ខេត្តតាកែវ ៖ នៅព្រឹកថ្ងៃទី៣ ខែមីនា ឆ្នាំ២០១៩នេះ ប៉ូលិសការិយាល័យព្រហ្មទណ្ទកំរិតស្រាលខេត្ត បានបញ្ជូនជនសង្ស័យម្នាក់ទៅកាន់សាលាដំបូងខេត្តហើយ ខណៈពេលដែលបុរសរូបនេះទាត់មន្ត្រីជំរឿន៤ជើងពេលបំពេញការងារ ហើយស្ទុះទៅរារាំងចាប់ហែកឯកសារ រួចដុតចោលអស់គ្មានសល់ និងថែមទាំងជេរដៀលដល់ថ្នាក់ដឹកនាំទៀតផង ទីបំផុតក៏ត្រូវសមត្ថកិច្ចចុះចាប់វាយខ្នោះនាំយកមកចាត់ការតាមច្បាប់ បង្កឱ្យមានការភ្ញាក់ផ្អើលឡើងកាលពីថ្ងៃទី០១ ខែមីនា ឆ្នាំ២០១៩ នៅចំណុចភូមិត្រពាំងត្រគៀត ឃុំឧត្តមសុរិយា ស្រុកត្រាំកក់។
លោកវរសេនីយ៍ឯក យ៉ុង ញីវ នាយការិយាល័យព្រហ្មទណ្ទកំរិតស្រាលខេត្ត បានឱ្យដឹងថាជនសង្ស័យមានឈ្មោះមិន សុក អាយុ៤៩ឆ្នាំ មុខរបរកសិករ រស់នៅភូមិត្រពាំងត្រគៀត ឃុំឧត្តម សុរិយា ស្រុកត្រាំកក់។ ចំណែកជនរងគ្រោះមានឈ្មោះយ៉ាង សុភាព ភេទប្រុស អាយុ៣៩ឆ្នាំ ជាមន្ត្រីជំរឿន រស់នៅភូមិរំពាក់ពេន ឃុំឧត្តមសុរិយា ស្រុកត្រាំកក់។
លោកនាយការិយាល័យបានបញ្ជាក់ថា ក្នុងពេលចុះបំពេញការងារជំរឿនប្រជាជននៅទីតាំងខាងលើ ស្រាប់តែជនសង្ស័យបានរារាំងមិនឱ្យលោកយ៉ាង សុភាព ចុះបំពេញឯកសារ និងធ្វើការងារនោះទេ។ ដោយភ្លាមនោះ គ្រាន់តែឃើញមន្ត្រីជំរឿនចុះបំពេញការងារភ្លាម ស្រាប់តែជនសង្ស័យបានទៅដណ្តើមយកឯកសារការងារដែលលោកយ៉ាង សុភាព ចុះធ្វើបានចំនួន៥៧គ្រួសារ និងផែនទីប្លង់ជំរឿនយកទៅហែក រួចដុតចោលទាំងអស់។ មិនតែប៉ុណ្ណោះ ជនសង្ស័យថែមទាំងបានទាត់លោកយ៉ាង សុភាព ដែលជាមន្ត្រីជំរឿនចំនួន៤ជើងទៀតផង។ លើសពីនេះទៅទៀតជនសង្ស័យបានជេរដៀលដល់ថ្នាក់ដឹកនាំរាជរដ្ឋាភិបាលផងដែរ។
ក្រោយពេលកើតហេតុ នគរបាលស្រុកបានចុះទៅឃាត់ខ្លួនកសាងសំណុំរឿងមកការិយាល័យព្រហ្មទណ្ទកំរិតស្រាលខេត្ត រួចក៏បានបញ្ជូនបន្តមកសាលាដំបូងខេត្តដើម្បីចាត់ការទៅតាមច្បាប់៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
