រាជធានីភ្នំពេញ ៖ ជនសង្ស័យជាមុខសញ្ញាចោរគាស់ផ្ទះម្នាក់បានគាស់សោបន្ទប់ជួលលួចទ្រព្យសម្បត្តិជាបន្តបន្ទាប់ ដោយលើកមុនគាស់បានសម្រេច៣បន្ទប់ និងលួចទ្រព្យសម្បត្តិមួយចំនួនរួចគេចខ្លួនបាត់ ជាហេតុធ្វើឲ្យជននេះញ៉ាមក៏ធ្វើសកម្មភាពនៅប្លុកផ្ទះជួលដដែលបន្តទៀត ប៉ុន្តែលើកនេះគ្មានសំណាងដូចលើកមុនឡើយដោយគាស់សម្រេច៣បន្ទប់ទៀតតែត្រូវម្ចាស់បន្ទប់ទៅទាន់ចាប់ខ្លួនប្រគល់ជូននគរបាលតែម្ដងបង្កឱ្យមានការភ្ញាក់ផ្អើលកាលពីម៉ោង១និង២០នាទីរសៀល ថ្ងៃទី២ ខែមីនា ឆ្នាំ២០១៩ ស្ថិតនៅក្នុងភូមិត្រពាំងថ្លឹង១ សង្កាត់ចោមចៅ១ ខណ្ឌពោធិ៍សែនជ័យ រាជធានីភ្នំពេញ។
ជនសង្ស័យឈ្មោះ អឹុម សៅ អាយុ២៩ឆ្នាំ ស្នាក់នៅផ្ទះជួល ក្នុងភូមិដំណាក់ធំ៣ សង្កាត់ស្ទឹងមានជ័យ៣ ខណ្ឌមានជ័យ មានស្រុកកំណើតនៅក្នុងភូមិតាភេម ឃុំចន្ទ្រា ស្រុករមាសហែក ខេត្តស្វាយរៀង ដោយនគរបាលដកហូតបានម៉ូតូមួយគ្រឿងម៉ាក MSX ពណ៌ខ្មៅ ពាក់ស្លាកលេខ ភ្នំពេញ 1DM-1552 ជាមធ្យោបាយជនសង្ស័យជិះដើរធ្វើសកម្មភាព និងកូនសោសម្រាប់ដើរចាក់ឆ្កឹះ មេសោរតាមបន្ទប់ និងផ្ទះនានាផងដែរ។
តាមប្រជាពលរដ្ឋបានឲ្យដឹងថា នេះជាសកម្មភាពលើកទី២ហើយ ដែលជនសង្ស័យបានប្រព្រឹត្តិ ដោយកាលពីរសៀលថ្ងៃទី១ មីនា ជនសង្ស័យធ្វើសកម្មភាពគាស់សោបន្ទប់ជួលខាងលើបានសម្រេចចំនួន៣បន្ទប់ម្តងរួចហើយ រួចលួចបានទ្រព្យសម្បត្តិមួយចំនួន ហើយគេចខ្លួនបាត់ដោយសុវត្ថិភាព។
ខណៈនោះម្ចាស់បន្ទប់មិនទាន់បាននាំគ្នាទៅប្តឹងនគរបាលផង ស្រាប់១ថ្ងៃក្រោយ គឺនៅរសៀលថ្ងៃទី២ ខែមីនា ជនសង្ស័យរូបនោះជិះម៉ូតូទៅធ្វើសកម្មភាពគាស់សោបន្ទប់បាន៣ទៀត ប៉ុន្តែត្រូវបានម្ចាស់ទាន់ស្រែកឆោឡោព័ទ្ធចាប់ខ្លួនបានប្រគល់ឲ្យនគរបាលសាកសួរ និងចាត់ការតាមច្បាប់តែម្ដង៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]