លីមួយបានបង្ហាញថា ឡានសង្គ្រោះបន្ទាន់ដែលត្រៀមស្រាប់ បានបើកចូលទីលាន និងក្រុមគ្រូពេទ្យបានសែងកីឡាករដែលគ្រោះថ្នាក់ទៅសង្គ្រោះភ្លាមៗ។ 

ក្រោយមកក្រុមវេជ្ជបណ្ឌិតនៃមន្ទីរពេទ្យ Owendo ដែលបានព្យាយាមសង្គ្រោះ បានបញ្ជាក់ប្រាប់ថាកីឡាកររូបនេះបានស្លាប់បាត់ទៅហើយ។ គ្មានប្រភពច្បាស់លាស់ណាមួយបញ្ជាក់ថាកីឡាករ Tsinga បានស្លាប់ពេលណាឱ្យប្រាកដនោះឡើយ ប៉ុន្តែមានសេចក្តីរាយការណ៍ថារូបគេទទួលបានការសម្រួលចង្វាក់បេះដូងពីវេជ្ជបណ្ឌិតយោធាម្នាក់ផងដែរ មុននឹងត្រូវបានបញ្ជូនទៅកាន់មន្ទីរពេទ្យ។

បើយោងតាមសារព័ត៌មានក្នុងស្រុកមួយរបស់ហ្កាបុងបានរាយការណ៍ថា រថយន្តសង្គ្រោះបន្ទាន់នៅក្នុងទីលាននោះគ្មានសម្ភារៈសង្គ្រោះគ្រប់គ្រាន់សម្រាប់ត្រៀមឡើយ។ គួរបញ្ជាក់ថា នេះជាករណីបាត់បង់ជីវិតលើកទី៧ហើយ នៅក្របខណ្ឌលីគកំពូលហ្កាបុង ក្នុងរយៈពេល ១២ឆ្នាំកន្លងមកនេះ៕

សូមទស្សនាវីដេអូខាងក្រោម៖ 

Gabon National Oil-Foot mourning. Akanda FC player Herman Tsinga who died upon his transfer to Owendo CHU after collapsing on the pitch a few seconds after an aerial duel in the 23rd minute of the game against Missile FC in the stage of the INJS. RIP pic.twitter.com/IRyYCNEgoJ

— NANA AGYEMANG (@naagyeman6) March 3, 2019